الموضوع: مشواري في تعلم السواقة "أ-ب-ت" سوا سوا

بسم الله الرحمن الرحيم

أنا لسه منضم جديد للمنتدى و لسه جديد جداً في موضوع العربيات كله سواء معرفة أنواعها ولا بتمشي إزاي العربيات دي أساسا ...

بصراحة مابدأتش أنتبه للموضوع دا إلا في وقت تخليصي للكلية وإن مشاويري هتزيد الفترة الجاية بحكم شغلي بأمر الله كطبيب وكمان دا أنسب وقت في رأيي إني أتعلم حاجة جديدة زي كدا خصوصاً إن فترة الإمتياز بتبقى فيها وقت كتير ولسه ما اتشوحتش في الجمهورية عشان التكليف

المهم ,,
حبيت أشارك معاكم كل حاجة هعرفها جديد بأمر الله في موضوع تعليم القيادة وهخليها على خطوات زي بالظبط ما بدأت أفهم الخطوات دي واحدة واحدة لأني بأمانة ماكنتش أعرف أي حاجة فعلا زي كتير من الناس بيتهيألي .. وهحاول أخليها على شكل قصة يعني

أول حاجة
كنت بأجرب العربية الجديدة مع صاحبي وبعدين قالي " شغل العربية " يعني اعملها contact فطبعا حطيت المفتاح في مكانه اللي ورا الدركسيون -الدركسيون هو الطارة بتاعت القيادة اللي بتلفها بإيدك- وبعدين لفيت المفتاح مع إتجاه عقارب الساعة وقمت راجع على طول فبطلت مني للأسف وما اشتغلشي الموتور ...
صاحبي قالي إني لازم أصبر شوية على المفتاح وأنا محركه لما أسمع صوت الموتور بيدور فأرجع حتة صغيرة ..
وقرأت في الكتالوج إن لو عربية مانيوال ممكن تحاول تدور الموتور في خلال 15 ثانية وأنت لافف المفتاح ولو مادرش فبتستنى 20 ثانية بعدين تحاول تدوره تاني ,,
وقرأت كمان إن لو عربية أتوماتيك ممكن تحاول تدور الموتور في خلال 15 ثانية وإذا مادراش تستنى كمان 15 ثانية بعدين تحاول تدور من جديد

ثاني حاجة :
في العربيات المانيوال هتلاقي عند رجلك 3 أماكن للضغط وهم
( البنزين - الفرامل - الدبرياج )
أما
في العربيات الاتوماتيك هتلاقي عند رجلك مكانين فقط للضغط وهم
( البنزين - الفرامل )

طبعاً تاخد بالك إن الرجل اليمين هي المسئولة بمفردها -وركز بمفردها- عن الضغط على البنزين أو الفرامل "أصلها الرجل الدقيقة" ...
أما الرجل الشمال هي المسئولة بمفردها -وركز برده بمفردها- عن الضغط على الدبرياج "أصلها الرجل الغشيمة".
طيب هنلاحظ إن مافيش دبرياج في العربيات الأتوماتيك فهنسأل إيه وظيفة الرجل الشمال .. فأحب أقولك مافيش ليها وظيفة فهتركنها وتنيمها ع الأرض كدا ماتعملشي بيها أي أي أي حاجة

ثاني حاجة
في العربية المانيوال العادية بتتأكد طبعا إن الفتيس -اللي هو العصاية اللي جنب السواق- في وضع المور (هنقول إن وضع المور دا بتبقى العصاية واقفة في النص واسمه وضع الحياد يعني تروس العربية كلها متعادلة في مكانها الأصلي لا واخدة وضع تمشي لقدام ولا واخدة وضع ترجع لورا) ...
هنعرف هنا إن فيه 7 أماكن في عربيات المانيوال اللي ممكن تجيب 5 سرعات ونحفظهم كدا :
1 - وضع المور "المنتصف"
2 - وضع السرعة 1 "يسار ثم أمام"
3 - وضع السرعة 2 "يسار ثم خلف"
4 - وضع السرعة 3 "إلى أمام المنتصف"
5 - وضع السرعة 4 "إلى خلف المنتصف"
6 - وضع السرعة 5 "يمين ثم أمام"
7 - وضع المارشدير أي الرجوع للخلف "يمين ثم خلف"

دي أوضاع المانيوال كلها ,, هيقابلها في الأتوماتيك
1 - وضع الـP ودا بيرمز إلى الParking ودا اسمه الوقوف الطويل "وطبعا بيدي للعربية ثبات ماحدش بيعرف يحركها طالما في الوضع دا وفيه عربيات كتير مش بتعرف تخرج المفتاح منها إلى وهي في وضع الP "
2 - وضع الـR ودا بيرمز إلى الReverse ودا وضع الرجوع للوراء "وطبعاً مش شرط تديله بنزين عشان العربية تمشي معاك لكن بمجرد ما تبقى في الوضع دا العربية بترجع لواحدها فوظيفتك أنك تحط رجليك ع الفرامل الأول لما تطمن أنك راجع بزاوية صح فتسيب الفرامل"
3 - وضع الـN ودا بيرمز إلى الNeutral ودا مثيل وضع المور في العربيات المانيول "وطبعا نفتكر تاني إن معنى الوضع دا إن التروس كلها بقت محايدة يعني مش واخدة وضع القيادة و لا وضع الرجوع , وفي نفس الوقت نعرف إن الوضع دا لازم نعدي عليه وإحنا بنحول من وضع الرجوع إلى القيادة أو بنحول من وضع القيادة إلى الرجوع عشان نظبط التروس بتاعت العربية بعدين نديها الوضع الجديد"
4 - وضع الـD ودا بيرمز إلى الDriving ودا مثيل السرعات في المانيوال لكن طبعاً في المانيوال كل سرعة ليها حركة لازم تتعمل إنما في الأتوماتيك فهو وضع واحد والعربية بتمشي منك لواحدها بعدين تقدر تسرع عليه , وزي ما اتعلمنا لما تدي العربية الوضع بتاع الـD لازم تحط رجلك ع الفرامل ولما تطمن إنك واخد زاوية صح تبدأ تسيب الفرامل بشويش وهتلاقي العربية ماشية لواحدها وأنت مش لامس البنزين بعدين لما تحب تزود السرعة تبدأ تضغط على البنزين بقى .


----------


كدا إحنا عرفنا ازاي تعمل كونتاكت للعربية .. و إيه الحاجات اللي بستخدمها برجلي دي وأنا بأسوق .. و إيه وضعيات الفتيس في المانيوال والأتوماتيك

أتمنى أكون أفدت كبداية ,, وهنكمل بأمر الله الباقي في نفس الموضوع هنا واحدة واحدة وزي ما اتعلمت ودورت هحاول أبسط وأوصل وربنا ييسرها ليا وليكم فهيفضل أنك تسمعها مرة على الطبيعة فقط وتاخد الجرأة ع الطريق