بالصور طريقه ظبط تاكيهات الفليشيا

**adhmmaamon** · 09-02-2014 04:50 PM

بسم الله الرحمن الرحيم
بقالى فتره موضوع التاكيهات ده واكل دماغى وبما انى ابتديت اعمل بعض الحاجات بايدى .. فقررت انى اظبط التاكيهات .. وكانت التجربه كالتالى .
اول حاجه نسمى الله ونصلى على سيدنا النبى علشان ربنا يوفقنا ..
تانى حاجه لازم العربيه تكون بارده ويفضل ان تكون بايته من الليل ويتم العمل صباحا (انا عملت الموضوع الساعه سته ونص علشان دوشه الشارع ) .
-يتم رفع السياره من الجانب الامامى وتعشيق الفتيس على الغيار الخامس
-كما بالصوره رقم واحد يتم فك عدد 2 صاموله بتوع غطا وش التاكيهات بمفتاح عشره

- بعد كده هانفك وش الاسبراتير علشان مايضايقناش واحنا بنرفع الغطا ..وبعد كده نرفع الغطا بالراحه ونشيك بالمره على الجوان بتاعه ممكن يكون عايز يتغير .

وبعد كده نبدأ بقى الشغل اللى بجد.

الصوره دى فيها ترتيب اليساتم من 1الى 4 وههوكالتالى (1342)
كمان موضح مكان البنزين والعادم
كمان مكان الصاموله ال12 اللى فى قلبها المسمار العاده اللى بنربط منه مقاس التاكيه ربط او فك

اول حاجه هانحير البستم رقم 4 (العادم طالع والهواء نازل ) عن طريق لف العجله للامام وبعد كده هانظبط تاكيه رقم 1 بنزين 20 وعادم 25 .. وتاكيه 2 بنزين فقط 20 .. وتاكيه 3 عادم فقط 25 .
بعد كده هانحرر البستم بتحريك العجله للامام 360 درجه ونبدأ نحير البستم رقم 1(برضه العادم طالع والهواء نازل ) .
ونظبط التاكيه رقم 4 بنزين 20 وعادم 25 و تاكيه 2 عادم فقط 25 وتاكيه 3 بنزين فقط 20 .
طبعا الكلام ده كله بالفيلر وده موجود فى التوفيقيه من اول 10جنيه لحد 80 على حسب . انا جبت واحد كويس ب20 وظبطت بيه ...
فى النهايه احب اقدم الشكر للاخ منسى لانه كان عامل موضوع زى ده وانا استفدت منه جدا ..
http://www.nilemotors.net/Nile/331345-a.html
انا بعتذر بشده لانه طريقتى فى الشرح مش اد كده .. ولكن بما انى اتعلمت الكتير من المنتدى ده ومن الناس المحترمه اللى فيه ..حابب انى انقل تجربتى المتواضعه فى ظبط التاكيهات واللى كنت فاكر انها صعبه .. وللعلم على قد ماهى صعبه على اد ماهى ممتعه لما تعمل حاجتك بنفسك .. انا جربت اظبط مره والتانيه .. وبعد ماكان صوت التاكيهات بينقر و صوت الموتور عالى ..الحمد لله صوت الموتور هدى كتير وجارى التجربه لبضع ايام وربنا يستر ويسهل.

**sakr_skoda** · 09-02-2014 07:41 PM

الله ينور عليك ياشرقاوى انا عملت فعلا كدا وظبط التاكيهات بس الموتور على الارض وانشاء الله لما اسقط الموتور فى العربية حشيك عليهم تانى بالفيلر ****

**sakr_skoda** · 09-02-2014 08:05 PM

وهذه مساهمة منى مبسطة للغاية لضبط التاكيهات**

البستم رقم 4 فى النقطة الميتة العليا وذالك بفك البوجيه البستم رقم 4 ووضع مفك رفيع مكانة وتحريك العجلة حتى نشعر بان البستم فى اعلى نقطة له وهى (ن/م/ع) النقطة الميتة العليا وبترتيب الصبابات من ناحية الاسبرتير
الصباب رقم 1عادم (0.25) والصباب رقم 2 بنزين (0.20) والصباب رقم 7بنزين (0.20) والصباب رقم 4 عادم (0.25)**

البستم رقم 1 ادارة عجلة السيارة حتى يصل البستم رقم (1) الى (ن/م/ع) بنفس الطريقة المتبعة مع البستم رقم (4)
صباب 5 عادم (0.25) ** صباب 6 بنزين (00.20)**صباب 8 عادم (0.25) صباب 3 بنزين(0.20)

**sakr_skoda** · 09-02-2014 08:21 PM

اسف جد ضبط تاكيهات البنزين بالفيللر على (0.25) وليس (0.20) وبالعكس العادم (0.20) وليس (0.25)

**المنسي** · 09-02-2014 09:12 PM

الله ينور عليك

**مصطفى-حسن** · 09-02-2014 09:21 PM

مبدئيا جهد مشكور وتسلم ايدك
بس انا عندى استفسار بسيط

زمان لما كان معايا الفيات 132 2كامة كانت التاكيهات عشان تتظبط كان الميكانيكى بيشيل الاطباق التخينة ويقيس الاطباق التانية من عندة لحد ما يلاقى المناسب ويركبة وياخد القديم ودة كان الطبيعى

يا ترى فى عربيتك نفس الفكرة ولا فية طريقة تانية لانى فعلا معرفش
بس انا حبيت اشارك بالموضوع عشان انا بحترم كل واحد بيجتهد ويعمل حاجتة بايدة

**المنسي** · 09-02-2014 09:35 PM

ظبط التاكيهات البنزين علي ٠،٢٠ والعادن علي ٠.٢٥ وممكن تظبط العادم والبنزين علي مقاس واحد ٠.٢٥

**aw2100** · 09-02-2014 10:11 PM

انا ظبط التاكيات على 15 والفيلر مزنوق فى العادم والبنزين بعد تجارب كتيرة قوى ودى الظبطه اللى ادتنى اقوى عزم واقل صوت للتكايات واقل حرارة للموتور وخلت العربية بتمشى بالبنزين ال80 من غير ماتسقف ده طبعا لو لاقيته !!