تقرير بالصور : عن الفرق بين الفلتر الياباني والفلتر الصيني !!

الفرق بين فلتر الزيت الصيني و الفلتر الياباني

طبعاً فاكرين اخر موضوع انا عن اني كنت مدايق جداً من معاملة توكيل تويوتا بتاع ابو رواش. وانوا ازاي انا رايح اشتري فلتر زيت. ياباني. يقوموا مديني فلتر صيني وكمان. غالي ... المهم. مسكيتش انا ورحت عند حبايبنا في ٦ اكتوبر المجموعة المتحدة ... ودخلت عند قطع الغيار اشتريت من عندهم فيلتر ياباني ١٠٠٪ أصلي. بسم الله مشاء الله والحقيقة . المهندس محمد الي الحقيقة. الراجل ده زووق زووووق زوووق فوق ما تتصوروا. وراجل تويوتاوي أصيل ...و تويوتاوي حتى النخاع ... عملي تخفيض على الفلتر من ٦٥ جنية. وحسبهولي ٦٠ جنية

https://scontent-b-cdg.xx.fbcdn.net/...95328720_n.jpg

والحقيقة تناقشة معاه ووريتوا الفلتر الصيني الي جبتوا من ابو رواش ( الصيني ) ورغم انوا استغرب في البداية لكن أكد لي معلومة انوا عادي. ومصنع تويوتا الي في الصين ميقدروش يطلعوا اي فلتر للسوق إلا إذا كانت الكولتي بتاعتوا عالية ويكون اصلي ١٠٠٪ حتى لو كان صيني لكن تعالوا نتعرف على بعض تفاصيل الاختلاف بين الفلترين. بالصور ..

نبتدي بالكرتونة وزي ماهو مبين في الصورة بالاسفل الفلتر على اليمين صيني والفلتر الي على الشمال ياباني

https://fbcdn-sphotos-c-a.akamaihd.n...86579408_n.jpg

لاحظ الاختلاف في كود الفلترين ولمن سئلت باشمهندس محمد في الشركة المتحدة
قال لي لأ. اخر حروف في الكود ده بيدل على بلد المنشأ سواء اكان مصنع اليابان او مصنع الصين. وكمان مصنع تايلند او تركيا بيبقى ليهم كود ..
الفلتر الياباني كودو 90915-yzzc3
اما الفلتر الصيني كودوى yzzj1-90915

https://fbcdn-sphotos-e-a.akamaihd.n...14173776_n.jpg

الفرق حتى في العلبتين. الي على اليمين فلتر اصلي صيني
والي على الشمال فلتر ياباني أصلي

https://fbcdn-sphotos-a-a.akamaihd.n...52263958_n.jpg

صورة مقربة لعلبة الفلتر الياباني

https://fbcdn-sphotos-b-a.akamaihd.n...69026054_n.jpg

صورة مقربة لفلتر الزيت الصيني

https://fbcdn-sphotos-d-a.akamaihd.n...63020475_n.jpg

أذكر الله ( بسم الله مشاء الله)
نيجي هنا لاهم الفروق الجوهرية بين الفلترين
كما هو مبين في الصورة الصيني قولنا على اليمين والياباني على الشمال قطر الفتحة واحد لكن الياباني بيحتاج. لوردة بتركب علشان مايسربش الزيت الصيني لايحتاج الا وردة

https://fbcdn-sphotos-d-a.akamaihd.n...95651017_n.jpg

طبعاً ادي الفلترين. اهم ... شايف حتى الاختلاف في لون الكتابه
الياباني بيكتب باللون الرمادي. لكن الصيني. بيكون مكتوب باللون الابيض

