الموضوع: علشان كده انا اخترت الفلوانس...يا ترى انت اخترت عربيتك على اساس ايه؟

على فكرة لو بصينا على تصميم الفلوانس هتحسوا انها family car بجدارة و ده اللى انا قلته كذا مره فى تقاريرى....عمر ما الفلوانس اتعملت علشان الشد و السحب و الغرز و السواقة الرياضية العنيفة
العربية دى معمولة علشان كل الناس اللى ورا و اللى قدام تستمع بالرحلة....طبعاً رحلة يعنى عايزين نرجع بالسلامة مبسوطين مش هناخد غرز على ١٤٠ و مش هنجمع من ٠ ل ١٠٠ فى كام ثانية طبعاً اللى همه الموضوع ده يبقى اكيد الفلوانس مش بتاعته، مش معنى كده ان انا فى سن السبعين و بمشى جنب الحيط و لكن عمرى ما بهين نفسى و لا اهين عربيتى علشان متهنيش...بجرى بس فى الطوالى و بلتزم بحدود السرعة و باخد غرز بس على الواسع و عندما يسمح الطريق و تسمح السرعة
انا كنت عايز عربية اسره نبقى كلنا مبسوطين فيها و عمرى ما هغامر فى سواقتى لانى بحب اسرتى و عربيتى
فتحة سقف تدخل نور داخل صالون السيارة و استمتاع اكتر بهواء الصيف فى المصايف
عربية ثابتة جداً على الطريق دون اهانة غرز على سرعات و ملفات علشان اختبرها
قاعدة واسعة فى الخلف و الكل مبسوط
مخارج تكييف مخصوصه للأولاد فى الخلف
مخرج شحن مخصوص لأجهزتهم دون تشتيت للسائق فى الفك و التركيب
مسند خلفى مع اتنين حامل مشروبات ليهم
شنطة الاوسع فى فئتها علشان تاخد كل حاجتنا
تانك بنزين كبير
ستاير خلفية كاملة مدمجة علشان الشمس و الحماية من عيون المتطفلين
٦ ايرباجز للأمان فى حالة الحوادث لا قدر الله
استهلاك بنزين متدنى
اداء و تسارع مرضى جداً و فاق كل توقعاتى
كسائق موضوع ال smart card و مكن رفع الازاز و ضم المرايات و فتحة السقف اصبحت رفاهية لا غنى عنه
موضوع زر امان الاطفال اللى جنب ايدى بفتحه و اقفله علشان اقفل البيبان الخلفية و الزجاج الخلفى اصبح ضرورى و مريح بدل ما انزل افتحلهم فى كل مشوار و خصوصاً لو حد كبير قاعد معاهم ورا
عربية ذكية فى كل حاجة...تطفى الموتور يفضل الاضاءة و الكاسيت شغالين زى ما هما...تفتح باب السواق كله يطفى
توكيل ممتاز بمقاييس بلدنا سواء فى الضمانات او الصيانات او توافر قطع الغيار او حتى طلبها مخصوص ليك من الخارج

دى كانت متطلباتى من العربية و علشان كده اخترت الفلوانس و فعلا لبت كل احتياجاتى و اكتر و كل ما ابعد عنها متر الاقيها بتزمر و بتضم المرايات و تغمزلى بالاشارات و تقولى سايبنى و رايح فين...لسه مقعدناش مع بعض كفايه :)؛)

ياترى انتوا اخترتم عربياتكم على اساس ايه؟
يا ريت مشاركتكم علشان المقبل على الشراء يستفاد و يعرف ازاى يختار عربيته