موضوع للمناقشه والتصويت .. ايه رأيكم في نجيب ساويرس

**meza** · 28-09-2008 06:15 PM

***

مشاركة خطأ

**سمير يونس** · 28-09-2008 07:48 PM

المشاركة الأصلية كتبت بواسطة meza

إذا كان ده رأيه فهو حر فيه ... زى ما كل واحد حر فى رأيه .... و هو إنسان و من حقه يبقى ليه أرائه الخاصة بيه زى ما حضرتك من حقك برضه يبقى ليك أرائك الخاصة بيك .... و برضه ليك حق الرد على أى حد .... لكن مش من حق حد إنه يحجر على أى رأى.

أنا أؤمن بحرية الرأى ... و أى حد يقول رأيه .. حتى لو الرأى ده جرحنى ... مقدرش أسلبه الحق ده ... ممكن أنتقضه ... لكن أمنعه !!! مقدرش.
.

لأ طبعاً هو مش حر في رأيه لأن الأمور الدينية مفيهاش أراء و خصوصاً لو كنت بتكلم عن دين الأخرين

و إن كان و لا بد إنه يعبر عن رأيه في الدين فممكن يعبر عن رأيه في دينه هو و بس و غير كدا نقول له لحد هنا و أقف لو سمحت

و بعدين ده مش رأي ده هجوم على دين الأخرين و هذا غير مسموح بيه إطلاقاً

يعني هتكون مبسوط يا Meza لو عملنا برأيك اللي أنت كاتبه فوق و عبرنا عن رأينا في أمور تخص الدين المسيحي ؟؟ أكيد طبعاً مش

هتكون مبسوط

و لازم طبعاً نعامل الناس مثلما نحب أن يعاملونا بيه

تقبل تحياتي

**meza** · 28-09-2008 09:14 PM

بص يا أستاذ سمير .... أنا زى ما قلت قبل كده أنا أؤمن بحرية الرأى و أقبل أى رأى و مش هغير كلامى ....
حتى لو حد هيقول رأيه فى دينى .. فدى حريته ... أنا مقدرش أمنعه ... أو أغير مبدأى بإن حرية الرأى مكفولة لأى إنسان ... و أنا برضه عندى حق الرد على أى رأى شايف إنه مش مظبوط.

بس قوانين المنتدى هنا لا تسمح بالمناقشات فى الأديان.

لكن تأكد إنى بقبل أى رأى ...

بالنسبة لساويرس .... هو متكلمش فى فرضية الحجاب .. اللى هو أمر دينى بحت ... لكن هو قال إن شكل المجتمع إتغير ... و هو مش عاجبه الحال الجديد ده .. هو حر يقول اللى عايزه ... حضرتك لقيته مثلاً قال الحجاب ده حرام؟!!! ... هو مقالش كده لأن ده موضوع دينى ميخصهوش ...

**********
عامة ... أنا لو هقول رأيى فى الحجاب .. فأنا ما دام مؤمن إنى حر .. من حقى ألبس اللى أنا عاوزه ما دام مأذيتش غيرى .. فبرضه غيرى ليه نفس الحرية دى ...
بمعنى آخر مبحبش الكيل بمكيالين.

ده رأيى الشخصى.

**meza** · 28-09-2008 09:24 PM

و إن كان و لا بد إنه يعبر عن رأيه في الدين فممكن يعبر عن رأيه في دينه هو و بس و غير كدا نقول له لحد هنا و أقف لو سمحت

معنى كلام حضرتك ... إن لو مش مصرى مش من حقى أقول رأيى فى مصر و لو مش أمريكى مش من حقى أقول رأيى فى أمريكا و لو مش دكتور مش من حقى أقول رأيى فى الطب و لو مش وزير مش من حقى أقول رأيى فى الحكومة ولو مش يهودى مش من حقى أقول رأيى فى اليهودية وكذلك لو مش مسلم أو مش مسيحى؟!

كل واحد يا أستاذ سمير أكيد كون بعض الآراء عن أى حاجة هو يعرفها ..... و نشر الآراء دى من حقه ... كون إن فى ناس مش بتقبل حد يقول رأيه فى أشياء معينة تخصها ... فده شىء أنا شايفه معارض لحرية الرأى.

معلش هو إحنا خرجنا شوية عن الموضوع الأساسى ..... بس هو فعلاً فيه وجهات نظر متباينة كتير عن حرية الرأى و ما هى حدوده .. محتاجة مناقشات كتير.