https://fbcdn-sphotos-f-a.akamaihd.n...31479066_n.jpg

في الختام الفلترين اصليين ... لكني مازلت اسجل اعتراضي الشديد واشجب واستنكر ان قطع غيار تنزل صيني في السوق المصرية لعربية ياباني ... وان لم يكن من الموضوع ده بود فالمفروض انك تخلي قطع الغيار الصيني موجودة والياباني موجوده وده بسعر وده بسعر ... وللزبون حرية الاختيار ... في ناس متفرقش معاهم. وفي ناس زي حلاتي كده بيعملولك فيلم ومن الحبه قوبة على حاجة زي كده ... وفي الختام ارجو انوا يكون تقريري. عجبكم فاذا عجبكم اذكر الله وقول بسم الله مشاء الله ولا حول ولا قوة الا بالله لا الفلتر يتخرم. او نصحى الصبح لا نلاقي فلتر ياباني ولا حتى تيواني هههههه. (( بهزر معاكم طبعاً ))

@@@@@@@@@@@@@
وتقبلوا فائق تحياتي

تسلم ايدك عالتقرير وربنا يباركلك في الفلترين ان شاء الله .... استفسار بعد اذنك المجموعة المتحدة فين في اكتوبر ...ولو اسم الشارع اكتبه عال gps يبقي جزاك الله كل الخير : ))

اســــــتـــاذ دايما يا عمدة
رجعتني لايام اليابــــانــــــي الاصلية والله افتقدنا
الايام دي والحاجات القيمة
خالص تحياتي ..

اقتباس:

---

المشاركة الأصلية كتبت بواسطة sonaeg

تسلم ايدك عالتقرير وربنا يباركلك في الفلترين ان شاء الله .... استفسار بعد اذنك المجموعة المتحدة فين في اكتوبر ...ولو اسم الشارع اكتبه عال gps يبقي جزاك الله كل الخير : ))

---

لا هو يادكتور اسم الشارع مش حافظوا بس بص حضرتك
عارف ليلة القدر خليك ماشي على طول لا يمين ولا شمال هيقابلك مبنى الاهرام على يمينك مش كده. خليك مكمل على طول. لغايت ما تلاقي مفرق محطوط يافطة عليه. مكتوب عليها تويوتااا وسهم شمال. هتخش شمال وخليك ماشي بعد كده على طول لا يمين ولا شمال لغايت ما يجيلك مفرق تاني مكتوب عليه. تويوتا وسهم يمين وكده تكون وصلت

المشكلة مش كاتبين على الفاتورة نمرة التيلفون. وانا نسيت اخود منهم كارت ولا حاجة. بس هما الحقيقة ناس محترمة جداً وعجبني فيهم حاجة مهمة. ملقيتهاش في اي ورشة او توكيل تويوتا ذات نفسوا ان لو حاجة مش محتاجة تغير. وانتا رايح تغيرها بيقولولك. سيبها مدام لسه فيها عمر ... ويخيرك لو عاوز تغيرها ولو عاوز تخليها اهي شعاله ولسه هتمشيك ... تاني حاجة. ابن صاحب التوكيل. الي درس في اوروبا وامريكا وراجل متخصص ومهندس وفاهم بيوقف بنفسوا يتابع العملاء ويشرف على الاصلاح وكأن العربية بتاعتك دي عربيتوا ... خدمت الاستقبال عندهم رائعه لكل الناس الابتسامة لاتفارق وجوهم ... واجب الضيافة مجاناً. ده شيء اساسي عندهم حتى لو مش جي تعمل حاجة جي بس تشيك او تسئل سؤال وماشي ... الحقيقة انا واحد من المنتدى هنا زميل قديم نصحني اني اروحلهم وفعلاً لم يخب ظني فيهم ويكفي انهم بيتقوا الله ويراعوا ضميرهم دي عندي بالدنيا كلها ... ربنا يبارك لهم ... وتحياتي

اقتباس:

---

المشاركة الأصلية كتبت بواسطة s o p h o s

اســــــتـــاذ دايما يا عمدة
رجعتني لايام اليابــــانــــــي الاصلية والله افتقدنا
الايام دي والحاجات القيمة
خالص تحياتي ..

