الموضوع: مشواري في تعلم السواقة "أ-ب-ت" سوا سوا

ليه مش كملتوا الموضوع ما شاء الله حلو قوووي

ه النهاردة كان يوم تاريخي يا شباب .. امتحنت في السواقة ونجحت الحمد لله وهستلم الرخصة اﻷسبوع الجاي بأمر الله ... هبدأ أكتب كل اللي حصل معايا في مدرسة السواقة طوال الشهر .. وهحكيلكم عن اﻷخطاء اللي حصلت النهاردة لناس سقطت لﻷسف فاستنوني اﻷسبوع الجاي عندي تدريب وامتحان هخلصهم وأحكي كل حاجة ..... وبجد أنا فرحان أنكم استفدتم من كلامي وهحاول أفيد أكتر وربنا يوفقني لكدا

مبرووك الرخصة

المشاركة الأصلية كتبت بواسطة أسامه الحسيني

مبرووك الرخصة

الله يبارك فيك يا رب .. تسلم ^_^

الدرس الثالث

سريعاً سريعاً كدا هقول الأخطاء اللي حصلت قدامي في إمتحان السواقة عشان ما أنساش حاجة منها بعد كدا .. واعتبروا دا درس تحضيري للمستقبل يعني هنبقى نرجعله إن شاء الله ^_^

أنا طبعاً اشتركت في مدرسة السواقة بتاعت المرور بعد ما كنت رحت لمدربين بره المدرسة بس ماعجبنيش لأنه كان غلط معايا غلطتين كدا فما اقتنعتش بيه كمدرب سواقة .. وبصراحة أنا اتعلمت إن مش شرط اللي بيعرف يسوق كويس يكون مدرب سواقة كويس -_-

المهم أنا عشان مشترك في مدرسة السواقة التابعة لمرور المنصورة بيتم إعفائي من إمتحان الكمبيوتر نهائياً وبأمتحن سواقة فقط .. ودي إمتحانها عباره عن 6 قراطيس بيتم توزيعهم .. يعني قرطاسين ورا ع الشمال بعدين قرطاسين ف النص ع اليمين بعدين قرطاسين قدام ع اليمين

يعني زي الشكل دا كدا

................#....... #..........


........#....... #.........


................# ...*... #.........

بإعتبار إن علامة ( # ) هي قرطاس .. و إن علامة ( * ) هي نقطة بدايتك في الإمتحان بالعربية بتطلع لغاية قدام بين القرطاسين بعدين بترجع تاني بين القراطيس لغاية ما توصل للنقطة اللي بدأت منها تاني

----

بنمتحن كل 15 على عربية وبيكون فيه واحد راكب جمبك ف العربية قدامه دركسيون وعند رجله فرامل ..

أول واحد في الطابور بتاعنا دخل امتحن عدى بين القراطيس لغاية آخر قرطاسين وبعدين جاه يدوس دبرياج وفرامل فغلط وداس بنزين فسقطوه .. وعمل نفس الحركة دي واحد تاني برده

واحد تالت وقت رجوعه خبط آخر قرطاس اللي ع الشمال ووقعه تحت العربية برده سقطوه

------

هعرفكم طريقة النجاح في الإمتحان دا بسهولة جدا إن شاء الله وللعلم أنا عرفتها وقلتها لواحد كان بيغلط كل مرة في آخر قرطاس ولما عرف الطريقة مني بقى يعملها كل مرة صح ^_^ الحمد لله

-----

أخيراً
ملحوظة صغنتتة عشان الناس اللي بتتعلم جديد .. ماتخافشي من الفيتيس وخد النقلة بتاعتك كويس وللآخر لأن فيه ناس بدل ما تاخد النقلة الأولى بتاخد نقلة تالتة للأسف فالعربية تبطل منها كل ما تيجي تطلع ..
بمعنى تاني " دلوقتي أنا عملت كونتاكت للعربية ودورتها خلاص ...
الفيتيس زي ما اتعلمنا بيكون في النص اللي هو وضع المور ..
ببدأ أنا أدوس ع الدبرياج للآخر برجلي الشمال وبعدين أديله النقلة الأولى اللي هي بآخد الفيتيس للجنب ناحيتي بعدين لقدام (ففيه ناس مش بتاخده للجمب للآخر فعلا وبتقوم طالعة قدام فالعربية تاخد النقلة الثالثة ودا بيخلي العربية تبطل منك كل ما تيجي تطلع حتى لو بتشيل رجلك بشويش من ع الدبرياج) ..
بعد ما بآخد النقلة وأنا رجلي ع الدبرياج بأثبت كعب رجلي الشمال في الأرض ..
بعدين ألمس برجلي اليمين ع البنزين وأدوس دوسة خفيفة خالص ...
أبدأ أرفع مشط رجلي الشمال من ع الدبرياج وأنا مثبت كعب رجلي وعيني ع وش العربية ..
أول ما العربية تمشي خطوتين تلاتة كدا بأقوم شايل رجلي خلاص من ع الدبرياج ..
وكدا أبقى أنا طلعت بالعربية خلاص "

طيب افتراضاً أني عملت كدا بالظبط والعربية كل مرة تبطل مني بعد ما أطلع بيها خالص فمعناها إني مدي النقلة غلط ومديها السرعة الثالثة مش السرعة الأولى فلازم أرجع أمور تاني وأنا ضاغط ع الدبرياج طبعا وبأعدين أديها السرعة الأولى

----

دا درس سريع وهنشرحهه بأهدى من كدا إن شاء الله كمان

----

ملاحظة يا أسامة :
عشان تحفظ أبعاد العربية لازم تخرج مع نفسك الصبح بدري بعد الفجر كدا كذا مرة وتاخد على عربيتك مش هتعرف تحفظها إلا بأنك تاخد عليها ....
يعني مثلا بعد الفجر الدنيا بتبقى هادية فأنت تنزل وتبدأ تشوف العربية أبعادها إيه بأنك كل شوية توقف العربية وتنزل تشوف أنت كان باقيلك قد إيه وتخبط وهكذا لغاية ماتحفظها خااالص .. مالهاش حل إلا كدا

موضوع رائع جدا وبجد ربنا يبارك فى مجهودك ووقتك ويسهلك طريقك دايما ،متابع وباهتمام

ربنا يبارك في مجهودك ,,,,, احب اقولك اني بذاكر معاك خوه خطوه لدرجه اني لقيتني بحرك رجلي وانا باقرأ الكلام هههههههههه