تعبت و مش قادر اخد قرار .....نص فيكترا b2

يا رب تفيدوني بعيد عن الصنايعية و التجار و البحث كتييير على النت و مش لاقي اجابة محددة

أولا عربيتي فيكترا بي 2001 .. مانيوال 1600 الموتور الأسود ... رجلي تعبت و محتاج اتوماتيك 2000 ...

ثانيا ... مبدأيا في أسباب تمنع البيع علشان اشتري واحده على أبوه اتوماتيك فلازم هغير

ثالثا ... سألت كتير و لفيت كتيير .. بس بسبب تفاوت الاسعار و عدم الثقة في الصنايعية في طنطا

السؤال بقى ... علشان القلق من القص و اللزق .... هل ممكن أجيب نص كامل.. قالوا ب حوالي 12000 جينية في بورسعيد و أفضي حوض و اركب النص التاني احسن من اني اغير المكنة بالفتيس و باقي المشتملات

طيب و لو هغير نص هتصرف في النص اللي عندي ازاي ؟؟.... طيب هل النص اللي هشتريه ده ينفع يكون متجرب و لا أنا و نصيبي ...

آخر حاجة بيقولوا المكن الياباني هو الاحسن .... بس المفروض انه دريكسيون يمين ....و المفروض درجة الحرارة في اليابان أقل من عندنا ... هل دا معناه ان المكنة هنا في مصر هتسخن

ياريت يا جماعة اللي عنده معلومة يفيدني علشان دماغي هتنفجر

السلام عليكم ....! ازيك ياغالى .....؟ انت اخر مره سالت على النص ابو ١٢٠٠٠ الف جنيه ده امتى ؟؟؟؟ باشا انت قصدك بكلمه النص بتاعك ده الموتور مش كده ....؟ لأنك اكيد مش هتقطع العربيه ....؟ على العموم الموضوع سهل وبسيط وممكن الهندسة طنانى يعملهولك وماتقلقش خالص من موضوع تغييير الموتور ده انا اعرف ناس كتيييير جدا عملته وبيطلع زى الفل مافيش اى مشكله باذن الله زى مانت متوقع كده .......! تانى حاجه موضوع نص اليابان ده احنا بنفضله دائماً لان الكيلو متر قليل انما اى نص جاى من بره دائماً بيبقى نظيف لان الناس دى مش بتهين العربيات وطبعا اى موتور بتجربه فى النص بتاعه وبتشوف العداد عامل قد ايه قبل ماتاخد العربيه ....... كمان كنت مره مع مهندس فاهم اوى وقالى ان المواتير ال ٢٠٠٠ سى سى دى معمره جدا جدا واقسملى بالله انه مره فك موتور ماشى ٣٥٠ الف كيلو وأكتر ولقى الكرنك بتاعه زيروووو ..... فأنت عندك الحل انك تروح لواحد فاهم اوى وثقه اوى ومحترم جدا جدا زى الهندسه طنانى ( انا عمرى لا شوفته ولا اعرفه على فكره انما الراجل ده ابن ناس جدا وشعبان جدا جدا من كلام كل الناس اللى تعرفه واتعاملت معاه ) وهوه هيظبطلك كل حاجه ..... اخر حاجه وباذن الله تعمل حسابك فيها انك لازم تعدل الفرامل الخلفية عندك طبعا من طنابير الى سكاكين وهتغير السيرفو معاك قدام عشان يرمى كبس أزيد للفرامل .... وصدقنى الموضوع سهل جدا ولا تقلق ..... اخر حاجه معلش كالعاده هتستنى رايى زملاءنا طبعا الأكثر منى خبره وهما هيفيدوك اكتر منى ..... هذا وبالله التوفيق