---

حبيبي يا بوحميد ... اااااااااه يا خوفي. لا تكون بعت الكورولا بتاعتك
اووووعه تكون بعتها. ... هيا محتاجة بس حبت روشنة واتفرج عليها. هتبقى عامله ازاي .... وتحياتي

من غير زعل .. وبحلفك من غير زعل .. بالنسبة للنقطة اللي في الاقتباس بصراحة أه .. مع كامل احترامي وتقديري لشخصكم الكريم

اقتباس:

---

وفي ناس زي حلاتي كده بيعملولك فيلم ومن الحبه قوبة على حاجة زي كده

---

نيجي بقى للمهم .. مش عاوز أصدمك وأقولك أنه في أمريكا وأوربا المنتجات الصيني بصفة عامة (مش قطع غيار العربيات بس) من أجود المنتجات ويمكن أحسن من الياباني والأوربي كمان .. وألا مكنتش تلاقي تيشرتات أديداس مثلاً معموله في الصين .. ولكن الكواليتي واوووو .. وده كمان علشان فيه رقابة على الواردات عندهم .. يبقوا حصل على منتج عالي الجودة وبسعر أرخص .

بالنسبة لصناعة السيارات .. مش عارف إذا كان عند حضرتك معلومة أن الشركات الصينية بتشتري دلوقتي الشركات ذائعة الصيت الأوروبية المنشأ .. سيبك من الموضوع ده علشان دي ناس معاها فلوس وبيستغلوا أن الشركات دي وقعت مادياً وبيشتروها .. إنما هل تعلم أن شركة عريقة زي مرسيدس بتجري وراء شركة بي واي دي الصينية علشان تعمل معاها شراكة في مجال السيارات الكهربائية أه والله زي ما بقولك كدة .. وطبعاً الصينيين أنتهزوها فرصة علشان ياخدوا أسرار الكواليتي وتكنولوجيا تصنيع السيارات .. هل وهل وهل وهل ..إلخ من هنا لبكرة .

طب بص كدة على الموضوع ده والفيديو اللي فيه .. وقولي أيه رأيك في جودة العربية دي سواء في التقفيل أو الخامات أو الأوبشن .. على ما أعتقد أنك لو شلت الماركة ممكن تفتكر أنه موديل جديد لسيارة كورية أو يابانية .
http://www.nilemotors.net/Nile/403896-mg.html

في النهاية الصينيين بيعملوا من المنتج الواحد جميع الدرجات .. وطبعاً شركة زي تويوتا أكيد حتبقى حريصة على الكواليتي بتاعها في مقابل سعر أرخص عن ما بيتعمل عندها في اليابان .

وأرجو أنك متزعلش مني .. خاالص تحياتي .

اقتباس:

---

المشاركة الأصلية كتبت بواسطة Y a r i s

حبيبي يا بوحميد ... اااااااااه يا خوفي. لا تكون بعت الكورولا بتاعتك
اووووعه تكون بعتها. ... هيا محتاجة بس حبت روشنة واتفرج عليها. هتبقى عامله ازاي .... وتحياتي

---

لا يا حج مبعتش الكورولا انا اقدر اعمل كده من غير ما اقولك
ده انا حتي بفكر فتويوتا بس قدام
وانت عارف منقدرش نغير الهواء فالحياة :ilikeit:

ياباسم. باشا بالعكس. ده تشريفك لينا في القسم هنا عندنا بالدنيا
وانا والله ما معترض على الصناعه الصينية ... بص هما بيعملوا الحجات جميلة لكن ينقصهم شيء مهم جداً. وهو ان كل البلدان بتصنع منتج علشان يعيش ويعيش وتتوارثه الاجيال. بينما. الصين معندهاش الحته دي نهائي عندها ارمي وهات جديد ... دي حاجة. الحاجة التانية. نقطة ذكرتها من ضمن الامثلة الاديدس ... طب ايه رئي حضرتك. انا شاري كوتشين اديدس واحد صيني والتاني اندونيسي الصيني مكملش معايه شوية بصيت لقيتوا وسع وريح على الاخر وهوبا الكليبسة بتاعتوا من فوق فاكيت ده غير الحبل بتاع الفردة اليمين اطول من الفردة الشمال واطريت اقصها بالمقص. .... بينما الكوتشي التاني الاندونيسي مش فاكر ولا فيتنامي. تعاله اتفرج عليه بمكسوا اطحنوا وزي ماهو ... ولو كان فيا صحة كنت رحت لعبة بيه كورة كمان :) .

