الموضوع: مقارنة مبسطة للنيو سيراتو الخليجى فى مصر - اسعار ومواصفات

السلام عليكم ورحمة الله وبركاتة،،،،،

الحكاية انى فى رحلة البحث عن سيارة جديدة ، ركزت فى السيراتو الشيب الجديد ، وفضلت حوالى شهر تقريباً اسأل واستفسر واتفرج على العربية وازور المعارض ال بتبعها ، سواء الوكيل او الخليجى ، لغاية مالحمد لله ربنا وفقنى اخيراً لل فية الخير.

وعلشان التوهان والحيرة ،العشتهم طوال الشهر الكنت بدور فية على السيراتو ، وال اعتقد ان كتير غيرى اتعرضوا ليها، حبيت اعرض اهم ال أتوصلت لية خلال رحلة البحث (على قدر معرفتى وا رجو التصحيح لو حد عندة معلومة اصح او افضل).

وهتكلم هنا عن السيراتو الخليجى لان هى دى المشكلة ، لاكن الوكيل مواصفاتة واسعارة محددة ومنشورة على موقع الشركة على الانترنيت.

اولاً: فية سيراتو خليجى (السعودى) ويقال ان اهم ما يميزها التكييف اقوى والدهان والمكونات البلاستيك بتكون اجود ، وبتكون غير مصفحة تحت الموتور ، وبيكون فيها عزل الكابينة افضل ، ودى علشان يتناسب مع طبيعة الجو الحار فى السعودية.

ودى تقدر تعرفها من الملصق العند القايم الجنب باب السواق، بيكون مكتوب علية مطابقة لمواصفات المملكة العربية السعودية /المواصفات الخليجى – وكمان بيكون راكب فى شنطتها طفاية حريق جهة الشمال.

ثانياً/ فية سيراتو شرق اوسط (اردنى) واعتقد ان بيدخل معاها الكويتى والاماراتى، ويقال ان دى بيتكون قريبة من مواصفات البتنزل مصر.

فئات الخليجى كتير جداً جداً جداً ، ودى غير الفئات الخاصة بالسيراتو المستوردة عن طريق الوكيل(تقريباً الموجود فى السوق ومن خلال سؤال المعارض حوالى 12 فئة).

لاكن نقدر نلخص أهم الفئات الاتوماتيك (سواء كانت خليجى او شرق اوسط) فى الاتى:

ملحوظة :

- الكماليات استراشادية لان بعض الكماليات بتقل او بتزيد حسب مصدر السيارة ، بس موش يتزيد عن المكتوب غالبا.

- الاسعار برضة استراشدية، يعنى انا هكتب الرنج، وفى الغالب موش هيزيد او هيقل عن 1000: 2000 جم بالكتير لو فى حاجة مضافة فى العربية.

- فى بعض الفئات بيكون فيها بواقى موديلات 2013 وبتنزل فى السعر حوالى 4000: 5000جم (فرق موديل).

- فى بعض التجهيزات اساسية فى الوكيل زى (الامبوليزر أو مانع ادارة المحرك/ الفوجات الامامية/طفاية سجاير متحركة)

الفئة الاولى :

جنط 15 حديد وفى بعض المعارض بتركب جنط اسبور 15(موش اصلى)/سى دى تاتش وفيها كاميرا خلفية (موش اصلى صينى راكب فى مصر)/اكر ومرايات غير مطلية/اير باج واحد/مفتاح عادى موش ريموت/ حساسات خلفية (موش اصلية راكبة فى العربية).

اهم الحاجات الناقصة فى الفئة دى: الفوجات/الجنط 16/ فراملaps)/الطارة المالتى/مخرج كهرباء 12 فولت وغطاء لدرج الكنصول (الفيةusb / aux)

سعرها من 139 :142 الف جم.

يعادل تلك الفئة فى الوكيل مع فرق بعض التجهيزات (lx at - ex ) ودول سعرهم 150 و 152 الف جم .

الفئة الثانية : (تسمى فى السوق الهاى لاين)

جنط 16 اسبور اصلى/فوجات/ ايرباج/طارة مالتى/ بلوتوث أو مثبت /كبوت مبطن/مفتاح ريموت/كرسى السائق هيدروليك/ داليات/نور استوب خلفى/ نور قراءة و مكان لحفظ النظارة/ فراملaps.

سعرها من 145 : 149 الف جم . (حسب الكماليات ولاحظ ان المواصفة/الكماليات البتكون موجودة فى عربية ومبتكنش موجودة فى عربية تانية – فى الغالب بيكون مكانها مواصفة اخرى)، يعنى ممكن تلاقى عربية فيها بلوتوث وعربية تانية مفهاش بلوتوث بس فيها مثبت.

يعادل تلك الفئة فى التوكيل (ex fo ) ودى سعرها 162 الف جم- ولكنها بتزيد كشكل اساسى (اشارات بالمرايات ومرايات ضم/مخداع خلفية ومسند يد خلفى بحامل اكواب /تكيف خلفى/فراملaps)

الفئة الثالثة :

ودى بتكون نفس مواصفات الفئة الثانية وبتزيد فتحة سقف.

سعرها من 155: 158 الف جم.

بالنسبة للوكيل فاول فئة بفتحة سقف سعرها 179 الف جم.

الفئة الرابعة: ( تسمى توب هاى لاين)

ودى بتزيد عن الفئة الثالثة جنط17/ليدات امامى وخلفى/سنسور امامى وخلفى/نواكل/ تكييف اتوماتيك تاتش/طارة مالتى كاملة(تحكم فى سى دى وبلوتوث و مثبت وكمبيوتر رحلات) شيفتات فى الطارة/ سبويلر خلفى.

(تقريباً بتكون زى الوكيل الهاى لاين بدون بصمة)

سعرها من 165 : 170 الف جم.

يعادل تلك الفئة فى الوكيلsrfxs - xs)وبتزيد الsxsrfبصمة وفتحة سقف، ودول سعرهم 169 و179 الف جم.

موضوع الضمان:

يتم شرائة من شركة اسمها تربيل اية(معرفش فى غيرها ولا لأ)وبيكون لمدة 1 :3 سنوات، ودى بيغطى عيوب الصناعة وبيكون متعاقد مع مراكز خدمة معتمدة (زى السبع فى المعادى)، وطبعاً ممكن تعمل الصيانة عادى فى مراكز كيا الرئيسية او المعتمدة ، لاكن لو فى مشكلة فى عيوب الصناعة او تغير قطعة غيار، دى بيكون عن طريق مراكز الخدمة المتعاقدة مع شركة الضمان (تربيل اية).

وسعر الضمان بيكون كالاتى:

1400/ لمدة سنة

1800/لمدة سنتين

2400/لمدة ثلاث سنوات

وفى النهاية اتمنى اكون ساهمت ولو بقدر بسيط فى مساعدة الناس البتفكر فى الخليجى، وياريت يا جماعة لو حد عندة اضافة او توضيح او تصحيح يقول علية، بحيث يكون الموضوع محدث اول باول، ويارب يكون فية افادة، واشكركم.