رأى شخصى

موضوع كويس و هيوفر معاك كتير
ممكن تتفق مع اللى هتاخد منه النص انه ياخد اللى هيطلع من عربيتك بس فى ناس مش هتوافق و لو وافقوا هيرموا سعر فى الارض
او النص بتاعك لو الماكينة و الفتيس و حاجة الحوض كويسين ممكن قبل ما تغيير تروح لحد بتاع استيراد تقوله يطلع يجرب العربية و ان انت جبت نص من بورسعيد بس مش هتعرف تودى النص هناك , الحوار ده هيبقى متعب شوية بس هتتباع كلها على بعضها
او ممكن تبلغ المكانيكية اللى عندك ان عندك نص عايز تبيعه او لو حد احتاج حاجة يقولك بس عرفهم انه خلع من عربيتك علشان تخلى ذمتك
او تعمل موضوع هنا فى المنتدى بالحاجة اللى طالعه سليمة من العربية و اسعارها و تقطعها

بالنسبة لمكن اليابان طبعا انضف و اكتر حاجة هتلاقيها ماشية 50000 كيلو و الضفيرة اليمين بتتعدل عادى انت ممكن تقرا العداد و النص على الارص ركب البطارية بتتاعتك على النص و افتح كونتكت و شوف العداد
الترموستات بيتغير و انت بتعمل سيرفيس و بتركب ترموستات بيفتح بدرى لان كل اللى بيختلف هو الترموستات

احسن حاجة انك توصل بورسعيد تغيير الحاجات دى هناك و تجرب هناك علشان لو لا قدر الله فى حاجة يبقى على عينك يا تاجر و محدش يتكلم على صنايعيى ولا حاجة

وربنا يوفقك

تقبل مرورى

ف بورسعيد العربيه كامله سي دي اكس ب 17 الف
بس نظرا ﻷن القاهره و بورسعيد بعيد عن حضرتك ف ممكن تاخد جوله في المنصوره
انا مسقط ماتور 1600 وارد يابان
اتفقت مع التاجر اني هستلم العربيه دايره عشان لو الماتور فيه حاجه يبقى بتاعك
المواتير الياباني فعلا عدادها قليل ومش بيعدي ال50 الف كيلو
فيه واحد بس ف المنصوره هو اللي بيجيب من اليابان
كان فيه نص وارد المانيا كان هيجي بالطابلوه والكلسونه كان ب 13500
لو نويت ع المنصوره عرفني وانا هعرفك اماكن التجار لو حضرتك متعرفهمش

سمعت أيضا أن وارد اليابانى يكون بحالة جيدة فى أغلب الأوقات
ولكن لدى سؤال بعد إذن صاحب الموضوع

هل تستمر قطع السيارات الاستيراد لنفس الموديل بمرور الزمن ؟ ألا يوجد وقت وتنتهى وتنضب السيارات المستعملة بالخارج لموديل معين بعد فترة من الوقت ؟

الفكرة في انصاص اليابان فعلا انها بتيجي ضفيرة مختلفة ولازم تتعدل، بس انا شوفت انصص الماني حلوة جدا هنا في اسكندرية مش محتاجة اي تعديل
اعتقد هنا الفيصل حايكون في السعر، واكيد كل المواتير بتبقي عالتجربة بعد ما تركب متقلقش من الموضوع ده كل التجار كده
بس النص بتاعك ده بقي حاتعمل بيه ايه مش عارف!! كل التجار هنا لما بشتري حاجة استغمال اقولهم خدو اللي عندي يقولولي احنا بنبيع حاجات استيراد، لو اخدتها منك وبيعتها كده يبقي انا بغش الزبون وببيعله حاجة علي انها استيراد وهي من هنا

وياريت يا شباب اللي يقترح تاجر يقول هو فين سواء بورسعيد منصورة القاهرة.

هات نص دركسيون شمال
و فك كل القديم
و ركب كل اللى فى النص
موتور و ضفيره و تبريد و كنترول و تابلوه و كل حاجة
و هات معاه سيستم فرامل خلفى
و مبروك على كده

اقتباس:

---

المشاركة الأصلية كتبت بواسطة tananybasha

هات نص دركسيون شمال
و فك كل القديم
و ركب كل اللى فى النص
موتور و ضفيره و تبريد و كنترول و تابلوه و كل حاجة
و هات معاه سيستم فرامل خلفى
و مبروك على كده

---

كلام زى الفل وهى دى الخلاصه

شكرا لكل إللي إهتموا و ردوا على الموضوع. ...... بالنسبة لسعر النص ده ب 12000 مش عارف دا كويس و لا إيه في بورسعيد. ...لي جاري بيشتغل هناك. ... مش عارف أخليه ياخد العربية يعملها هناك و لا أجيبه هنا و أسقط هنا. ....،.