فالقصد ان حتى لو عنصر الجودة. والكولتي. والرقابة كان عالي على المنتج الصيني. فستظل الصين هيا هيا... كما هياااا لا تهتم بعنصر ان الحاجة تعيش وتتوارثها الاجيال ... وهسئل حضرتك سؤال ليه سور الصين. من عجائب الدنيا السبع رغم ان اي دولة ممكن تبنيه وتعمل اخوه او زيوا واحسن منوا كمان ... لكن ليه بنقول على حتت سور انوا من عجائب الدنيا السبع ...!!

هو من العجائب علشان لسه عايش لغايت دلوقتي ومنهرش ... لذلك اي منتج صيني هيتعمل ويعيش ويقعد صدقني هيدخل موسوعه. جينتس للارقام القياسية ويبقى من عجائب الدنيا التسع اوالعشر .... اتمنى للصين المزيد من التقدم لكن كل انسان تاريخ وكل بلد ليها تاريخ لا يمكن تغيروا بسهولة ... يعني لمن اقول لحضرتك مصر بلد الفراعنه. هتيجي تمشي حضرتك في بلدنا هتلاقي جوى كل انسان مصري حتى لو كان غلبان او حتى سواق توك توك مبتدء هتلاقي جواه فرعون صغنطط كده او حتى نيفرتي تي بيبي كده !! انتا لمن بتلاقي سواق ميكروباص وقف في نص الشارع. هل تفتكر حضرتك انوا مش عارف تعليمات وقوانين المرور ... إستحالة ميعرفهاش لكن بتلاقي الفرعون الصغير الي جواه يشتغل و يقولك. واركن على جمب ليه. لمن ممكن اخود الشارع. كلوا لحسابي واعطل الناس واوقفهم ورايا زي العبيد :) طوابير

فمهما مر الزمن والعصور. المصري هيفضل طول عمروا مصري والصيني هوا هوا الصيني :) .... وتحياتي

والله ان مع كلام العمدة
ان الصين لو عملت شئ كويس وجميل فهو حاجة واحدة
انك يا ا / باســم منورنا فالقسم وبنتكم معاك دي لوحدها كفاية والله حقيقي مش مجاملة
انا مركز معاكوا فالحوار ده لان كفاية ان ياريس وانت موجودين

طبعا انا متابع مواضيعك

من حيث الشكل الاتنين واحد

وانت قلت ان الصينى بيركب من غير ورده ودى ميزه ازاااااااااااى عدت على اليابان ؟؟

اقتباس:

---

المشاركة الأصلية كتبت بواسطة y a r i s

لا هو يادكتور اسم الشارع مش حافظوا بس بص حضرتك
عارف ليلة القدر خليك ماشي على طول لا يمين ولا شمال هيقابلك مبنى الاهرام على يمينك مش كده. خليك مكمل على طول. لغايت ما تلاقي مفرق محطوط يافطة عليه. مكتوب عليها تويوتااا وسهم شمال. هتخش شمال وخليك ماشي بعد كده على طول لا يمين ولا شمال لغايت ما يجيلك مفرق تاني مكتوب عليه. تويوتا وسهم يمين وكده تكون وصلت