تحياتى أستاذ سمير :)

**hazem_khidr** · 28-09-2008 10:19 PM

يا جماعه احنا بنتكلم عن راجل اعمال
ايه اللي دخل الدين دلوقتي؟؟؟
لو سمحتم هدوا النقاش شويه و اتكلموا عنه كرجل اعمال فقط
بالنسبه لكلامه عن الدين ربنا يحاسبه مالناش علاقه

**meza** · 29-09-2008 03:42 AM

المشاركة الأصلية كتبت بواسطة hazem_khidr

يا جماعه احنا بنتكلم عن راجل اعمال
ايه اللي دخل الدين دلوقتي؟؟؟
لو سمحتم هدوا النقاش شويه و اتكلموا عنه كرجل اعمال فقط
بالنسبه لكلامه عن الدين ربنا يحاسبه مالناش علاقه

أنا أسف يا حازم باشا ... أنا مكنتش أقصد أحول الموضوع لإتجاه آخر .. بس أنا إتكلمت على إن حرية الرأى من حق كل واحد ... بس فالموضوع مشى كده.

خلاص يا جماعة متوقفوش الموضوع ...... ممكن تقولوا رأيكم فيه أو تنتقضوه و تنقضوا آرائه براحتكم ...... بس بلاش حد يقول مش من حقه يقول رأيه عشان عندى حساسية من الموضوع ده ... :D

**sayedwaly1970** · 29-09-2008 04:46 AM

وانا كذالك لااحبه لنفس السبب لانه هاجم الحجاب

**Karim_Monir** · 29-09-2008 05:11 AM

طيب كويس كلنا قلنا راينا فيه من ناحية الحجاب
يا ريت بقى نرجع لاصل الموضوع عشان دفة الموضوع ما تتغيرش
ويتقلب لنقاش ديني وتلاقوة اتقفل لانه قرب من التابوهات الثلاث
الدين - السياسة - الجنس
اي كدة اتكلمو في اي حاجة
دي نصيحة شخصية من واحد قديم في المنتديات

كل سنة وانتم طيبين

**sab3aawy** · 29-09-2008 02:29 PM

المشاركة الأصلية كتبت بواسطة wawoo

يا سبعاوى , العراق لما بدء سويرس يشتغل فية كان فى مخاطرة عالية جدا, و كل اللى بيسافر يشتغل هناك بيتم تحذيرة من هذة الخطورة و بيمضى اساسا على اقرار بالموافقة دى, و مش بس كدة , كمان المرتب بيكون مختلف لتحمل هذة الخطورة , و هوة يشكر طبعا انة اعاد المهندسين اللى اختطفو لكن الموضوع لة جانب اخر برضو , لانة لو مكانش عمل كدة و مكانش تحرك بسرعة لتحرير المهندسين دول , كان تانى يوم جميع العاملين فى العراق و الدول المشابهة فى الخطورة كانو حيفكرو الف مرة قبل الاستمرار فى مهمتهم , دة غير انة مش حيلاقى حد يروح تانى هناك اساسا .
دة غير ان فى شركات كتير رفضت انها تشتغل فى العراق و الدول المشابة فى الخطور للاسباب الامنية دى , عشان كدة هوة كان بيدخل و يفوز بالعقود دى .
دة غير طبعا انة لو مكانش عمل كدة كان الاعلام بقى حيشتغل و اسر المخطوفين مكانوش حيسكتو اساسا , يعنى باختصار الموضوع كلة بيصب فى مصلحة البيزنيس بتاعة و الواجهة الاعلامية بتاعة و تجنب اى شوشرة او تاُير سلبى عليها .
انت بتتكلم فى بيزنيس واستثمرات بالملايين , يعنى اساسا فى تحت يدة مستشارين و خبراء اقتصاد واعلام و من كل لون كان, و بتكون النصحية على اساس اقتصادى و اعلامى , يعنى مش مجرد جدعنة .

اخى العزيز، مصر كلها مش ساويرس بس بتشتغل فى العراق وليبيا وسوريا والسودان وباكستان وهو ده اكل عيشنا اللى البلد عايشة عليه، لكن كام واحد لما اتأذى له موظف فى البلاد دى عمل معاه كدة؟ بلاش كدة، لما مصرى بيتأذى فى اى بلد من البلاد المجاورة، سفارتنا الموقرة بتعمل فيه ايه. المصريين تحت ضغط الحاجة بيشتغلوا فى اماكن خطرة وبيهاجروا فى مراكب شراعية و بيحاربو فى جيوش بلاد غير بلادهم، ولو مكانش ساويرس رجع المخطفوين او كرم المتوفى كان برضه هيلاقى اللى يقبل يشتغل فى البلاد دى امام المرتبات الكبيرة المعروضة ، لذلك انا ما زلت شايف لمحة انسانية -بجوار البيزنس- فى تصرفاته