الموضوع: رساله شكر وتقدير لكل من الساده "نايل موتورز & مركز سبيد سيرفس"

السلام عليكم ورحمه الله و بركاته,

اولا: الساده اعضاء منتدى نايل موتورز ...

فى البدايه انا حابب اوجه كل الشكر و التقدير لكل من ساهم فى انشاء واستمرار و تطوير منتدى نايل موتورز لانه فعلا يعتبر مرجع اساسى لكل شخص يبحث عن اى حل لاى مشكله ممكن تواجه فى عربيتو مهما كان النوع او الموديل او حتى لو كان بيعمل بحث لاكتساب خبرات جديده فى مجال السيارات وده راجع لتبادل الخبرات و مساعده الاعضاء هنا فى المنتدى الكل للكل على اكمل وجه بدون اى مقابل وربنا يجعلو فى ميزان حسانتكم جميعا ... قولو امين :) .....

كمان اسمحولى اقول رأيى باعتبارى وتشريفى بلقب انى اكون فرد فى اسره نايل موتورز :
على الرغم من قله مشاركاتى فى المنتدى و لكنى دائم استخدامه و دائم البحث بداخله لاكتساب خبرات و مهارات جديده لاحظت فى الاونه الاخيره اختلافات فى و جهات النظر ما بين الساده الاعضاء وديه حاجه طبيعيه جدا ما بين كل الناس وبعضها بشكل عام و لكنى حزنت عندما فوجئت بان الاختلاف ابتدى ياخذ صوره اسمحولى انى اقول انها غير حضاريه ... لان الفئه المستخدمه للمنتدى كلها تقريبا فئه مثقفه ومتعلمه وتدرى ان فى اختلافتنا رحمه فأرجوكم عدم اخذ الاختلاف فى وجهات النظر ده على محمل شخصى وانما الكل يسعى جاهدا فى تحقيق اعلى استفاده للاعضاء وحتى غير الاعضاء ممن يستخدمون المنتدى للبحث عن حل لمشكلاتهم فى مجال السيارات .... واسف على الاطاله و ارجوكم تقبلو مرورى :)

_____________________________________

ثانيا: مركز سبيد سيرفس...

احب اشاركم تجربتى مع مركز سبيد سيرفس التابع للمهندس هانى و ديه كانت بالامس 13/2/2014 و كانت كالتالى:

نوع السياره فيرنا منيوال كانت تحتاج لصيانه ال 70.000 + تغيير جوز راس كوبلن امامى وخرطوم حافظه بور وحاجه كده فى ماكينه المياه التابعه للمساحات بس مش فاكر اسمها :) ..

شربنا القهوه الزياده الحمد لله وطلعنا العربيه على الكوريك ورحت جبت 2 راس كوبلن خارجى بتاع فيرنا 1600 وده لقيتو عند الشرقاوى عشان كان خلص عند اوتو عمرو و كان سعره 600 جنيه و بعد ما جبته فى واحد فيهم فىه عيب انه خشن ومش راضى يدخل فى سره العجل بشكل طبيعى طبعا انا كان هايغما عليا من الخبر ده لانى كنت متحرك بتاكسى و الدينا كانت زحمه بشكل مبالغ فيه تقريبا من عند حديقه بدر للشرقاوى من على جسر السويس و ارجع تانى المركز تقريبا ساعه و ربع :( ... اصر المهندس هانى انى اخذ عربيتو ابدل بيها الكوبلن انا الحقيقه اتكسفت جدا ولكن بعد الحاحو اخذتها و اعدت ادعيلو طوول الطريق :) المهم انى بدلت الكوبلن اللى فيه المشكله و جبت خرطوم زيت البور ب 25 جنيه ولمبه فانوس امامى ب 25 جنيه من اوتو عمرو و رجعتلو ركب الحاجات و عمل الصيانه كامله وهى تربيط عفشه و تنظيف فلتر هواء البوابه وغيار زيت موتور و فلتر غسيل موتور و سربنتينه وطبعا كمل كيلو زيت بور مكان اللى وقع مكان تغيير الخرطوم وكان له ملاحظه ان الاربع مساعدين عندى ضربين زيت .. انا طبعا عملت كانى مش انا ومسمعتش حاجه ادعولى بقا ربنا يفرجها و اغيرهم :) ...... نيجى بقا للحساب :)
زى ماقولت 600 كبالن + 200 جنيه شامله جركن زيت شل اصفر و فلتر زيت و كيلو زيت بور موبيل + 25 جنيه خرطوم حافظه بور + 25 لمبه فانوس امامى ..... والمصنعيات 80 جنيه مقابل تغيير كبالن + 50جنيه مقابل الصيانه و المفاجاه كانت لما المهندس قاللى ان المركز سوف يتحمل 50جنيه مقابل الصيانه حيث اننى العميل 1001 اللى كسبت مع البرنامج :) فى الحقيقه انها كانت لفته جميله من مركز سبيد سيرفس لعملائه وانا مش عارف اقول ايه فى النقطه ديه اصلى اول مره ارووح اصلح العربيه فى مكان و اسمع حاجه زى ديه :) ....

اشكر مره تانيه المهندس/ هانى لتفانيه فى العمل وكسب ثقه العملاء امثالى ودائما فى تجدد مستمر باذن الله و اشكر كل الشكر منتدى نايل موتورز و اعضائه الكرام ومشاركاتهم القيمه والتى من شأنها نجاح و استمراريه هذا المنتدى الكبير .... واسف على الاطاله مره تانيه والسلام عليكم ورحمه الله و بركاته ...

م/ كريم ابوالعزم