المشكلة مش كاتبين على الفاتورة نمرة التيلفون. وانا نسيت اخود منهم كارت ولا حاجة. بس هما الحقيقة ناس محترمة جداً وعجبني فيهم حاجة مهمة. ملقيتهاش في اي ورشة او توكيل تويوتا ذات نفسوا ان لو حاجة مش محتاجة تغير. وانتا رايح تغيرها بيقولولك. سيبها مدام لسه فيها عمر ... ويخيرك لو عاوز تغيرها ولو عاوز تخليها اهي شعاله ولسه هتمشيك ... تاني حاجة. ابن صاحب التوكيل. الي درس في اوروبا وامريكا وراجل متخصص ومهندس وفاهم بيوقف بنفسوا يتابع العملاء ويشرف على الاصلاح وكأن العربية بتاعتك دي عربيتوا ... خدمت الاستقبال عندهم رائعه لكل الناس الابتسامة لاتفارق وجوهم ... واجب الضيافة مجاناً. ده شيء اساسي عندهم حتى لو مش جي تعمل حاجة جي بس تشيك او تسئل سؤال وماشي ... الحقيقة انا واحد من المنتدى هنا زميل قديم نصحني اني اروحلهم وفعلاً لم يخب ظني فيهم ويكفي انهم بيتقوا الله ويراعوا ضميرهم دي عندي بالدنيا كلها ... ربنا يبارك لهم ... وتحياتي

---

تسلم يا فندم جزاك الله كل الخير ... دمت لنا فخرا : )

لو تلاحظ في كلامي يا باشا أني قولت ليك جملة (الرقابة على الواردات) موجودة بره ومش موجودة هنا .. كلامي عن تجارب للمنتجات الصينية اللي بتيجي من بره مش اللي في مصر .. وأكاد أجزم أنها تضارع المنتجات الأوروبية والأمريكية .

نيجي بقى للتصنيع (أي حاجة) .. أكيد لما بطلب منتج بمواصفات معينة هما بيطلعوه بنفس المواصفات .. ولكن أثناء التصنيع ممكن يحصل ديفوهات فبتخرج عن المواصفات المطلوبة .. هل الحاجات دي تترمي ؟! لا مبتترميش بيشوفولها البلد اللي تقبل أي مواصفة .. والرك في الأساس على المستورد اللي بيجيب الحاجة .. وعلى الدولة اللي بتسمح بأي مواصفات .. كنت سعيد جداً بأنهم من فترة كانوا حيطبقوا مواصفات قياسية مصرية في الاستيراد بس مش عارف الموضوع نام ليه .
من واقع ناس مستوردين أعرفهم .. لما بتروح الصين .. وعاوز مثلاً تستورد فلاشة بشكل معين ومواصفات معينة .. حيقولك أعملك نفس الشكل بسعر كذا وكذا وكذا .. طبعاً المستورد المصري بيختار أقل سعر ويبيع بأعلى سعر .. يبقى العيب في مين ؟!

بس مهما كانت الظروف فيه معطيات تانية بتتحكم في جودة المنتج ووكيل البراند نيم في الصين اللي مش حيقبل المنتج بتاعة إلا إذا كان بجودة معينة .

أرجو أن تكون وصلت وجهة نظري .. وسعدت بالحوار معاك يا باشا .

انا اشتريت فلتر من تويوتا القاهرة الجديدة وكان مكتوب علية صنع فى الصين ب ٦٥ جنية
ولما رحت أغير الزيت عند واحد بتاع زيوت لقيت عندة نفس الفلتر تويوتا ومكتوب علية صنع فى اليابان وب ٤٥ جنية ؟؟

ولما سألت الصنايعى قالى كل الفلاتر صيني بس مكتوب عليها صنع فى اليابان !!!!!
وهنا تيجى لنقطة الرقابة على الواردات زي ما الزميل قالها فى مشاركة قبل كدة

اعتقد الفيصل فى الموضوع ان احنا نقطع فلتر مكتوب علية صيني ونقطع فلتر مكتوب علية يابانى ونقارن بين الفلترين من ناحية نوع الحشو