الموضوع: تجربة واقعة مع الاسبيرانزا A620

السلام عليكم و رحمة الله و بركاته
هذا أول موضوع صر يح لي بالمنتدى و أحاول من خلاله أن اكون عضوا ذو مشاركة ايجابية بالمنتدى الذي احترمه و أقدر أعضائه جميعا.
اشتريت سيارتي الاسبيرانزا a620 في شهر 9 / 2007 بعد بيعي لسيارتي الأوبل استرا الألماني موديل 2002 مباشرة. المبلغ اللي كان معايا بالضبط كان 110000 ألف جنيه و كنت ر افض موضوع التقسيط نهائيا و قلت أشتري في حدود المبلغ اللي معايا وبس. طبعا الاسبيرانزا الكبيرة كانت بتدور في فلك نفس هذا المبلغ و تحديدا 108000 جنيه. طبعا الوسع الداخلي و الكماليات الكتير و فتحة السقف و الشاشات كلها كانت مغريات بالنسبة لي و طبعا لما سألت عليها الكل مافيش حد قال معلومة سيئة عدا كونها صيني و أن معظم المشاكل التصنيعية مرتبط بالموديل الصغير فقط منها A560 .
بعد حسم قرار الشراء لصالحها بدأت طبعا استشعر فارق الوسع و الموتور القوي و التكييف جيد جدا قياسا بالأسترا الى جانب الصيانة الرخيصة و المعقولة و لكن بعد 40000 كيلو من السير بها داخل و خارج المدينة ، اليكم ملاحظاتي عليها لافادة الجميع بما يرضي الله :

1- صوت الموتور عالي جدا و مسموع داخل الكابينة جدا.
2- حرارة شديدة صادرة من تحت الدركسيون و تختفي فقط بعد تشغيل التكييف لوجود مشكلة في بلف الساخن كما قيل لي بالتوكيل الى جانب أن عزل الموتور عن الكابينة سيئ جدا.
3- تقفيل الأبواب بدأ في التخبيط مع المطبات و الزجاج الكاوتش بتاعه سيئ لدرجة اته بيمنع الزجاج من استكمال مشواره حتى الأعلى أحيانا كثيرة.
4- المساعدين الخلفيين ناشفين لدرجة أنه مع أي مطب اللي راكب ورا بينط لفوق يلمس السقف و بعدين يستقر على الكنبة الخلفية تاني.
5- عملت ظبط للزوايا 5 مرات خلال سنة و برضه ماتظبتش لغاية مابعت العربية.
6- طول العربية 4.8 م بدأت احس بمشكلته عند احتياجي للركن.
7- الفرامل سيئة حتى مع التيل الجديد زيرو المتغير و طبعا موضوع ABS اللي فيها عبارة عن لعبة كبيرة - شوية خبط تحت في العفشة لزوم الاحساس فقط بدون تأثير فعلي يعني.

استمرت السيارة معي لمدة سنة حتى 15-9-2008 الماضي عندما وصلت لدرجة نفسية صعبة في تقبل السيارة بهذه الملاحظات ( لاحظوا اني نازل من استرا الماني يعني تقفيل و عفشة و كله تمام )و تخيلوا حضراتكم سعر السوق لسيارتي كان كام بعد سنة واحدة من الشراء و 40000 كيلو بدون خدش واحد في البوية و بها زينون كوري hid و صيانة كل 10000 كيلو بالتوكيل و باقي بها ضمان سنتين لسه الى جانب رخصة سارية لمدة سنة اضافية حتى 9 / 2009 كل ده جابلي بس كام 71000 جنيه فقط تخيلوا من 108000 جنيه بنسبة خسارة 34 % في سنة و عرفت انه لو كان الكيلومتر أقل من كده كنت آخد 75000 فقط كأعلى سعر ليها حاليا في السوق. معلومة : سعر ابو الفتوح اليوم 27-9-2008 = 115000 ج

على الرغم من تلك الخسارة الا انني اصريت على البيع بالسعر ده لأني عارف انه بعد سنة كمان السعر هاينزل كمان + استهلاك العربية كمكونات هايزيد.

الخلاصة :
السيارة جيدة لمن يبدأ بها كأول سيارة و لم يستشعر طعم الياباني أو الألماني في القيادة و ظلمها جدا التقفيل المصري ليها. نصيحة خالصة للي مصر يركب صيني يبقى آخره الاسبيرانزا الصغيرة لأن مويل 2008 خالي من العيوب بنسبة كبيرة و كمان الخسارة فيه مش عالية زي الاسبيرانزا الكبيرة. و لو عاوز نصيحتي بلاها صيني خالص و اشتري كوري أحسن بالمبلغ اللي معاك سواء 68000 أو 115000.
أنا جاهز لأي تعليق و يعلم الله أني لم أسرد سوى الحقيقة تماما و ماحدش بيتعلم ببلاش.
و السلام عليكم و رحمة الله و بركاته.

محمد حمدي