ثلاثه اسئله فى سؤال واحد . وأرجو المساعده

**عمرولبيب** · 06-02-2014 07:26 PM

بسم الله الرحمن الرحيم

السياره لانوس 1 موديل 2000 اللون شامبين عامله 180 ألف كيلو
مشتراه منذ اسبوعين ..

تم تنظيف الرشاشات وبالمناسبه فيها رشاشات اكسنت . وتغيير الزيت .. وفلتر الهواء والزيت .. وبأمون 92 .. وسير الكاتينه تمام والسيور تمام زى مالميكانيكي كشف عليها وقال عليها تمام

اليوم قمت بتغيير أويل سيه علبه الدريكسيون لانه كان بيسرب زيت الباور فى الدواسه .. والغربيه بقى انى اشتريته من عند واحد مشهور وجابلى نوع غريب وسعره 10 جنيه وقولتله هات النضيف قالى مافيش عندى انضف من دا

العجيب والغريب انى روحت للعفشجى علشان يركبه الاقى الاستاذ رفع جمب العربيه ورفع الجمب التانى وحملهم على قوايم وبيفك فى مسامير العجل وهينزل المساعدين وشويه وكان هينزل الكبوت بصدر العربيه باللى فيه على الارض .. هووووووووووووب فى ايه ياعم الاسطى بتعمل ايه .. يقولى علشان اركب الأويل سيه ياراجل ازاى دا بيتركب من جوه من الكابينه يقولى علشان انزل الدريكسيون ومش عارف ايه .. اخدته من ودنه وجبته قدام الطاره وقولتله هات لقمه وفك المسمار كذا وكذا وكذاوبعدين دق بشاكوش ع الأويل القديم هيتنطر وركب الجديد وقفل .. قالى حاضر ياستاذ وركبه زى ماقولتله بالظبط وكملت زيت البور للعلامه بتاعته وتوكلت على الله
طبعا الفضل الاول والاخير للمنتدى واعضاءه اللى شارحين تركيب الاويل سيه كامل مكمل على المنتدى وشكر خاص جدا لجميع الاعضاء أولهم الاستاذ محمد ممدوح والاستاذ سمير
( للعلم انا اول مره اشترى عربيه والحمد لله واول مره اسوق لمسافات واول مره اشوف الميكانيكا والعفشه رغم ان الوالد راس كبيره فى قطع غيار السيارات ومهنته الاساسيه )

عديت بقى على السمكرى الله يجازيه خير شكله فاهم يانصه العربيه هتحتاج شغل الاماكن المعضعضه دى والبارومه هتتكلف قد ايه .. (طبعا اخوكم محامى والبلد عندى كلها عرفانى ) قالى ياستاذ العربيه مأقدرش احدد مش يمكن اعمل حاجه تطلع جديد غيرها ( قولتله طيب سيبها على الله لما انوى هاجيلك )

وبالمره كانت العربيه مزودها ميه عاديه من تلات اربع ايام وبابص فيها النهارده لاقيتها نزلت شويه كملتها واتضح ان غطاء القربه بينفس

وعديت على البوهيجي قالى العربيه هاتتكلف رش بالمون كله معادا السقف بـ 1200 جنيه قولتله طيب لو جبت المون قالى مش هانختلف ياستاذ 500 جنيه مصنعيه برقتله كدا قالى لما تيجي ياستاذ عمرو هانبقى نعملها ببلاش ضحكت ومشيت

بدايه انا ناوى اغير قربه المياه ( المطلوب سعرها كام ) بتاع الريداتيرات قالى 65 والغطا بـ 35 قولتله الناس بتبيعه فى التوفيقيه على 45 القربه والغطا المانى بـ 25 وشه جاب ألوان .. هل السعر مازال زى مانا قولت ؟؟؟

ازاى اعرف ان قربه الميه دى كويسه والغطا كويس واجيبه منين فى التوفيقيه ؟؟

انضف ميه خضراء الاسبانى ولا السعودى ؟؟.. وهل اجيب ابرو معاها علشان انضف دوره التبريد كامله ام لا ..؟؟ وياريت سعر الميه والابرو والمصنعيه كام تركيب القربه واخراج الهواء وتغيير وتنظيف دوره التبريد ؟؟

سعر اكصدام امامى لانوس 1 واكصدام خلفى لانوس 1 ... الفبر فقط اللى بره وياريت الحشو معاه يعمل كام ؟؟

عندى بقى صوت تصفير اثناء بدايه الدواره .. وبيروح على طول بعد ثانيتين او تلاته .. طبعا سير الدينامو عايز يتشد .. الميكانيكي شده ويومين ورجع صفر تانى .. المفروض اعمل ايه ؟

أسف على الإطالة

**مصطفى-حسن** · 06-02-2014 10:03 PM

بالنسبة لصوت الصفير دة سير مهوى وغالبا بتاع التكييف ولو معاك مفتاح 12 و17 هتشدة بنفسك

بالنسبة لموضوع المية متحطش اى مية دلوقتى لحد ما تتأكد ان العربية مبتنقصش مية لان اى علاج فى دورة المية معناها ان المية الغالية اللى انت هتحطها دلوقتى هتترمى على الارض (اصبر شوية)

وبما انك جايب العربية جديد فأجل موضوع الدوكو لانك كل يوم هتكتشف حاجة فى العربية فيوم ما تحب تعمل دوكو وسمكرة تكون خلصت كل حاجة فى العربية

والف مبروك العربية الجديدة

**عمرولبيب** · 07-02-2014 01:12 AM

شكرا لااستاذ عصام بك غنايم وشكرا للاستاذ تراس
بس ممكن الاسعار لكل اللى قولت عليه فى الاسئله
انا هاسيب موضوع السمكره دا شويه برضو على دخله الصيف ولا حاجه
اما بالنسبه لمياه بتاعه الريداتير هابقى انزل ابص عليها بكره وهى بارده لو نقصت يبقى لامفر من الاسبانى اللى قال عليه الاستاذ نراس ونببدأ ننضف دايره التبريد كامله
ومعلش لو فيها رخامه سؤال زياده
هو الدخنه البيضا عندى جت مره وروحت نضفت رشاشات وبعدين غيرت فلتر بنزين
والنهارده بعد مشوار لف كدا وسط البلد وموقف العربيه الدخنه كانت بيضا برضو وخفيفه شويه بس ريحتها مش بنزين ولا كلام من دا ..؟؟ عايزه تنضيف تانى ؟؟