نصيحة بخصوص التعديل لإرتفاع الكورولا 2014
السلام عليكم ورحمة الله وبركاته
أنا كنت فى التوكيل من كام يوم وفعلا و زى مبيقول الرجالة فى المنتدى ان الدفعة من أول يتاير 2014 تم تعديل ارتفاعها بالفعل وسوف يتم تعديل سيارات الملاك للدفعات القديمة مجاناً ولم يتم تحديد الوقت بعد.
لكن نصيحة منى محدش يعمل التعديل لأسباب منها :
1- أنا متأكد بنسبة 100% ان ده هيأثر على ثبات العربية بالذات على سرعات عالية بعد 100 كم/س وده اللى قالهولى أحد مديرى مبيعات تويوتا لما كنت فى التوكيل.
2- عدم ثقتى فى الفنيين المصريين ومش لازم عشان هوه التوكيل هيبقى فاهم أوى والله أعلم.
3- الله أعلم ايه بالظبط اللى هيعدلوه ميكانيكيا فى العربية بس الموضوع مش بساهل كده لأن فى حسابات تانية كتير أوى واستحالة التعديل اللى هيتعمل هيبقى زى لما تبقى العربية متصنعة ومجهزة بالارتفاع ده وخارجة من المصنع كده وده اللى مخلينى متأكد ان التعديل ده وبالذات على ايد الفنيين بتوعنا اللى بيعجنو احيانا هيأثر فى ثبات العربية وحاجات تانية الله اعلم بيها هتبان بعد التعديل.
وأنا شايف بصراحة إن العربية غير محتاجة تعديل والارتفاع مناسب إحنا بس اللى عندنا رعب من اى عربية منخفضة مش عارف ليه . وبعدين ماهى السيفيك أوطى منها والناس ماشية بيها ومافيش مشكلة .
أنا العربية معايا أكتر من 5 شهور وعامل بيها أكثر من 3500 كم وقربت على صيانة ال5000 وعديت على مطبات كتير جدا لأنى بعمل أكتر من 70-60 كم يوميا ومحكتش معايا غير فى المطبات اللى ممكن تحك فيها أى عربية وده كان وأنا محمل وراكب معايا 3 ومعايا حاجات فى الشنطة كمان.
فنصيحة منى بعد تجربة بالارتفاع الطبيعى للعربية ان محدش يعمله وبالعكس أنا بحمد ربنا ان العربية معايا قبل مايعدلو فى ارتفاعها كمان :]
فى الآخر دى آراء وأنا حابب اعرف رأيكم برده.
وآسف لو كنت طولت