كلمتين بس عشان الواحد اتخنق وجاب اخره والموضوع بقة ماسخ اوى

انا بس عايز اقول كلمتين عشان اتخنقت من المنتدى بسبب كام عضو مصممين يحبطوا

اى بنى ادم شارى او حاجز الصنى الشكل الجديد بجد الواحد اتخنق من المنتدى ومن الضغط

الغريب اللى بقة معمول على اى حد معاه العربية او حاجزها! انا بقيت حاسس انى واخد فلوسها

من كام عضو هنا وعايزين يكرهونى فيها بأى طريقة عشان الغى الحجز وارجعلهم فلوسهم! اللى

يقولك حد يجيب عريبة زى دى واللى يقولك ياعم يابانى ايه دى لا تمت لليابان بصلة! واللى يقولك

شكلها عامل زى عضة الكلب! هو فى ايه! ما كل واحد حر فى اختياره وياريت كل واحد يحترم

اختيارات الشخص اللى ادامه وبلاش تجريح وكلام يدايق بقة! كام بنى ادم فى المنتدى كل شغلتهم

انهم يحسسوا اى واحد شارى او حاجز العربية انه حمار! حاجة بقت تقرف ومستفزة مش عارف

عايزين يوصلوا لأيه! كل واحد يلف عالمنتديات يشوف مشاكل العربيات كدة ويرجع تانى! حاجة

تقرف!

شوف ....المهم انت مقتنع بايه ..انا احد الزملاء في المنتدي كان بيقول لي في احد الردود ابقي روح غير العربيه الاوبترا اللي شكلها مغولي دي الاول وبعدين نتكلم ...اي والله قالي كده ...بس انا ليا اولويات ومعايا قدر معين من الفلوس هشوف اكتر حاجات هجيبها من اولوياتي بالفلوس دي ....انا مثلا كان معايا افيو ودي افشل عربيه في التاريخ بس استخدمتها في فتره معينه ماكنش معايا غير مبلغ معين وعايز عربيه واسعه ومشاكلها قليله ...فكانت الافيو اق ب حاجه ...حضرتك صلي صلاه استخاره واتكل علي الله ما تركزش في كل كلمه في المنتدي

لو انتا مقتنع بل عربية و بشكلها و بادئها تسئل حد لية و لو انت عاوز تسمع الكلام الى على مزاجكك تسئل حد لية اشترية على طول محدش هيقولك متشتريهاش مثلا او حد بيدفعلك تمنها هية لو عاجباك اشترية بس كدا

ماتحطش في دماغك اللي انت عايزه اعمله وماتتأثرش بكلام حد علشان متعكرش دمك مش معنى أن العربيه فيها شويه مشاكل وهتتحل مع الزمن أنها تبقى فاشله آمال لو مشاكلها ففتيس زي الفولكس كدا كانوا هيعملوا ايه العربيه ياباشا كويسه ولو كانت فاشله ماكنتش انتشرت الانتشار الرهيب ده توكل على الله وصلى استخارة وجيبها ومتع نفسك انت اللى هتركب مش أعضاء المنتدى وأهم حاجه متزعلش نفسك

مش اي كلمه هاتتتقال تكون صح او سليمه
كتير من الاعضاء حافظين مش فاهمين
وتلاقي المشاركات
كلمتين بيترددو بدون فهم
في كل انواع المقارنات
انت الحكم وشوف مصلحتك فين

ناس كتير للأسف متحيزة لاختيارات هم مقتنعين بها , ومش هتقدر تغير من طريقة نقاشهم وعدم حياديتهم . بس ممكن تاخذ المعلومات السليمة من أي مصدر وتبني على أساسها اختيارك وقبل كل شيء طبعا لازم تصلي استخارة وتشوف هل انت مستريح ولا لأ وعلى حسب التساهيل . ربنا يكرمك للاختيار الأفضل .

توكل على الله و اشتري اللي انت مرتاح ليها
صني او غيرها , المهم انت اللي هتركبها مش هم
الصني حلوة و مكونات ياباني تقفيل مصري و عليها ضمان من التوكيل يعني زي الفل

يا باشا انت بتشتري بفلوسك فالكلام اللي تقراه اعقله وشوف مصلحتك فين ولو عايز تتأكد روح مره على مركز صيانه نيسان واتكلم مع الناس اللي واقفه بعربياتها تعمل الصيانه وشوف ايه رأيهم وخصوصا مشكله الفرامل وايه مدى تجاوت التوكيلات مع الشكاوى وربنا يوفقك في اختيارك.

ولا يهمك وهتلاقى منهم كتييييير فى حياتك عموما
اعقلها وتوكل

فعلا الاعضاء زي ما قالوا فوق هوا الكلام السليم..حضرتك المنتدي هنا مليان ناس كتير وكل واحد وليه رؤيته ووجهة نظره الخاصة في اي عربية ولو انت هتسمع لكل عضو يبقي مش هتخلص ومش هتشتري في حياتك عربية اصلا :) يا باشا حضرتك بتاخد الاراء وفي الاخر حضرتك الرأي في الاول والاخر ليك يبقي بلااش تركز في كلمة وخصوصا في المقارنات..حضرتك انا شفت في مرة موضوع وصاحبه كاتب انه اخره في الشراء 115 الف جنيه فلقيت عضو تاني كاتب ليه زودهم 15 الف كمان وهات العربية الفلانية.ياعم الراجل قال اخره فين ومع ذلك كان من ضمن الردود اللي بيقوله زودهم 15 الف :) وعضو تاني كاتب مقارنة بين عربيتين والناس قالوا ليه المقارنة المعقولة وتلاقي واحد تاني داخل قال علي عربية تالتة اصلا هيا مش من ضمن المقارنة..يا باشا كبر دماغك..