الموضوع: تقرير كامل عن الفيكترا سي بعد عشرة 6 سنوات

السلام عليكم ان شاء الله في هذا التقرير هتناول مميزات و عيوب الجميلة فيكترا سي بعد استخدامها 6 سنوات و بعض النقاط الاخرى و هكون على قد ما اقدر حيادي جدا و كل ما سأذكره هو بناءً على تجربة في معظم الظروف سواء كانت سيئة او جيدة نبدأ اولا بسم الله الرحمن الرحيم ، التعريف بالسيارة :

فيكترا سي موديل 2008 اليجانس

محرك 1600 سي سي ecotec كود z16xep
يولد قدرة 105 حصان و عزم 150 نيوتن.متر
ناقل حركة ايزي ترونك 5 سرعات
سعة خزان الوقود 61 لتر
مصنعة بالكامل في المانيا و انتهى انتاجها في 2008 و جاءت خليفتها انسجنيا

ثانيا المميزات و نبدأ بالشكل الخارجي :
شكلها الخارجي جميل جدا تحسه مدي طابع كلاسيكي من الخلف و رياضي من الامام خصوصا ان مقدمة العربية مقتربة من الارض دي اذواق طبعا بس شكلها انا شايفه الاحلى في الفئة دي مع السيفيك اللي شكلها جميل برضه و العربية دي قبل ما نشتريها كنت حاسس انها مختلفة عن العربيات اللي في الشارع من اول ما نزلت في اواخر 2006 و بدأت تظهر في الشارع قلت العربية دي فيها طابع احترام جدا متحسهاش انها تنفع في وسط العربيات اللي ماشية في مصر دي متمشيش غير في اوروبا و خصوصا اني كنت لسة صغير كنت بحسها فخمة كده.
نيجي للشكل الداخلي :
العربية فخمة جدا من جوه وواسعة و الخامات كويسة
المحرك و الفتيس : المحرك مع انه بيولد قوة 105 الا انه اشد من عربيات تانية بتولد فوق ال 120 حصان و كمان على وزنها انا شايفه معقول هو مش كويس قبل ال 2800 rpm بعد كده بيتحول و بالذات بيبقى حلاوته على السرعات العالية و تجميع العربية كويس بفضل الايزي ترونك و اللي شايفه كويس و مخلي الموتور عصبي و عايز يجريك دائما مع تحفظي على بعض العيوب اللي هذكرها فيما بعد .
القاعدة و الراحة : العربية مريحة و اريح من العربيات الكوري تحس ان الكرسي ضمك و مش متاكل زي الكرسي بتاع الكوري و الياباني و الى حد ما العفشة كويسة بس افضل لها نيتروجين و كاوتش و لا هو طري و لا هو ناشف لأن الطري في مشكلة انه بيتخرم مع وزن العربية و من الاخر مش بيعمر معاها .

الامان و الفرامل : العربية غنية عن التعريف في الامان صاج محترم "صاج براميل " فيها كل عوامل الامان من ايرباج و فرامل محترمة جدا جدا و كمان لو فكينا الاكصدام هنلاقي مصد ناشف فعلا و صعب يتني و كذلك جوانب الابواب ده غير صاج العربية الاساسي

بعض النقاط في المميزات :
1-قطع الغيار بتعيييش جامد سير الكاتينة غيرناه عند 100000 و طلمبة المية لسة شغالة لحد دلوقتي مع انها المفروض تتغير بقالها بتاع 70000 بس لسة عايشة
2-الثبات و يا عيني على ثبات العربية دي ممكن تغروز بيها فوق 160 و كمان الراكب مش بيبقى حاسس بالسرعة و استجابة الموتور على الطرق السريعة روعة .
3-التكنولوجيا بتاعتها مش صعبة لكنها مش عايزة لعب و عايزة حد فاهم كويس فيها و بس .
4-العربية ممتعة جدا في سواقتها خصوصا اللي بيحب القيادة الرياضية و بالذات ان صوت الموتور جااامد .
5-عزل الصوت كويس و لكنه انخفض مع الوقت بس ما زال متفوق عن عزل عربيات كثير جدا
6-كاوتش و جنوط عريضة مخلياها دبابة على الطريق
7-عشان مش منتشرة اوي و شكلها ليه برستيج فهى مميزة عن بقية السيارات اللي بجوارها
8-فيها ميزة مش منتشرة في كثير من السيارات الا و هو الباور هتقلولي ما كل العربيات فيها باور هقلكم لا الباور بتاعها كهرباء و هيدروليك في نفس الوقت كهرباء لسهولة التحكم في الزحمة و الركن و و بعد ال 60 زيت لضمان الامان و الثبات .
دي بعض المميزات و يا ريت اكون اوفيت بيها كلها و نيجي للعيوب اللي ممكن تعكر عليك المزاج الحلو
9-الكمبيوتر بتاعها ذكي و بيقرأ كله مظبوط و بيأدي المطلوب يعني الزجاج لو حس بوجود عائق بينزل تاني امان و حماية و كمان لو في لمبة محروقة بيشغل و احدة بدالها
10-التكييف تلاجة بمعني الكلمة لكن لازم يبقى مظبوط و التكيف بتاعها افضل من تكيفات ياباني .

