..:: تقرير عمل دواسة جلد وفرش جلد للكورولا 2014 ::..

**abofandy** · 07-02-2014 06:11 PM

بسم الله الرحمن الرحيم

كعادتنا في منتدانا الجميل

(( نيل موتورز ))

بصفة عامه وفى قسم تويوتا بصفة خاصة وكل مرتادى ومالك الوحش اليابانى

(( كورولا 2014 ))

نوفيكم بالتقارير اللازمة للسياره بكل ما تحمله من مميزات وعيوب

طبعا الف مبروك لكل المالكيين الحالييين والى لسة هيستلموا

ومبروك على التعديل سواء الناس الى استلمت متعدله او الى زى حالتنا في انتظار التعديل

النهاردة الجمعة 7/ 2 / 2014

وزى ما انا معودكم ان يوم الجمعة بيبقى يومى مع الكورولا

والنهاردة جايين بعمل دواسة جلد وفرش جلد بس الفرش مش تفصيل وجاهز

لكن مش اى فرش رحت جيبته انا عملت فرش جاهز ولكن بعد رفع مقاسات للعربية والكراسى

علشان الفرش الجاهز من عيوبة انه مش بيبقى مظبوط مية مية على الكراسى ومن ميزاته انه مفيش تخيط في فرش العربية الاصلى والتثبيت بيبقى بدبل حديد ماسكه في الجلد وحديد الكرسى ..

نبدا نتكلم الاول على الفرش :

..:: الفرش ::..

طبعا السوق مليان بالفرش الجلد ومتنوع واسعار كتيرة اوى انت تحتار

المهم الجلد انواع

فية الصينى وفية الامريكى وفية الالمانى وانا مش خبير اوى ازاى افرق بينهم

المهم فية مصنع بيصنع الفرش على قد العربية بالضبط وهو معروف ومشهور عندنا في المنصورة

وكان قدامى الخيارت بين الجلد الى كان متوفر

هو الصينى وكان فرش العربية هيتكلف 350

والامريكى وكان فرش العربية هيتكلف 650

والكلام دة بدون التركيب طبعا ... شوفت الاتنين فرق كبير بصراحة بين الاتنين في الملمس والخامه توكلت على الله وبدات في اختيار الالوان (( ودة بتختلف ذوقيا ))

انا العربية عندى فضى ميتالك والفرش اسود

يعنى قدامى خيارات كتير : من فرش اسود ساده ... فرش اسود في فضى ... فرش فضى .. والجديد ان ممكن اعمله زى فرش الهاى لاين وهو جلد وفية قماش ونفس القماشة الى بتنزل في الفبريكه ..وشوفت معمول قدامى احد العملاء كان طالبه وروهولى

بس مرتحتش اوى لانه هيتغلبنى في التنظيف وكدة فتوكلت على المولى تعال واخترت الاسود السادة والغرز بيضاء (( متنسوش الفرش هيبقى جاهز بس انا بختار الخامه ولون الغرزة فقط ))

وبعد ما استقريت انه اخليه اسود سادة والصور ستاتى تباعا

النقطة التانية في موضوعنا وهى

..:: الدواسة الجلد ::..

- سمعت كلام كتير اوى من ناس بتخوفنى من موضوع الدواسة علشان فك الكراسى

وسمعت كلام تانى كتير تنصحنى بعمل دواسة جلد علشان تحمى موكيت العربية وتبقى سهل في التنظيف .. استخرت المولى عز وجل وقولت اتوكل على الله واجرب في نفسى مش مشكلة

- طبعا حركه توجع القلب الحزين لما بتشوف الكراسى بتنزل من العربية والعربية بتتفرط قدامك دى الى كان راعبى بصراحة ومتخوف منه ولكن ... العربية تروح لحد فنان بيعرف يشتغل فاهمة شغلة متقلق منها ابدا وكل حاجة بترجع لوضعها زى الاول

- الكل متشوق يشوف الصور اكيد بس نتكلم على اختيار الجلد ودة الى انصح بيه اى حد يعمله بعدى ان يختار الجلد بتاع الدواسة نفس نقشة الفيبر بتاع العتب بصراحة هى حاجة هايفة بس بتفرق بطريقة فظيعة بتحس ان الجلد والفبر نقشة واحدة متقدرتش تفرقهم عن بعض ويديلك احساس ان العربية نازله بيه

- التقيييم للتنظيف بعد ما تركب الجلد .. حاجة تانية وانصح اى حد يركبه بس عند حد يكون بيفهم مش لازم يكون اشتغل في العربية دى قبل كدة ولكن يكون شغال في زيرو وفاهم هو بيعمل اية وبيشيل اية