تاني حاجة بالنسبة لطناني باشا مش عارف النص الشمال النظيف ألاقيه فين. ... المفروض إن الياباني كله يمين

اقتباس:

---

المشاركة الأصلية كتبت بواسطة mohammedaladel

سمعت أيضا أن وارد اليابانى يكون بحالة جيدة فى أغلب الأوقات
ولكن لدى سؤال بعد إذن صاحب الموضوع

هل تستمر قطع السيارات الاستيراد لنفس الموديل بمرور الزمن ؟ ألا يوجد وقت وتنتهى وتنضب السيارات المستعملة بالخارج لموديل معين بعد فترة من الوقت ؟

---

كان معايا بيجو 504 و لسه ليها قطع غيار إستعمال خارج

اقتباس:

---

المشاركة الأصلية كتبت بواسطة sherif moneer

ف بورسعيد العربيه كامله سي دي اكس ب 17 الف
بس نظرا ﻷن القاهره و بورسعيد بعيد عن حضرتك ف ممكن تاخد جوله في المنصوره
انا مسقط ماتور 1600 وارد يابان
اتفقت مع التاجر اني هستلم العربيه دايره عشان لو الماتور فيه حاجه يبقى بتاعك
المواتير الياباني فعلا عدادها قليل ومش بيعدي ال50 الف كيلو
فيه واحد بس ف المنصوره هو اللي بيجيب من اليابان
كان فيه نص وارد المانيا كان هيجي بالطابلوه والكلسونه كان ب 13500
لو نويت ع المنصوره عرفني وانا هعرفك اماكن التجار لو حضرتك متعرفهمش

---

المنصورة قريبة مني. .... و أسمع إن قطع الغيار فيها أرخص من طنطا بكتير

ابوس ايدك تجيب نص cdx وتركب كل الى فية مكان القديم وبعدين هتحس انك راكب طيارة مع تعديل الفرامل الخلفية وتحاول تجيب نص الفرش فية مقارب لفرش عربيتك وتشغل كل حاجة فية هتلاقى الدنيا زى الفل انشاء الله اهم حاجة النضافة فى التقفيل وهتحس انك راكب عربية كل الاوبش الى فيها بتاع 2014 صدقنى بدون مبالغة انا معايا عربية متعدلة cdx تحفة بمعنى الكلمة
مثبت سرعة -شاشة اعطال كاملة-حساسات كاملة حتى قربة المساحات-لولمبة اتحرقت او مش شغالة بيكتب على شاشة الاعطال طيارة ياباشا طيارة
ورينا يوفق للى فية لبخير

اقتباس:

---

المشاركة الأصلية كتبت بواسطة jos116eph

ابوس ايدك تجيب نص cdx وتركب كل الى فية مكان القديم وبعدين هتحس انك راكب طيارة مع تعديل الفرامل الخلفية وتحاول تجيب نص الفرش فية مقارب لفرش عربيتك وتشغل كل حاجة فية هتلاقى الدنيا زى الفل إن شاء الله اهم حاجة النضافة فى التقفيل وهتحس انك راكب عربية كل الاوبش الى فيها بتاع 2014 صدقنى بدون مبالغة انا معايا عربية متعدلة cdx تحفة بمعنى الكلمة
مثبت سرعة -شاشة اعطال كاملة-حساسات كاملة حتى قربة المساحات-لولمبة اتحرقت او مش شغالة بيكتب على شاشة الاعطال طيارة ياباشا طيارة
ورينا يوفق للى فية لبخير

---

كلامك على راسي يا باشا. ..... بس أنا كده هقعد نص كامل في البيت عندي. .... هههههههه