عرض للطباعة
السلام عليكم ورحمة الله وبركاته
بشترى a516 وان شاء الله يكون اختيار موفق
انا هشترى من النت فمش عايز يتضحك عليا في الاسعار
وبدور علي حاجه فبريكا من 2007 ل 2010
عايز اعرف سعر كل موديل حدود كام
وهل كلمة رشه حزام نضافه او كاوتش جديد وبطارية جافه
الحاجات دي تفرق في ايه
معلش اول مرة اشترى و اركب عربية فمعلوماتى قليله وانا اخوكم الصغير
شكرا جزيلا
اى عربية راشة حتى لو مقلوبة بيقولوا عليها راشة نضافة ... الفابريكا بره وجوه اريح حاجة ... بالنسبة للبطارية كله جاف دلوقتى و متفرقش معاك انت حاجة لانك فى الغالب هتغيرها فى حدود شهرين تلاته ... كاوتش جديد ميزة طبعا لان فردة الكاوتش الواحدة فى ال 516 بتعمل فى حدود 450 جنيه ... واهم من ده كله عداد قليل قدر الامكان فى حدود 50 الف كيلو مثلا ... الاسعار لو فبريكة بره وجوه و عداد قليل و حالة ممتازة (جميع كماليات العربية شغالة)من 45 الى 53 حسب الموديل من 2007 الى 2010
أنا فهمت من كلام حضرتك أن خبرتك في المستعمل مش كبيرة قوي .. وعشان تعرف تختار أنصحك بالتالي:
1. وأنت بتدور تخلي بنزينة أو فني يفحصلك العربية (الأفضل تشوف مركز خدمة بيشتغل في اسبرانزا يفحصهالك من حيث الصاج والموتور والعفشة).
2. حاول تشتري من حد تعرفه.. أو من حد تحس أنه نضيف في استخدام العربية ومش لعبي في كلامه وبيعمل عليك اشتغالات.
3. حكاية رشة نضافة أو حزام بس أو كدة .. هو الأفضل طبعا الفابريكة تماما لكنه مش مقياس لكن الفكرة أن في مصر هنا ممكن يعمل ما لا يعمل في العربية ويظبطها ويبيعها وكانها جديدة .. يليها اللي رشة حزام .. يليها اللي رشة ما عدا السقف .. يليها اللي رشة بالكامل نضافة ... وعشان تريح نفسك مركز الخدمة أو الأفضل لو سمكري شاطر يكشفلك عليها ((سمكري شاطر)).. وفي ناس بترش عربياتها فعلا نضافة مش أكتر.. السمكري هو اللي هيعرف أكتر.
4. تشوف العربية ونضافتها هيبان عليها بنت ناس وللا معمول فيها البخت .. يعني اركب العربية .. شوفها كدة ماسكة نفسها وكل حاجة راكبة كويس في مكانها .. في حاجات ملخلخة ومخلعة .. شكل التابلوه نضيف وللا متبهدل او مضروب فيه مفكات كتير .
اقصد بالنضافة مش الأتربة أو الأوساخ .. أقصد نضافة حالة العربية ودي انت تحسها مش بس الفني. ممكن واحد يغسلك العربية كيماوي وتشوف الموتور نضيف والعربية بتلمع وشكلها مغري .. لكن في الاساس ملعوب فيها البخت.
5. نصيحة كمان مش ميزة اللي يقوللك انه مغير عفشتها بعفشة لانسر لأن العربية وزنها أتقل من اللانسر ومش كل حاجة تناسبها من اللانسر .. فقط المساعدين ومش كل الأنواع .. نوع مونرو بس اللي بيركب للانسر هو اللي يناسبها.
6. وفي الآخر راحتك النفسية للموضوع وللبائع .. والعربية الميتعملة حالة .. متحكمش بموديل السنة أو العداد بس .. ممكن عداد عالي بس سفر دا مش وحش .. ممكن عداد قليل بس كله في الزحمة دا بيهلك الموتور .. ممكن واحد مش كويس لعب في العداد ونزله.. فشوف فني او بنزينة يحكملك علي كبس الموتور وقوته.
دا رأيي الشخصي وربنا يوفقك في عربية كويسة.. ولو محتاج أي حاجة أنا تحت أمرك
شكرا جدا جدا. والله تاعب حضرتك معايا يا دكتور.. معلش هل فيه موديل فيه تغيير يعنى 2010 يفرق ايه عن 2007.. ولو 50000 ان شاء الله يجيبوا 2010 كويس. وياريت لو رقم موبايل حضرتك عالخاصاقتباس:
المشاركة الأصلية كتبت بواسطة دكتور خالد
متشكر جدا لرد حضرتك الوافي يا استاذ ميلاد.. بالنسبة لكلمة جافه.. هو فيه انواع تانية؟؟ واللي بتيجي اصﻻ في العربية بتعيش اد ايه... وياريت رقم موبايل حضرتك انبوكس برضه ومعلش متقل عليكماقتباس:
المشاركة الأصلية كتبت بواسطة melad sedky
د.محمد شاهين