- طبعا الراجل زهق منى من كتر ما انا بقولك خلى بالك .. رجع كل حاجة زى ما هى ... اوع تجرح فبره او مفيش حاجة تبات في مكانها ... لدرجة انه قالى هات مفتاح العربية وروح عيادتك ولما اخلص هرن عليك بس على مين حد يسيب معشوقته في ايد حد غريب ويبقى مطمن .. على ايده لحد ما اخلص والعيادة اتقفلت في اليوم دة هههههههه

- بعد ما خلص جربت العربية على طريق سريع وجريت بالعربية ومشيت في ارض مش مرصوفة ومطبات علشان على الله اسمع صوت تزيقة كرسى او مسمار او اى حاجة كنت دبحته والحمد لله مفيش اى حاجة من الى كانت مخوفانى خالص

نبدا بالصور بقى ونبطل كلام انا عارف انا اتكلم كتير بس انا رصيدى عندكم يسمح بالرغى

((( الصور )))

دى صورة بعد فك الكراسى الامامية والخلفية ممنوع لاصحاب القلوب الضعيفه هههه

دى صورة تانية من ناحية الشنطة بعد الفك مباشره

ودى صورة اخرى بعد الفك .. اوع قلبك يقع زى جمد قلبك بس هههه

ودى صورة بتبين شكل الدواسة من الخلف بعد ما ركبت

ودى صورة بتوضح شكل الكرسى والفرش

ودى صورة بتبين بعد تركيب دوسات تويوتا

ودى صورة الشنطة بردة عملت ليها حته جلد

والجهاز دة كومبرسيور مية لغسيل السياره وشوية تراب لان كنت فصلت شحن بعد الغسيل بس كله فداكى يا كرولتى

**abofandy** · 07-02-2014 07:11 PM

ودى صورة الشنطة بردة عملت ليها حته جلد

والجهاز دة كومبرسيور مية لغسيل السياره وشوية تراب لان كنت فصلت شحن بعد الغسيل بس كله فداكى يا كرولتى

ودى صورة للكنبة الخلفية بعد فرش الدواسة الجلد وفرش دوسات تويوتا

في النهاية

عايز اقول لكل الى كان متردد من ارتفاع العربية .. تم تعديلة في الدفعات الى بتستلم والى استلم بدات قطع الغيار توصل المخازن

وكل الى متردد من عمل دواسة جلد .. اتوكل ع الله بس شوف ناس بتفهم وبتحافظ ومتقلقش من اى حاجة

دمتم بخير ونشوفكم بتقرير جديد ان شاء الله

**abofandy** · 07-02-2014 07:16 PM

اشكرك اخى الفاضل
نورت الموضوع ويارب تعم الفائدة على الناس كلها

**abofandy** · 07-02-2014 07:16 PM

ربنا يباركلك فيها ياباشا وشغل ما شاء الله حلوة اوى

الله يخليك يا حبيبى
تسلملى يارب

**abofandy** · 07-02-2014 07:59 PM

متألق كعادتك والله يا دكتور:ta_clap[1]:
ما شاء الله تقرير ممتاز وصور ولا أجمل..أما بالنسبه للعربيه بعد التعديل بإختصار amazing
ما شاء الله تبارك الله ربنا يحفظهالك ويحفظك من كل مكروه

أنا علشان هاي لاين الفرش عندي نصه جلد ونصه قماش وحرام لو غطيته لأن شكله حلو
أما بالنسبه للدواسات فجاري التنفيذ

وهزود عليها ان شاء الله فرش جلد للشنطه علشان أهلي غاويين يحطو فيها لبن سايب لما بنروح البلد

احمد باشا انت تعرف معزتك في قلبى
فلك منى كامل الاحترام لشخصك الكريم اولا

ثانيا /: اشكرك على كلامك الجميل و دعائك الاجمل
ثالثا /: الهاى لاين مش محتاجة فرش بس خلى بالك من القماش الى في النص لان بيتسخ بسرعة نظفة بصفة دورية
رابعا / : بالنسبة للدواسة اتوكل على الله حتى تكتمل شكل العربية عندك وزى ما قولتلك نقى الجلد نفس نقشة الفيبر زى ما انت شوفت يديلك احساس ان مفيش اى حاجة غريبة على العربية

خامسا / : انت ماخدتش باالك بس من الشنطة عندى انا عاملها جلد برضة يا حبى بس قالب وش الجلد لتحت بس فدة ادالك احساس انها مش متركبها ولكن هى متركبه يا حبى