نيجي للعيوب :

1- المحرك و الفتيس : عيب الموتور انه صغير عليها شوية هو مش رخم و لكن كنت اتمنى انه يكون اكبر و لكنه مرضي لكن قبل 2800 rpm مش بيعجبني
2-الاول للتاني في الايزي ترونك لازم تسقهم مانيوال لأنهم بيرخموا في النتش بتاعهم و بصراحة ببقى خايف الكنترول يعمل حركة مش حلوة و لكنه الحمد لله ماشي كويس
3-في صوت زي كركرة غريبة عند 2000 rpm و بتختفي بعدها مباشرة و قل مع تغيير زيت الى شيل موبيل 1 كان مبهدلها .
4 - العربية جابت جوان وش سلندر مرة واحدة بس بعد ما سخنت و بصراحة هى سخنت عن اخر نقطة من مية و كان الثرموسات بايظ و لمبة مية الرادياتير قليلة منورة و كنا ماشيين على 170 كانت غلطة من الوالد بس هل كان المفروض تبرد و تكمل عادي ام انه طبيعي ان حصل كده و هل ده معناه ان الموتور اتفتح يا ريت تردو على السؤال البسيط اللي في النص ده .
نيجي للعربية من الخارج :
مشكلتها انها واطية من قدام و ده سبب ان الكساحة اتبهدلت و اتغيرت و برضه مفيش فايدة كله بسبب المطبات يمكن الموضوع ده مديها شكل و لكنه عيب في نفس الوقت
بالنسبة للداخل :
1-ريش التكيفات اللي تحت بتتكسر زي ما تم التوضيح قبل كده
2-القشرة اللي عند التكيف الخلفي اتقشر
3-الكاوتش بتاع الزجاج بيحك مع الزجاج فبيعمل صوت مش حلو و ده لما بينشف مع الوقت
4-تزييق خفيف في الباب الخلفي شمال .
الكهرباء و الإضاءة :
عيب العربية دي الإضاءة الامامية مش حلوة خالص مع الهالوجين سواء اصلي او نايت بريكر العربية دي مينفعش معاها غير زينون هو ده اللي بيظبطها و كذلك الفوجات .

بعض العيوب العامة :

1-سعر اعادة البيع فيه خسارة ده طبعا للي كان شاريها زيرو و لكنه ميزة للي هيشتريها مستعمل

2-قطع الغيار الى حد ما غالية بس في التوكيل و لكنها ارحم من العربيات الجديدة الكوري و الياباني و بقى متوفر ليها حاجتها استيراد و بعض الماركات الاخرى اللي اسعارها الحد ما منخفضه و بتكون بنفس الجودة .
3-التوكيل سيئ و الصنايعية اللي برة احسن و بقى فيه دلوقتي ناس فاهمينها و حافظنها .
4-الشاشة الصغيرة مستفزة و نفسي ان شاء الله اركب الكبيرة .
5-دورة المية عايزة اهتمام بعد ما العربية تعدي الخمس سنين

في الاخر عايز اقول ايه ؟

العربية دي جميلة فعلا مش متعبة اوي و حمالة قسية و بتقول هستحملك المرة دي لكن لما بتزعل للأسف زعلتها و حشة خالص و الحمدلله نادرا ما بتزعل و بتمتع اللي سايقها عاوز راحة بتديله عاوز قيادة رياضية بتديله و ان شاء الله تفضل متألقة و بسطاني دائما و شايفها من اجمل ما انتجت اوبل و نختم بصورتين صغيرين للجميلة فيكترا و ادعو ربنا يخليها دائما مظبوطة و بدون اعطال .