تقييمى للداستر ال 2014 الشكل القديم بعد 15 الف كيلو
ايوة انا رجعت تانى :) هو انا ورايا غيركم احم احم قصدى هو انا ليا غيركم هعهعهع
العربية دلوقتى عملت 14 الف كيلو ( انا كاتب فى العنوان 15 الف كيلو ) عادى بقى اصحابى وبارخم عليكم
دة تقريرى عنها لما كانت عاملة 5000 لو حد عايز يرجع يفتكر حاجة
http://www.nilemotors.net/Nile/384416-2014-5000-a.html
مش هاتكلم فى كل حاجة لان التقرير الى فات بيوضع كل الحاجات الى قابلتنى بس هاقولكم علي المستجدات
اممم اة نبداء من اول ما العربية عملت ال 10 الاف كيلو حجزت صيانة التوكيل وكنت رايح بس كسلت والله وقلت يلا اهو كدة كدة مش هايعملوا حاجة هناك غير تغيير زيت وفلتر زيت وتربيط عفشة وكشف على السوائل واهيركنونى بتاع 4 ساعات ولا حاجة
واهم حاجة انهم مش راضيين يغيرولى زيت غير توتال اقولة يا عم كاسترول احسن يقولى لا هو توتال طيب هاجيب انا الزيت من برة يقولى برضة لا لا لا اقولة خلاص هاغيرة برة واعمل نفسك ما تعرفش يقولى لا لا لا لا قلت خلاص مافيش منهم فايدة لانى مستحيل احط زيت توتال معدنى وانا كنت عايز احط كاسترول ايدج تخليقى
المهم
صحيت الصبح ضربت كوباية القهوة وانطلقت الى موزع لزيوت كاسترول ف اكتوبر ( فى الشيخ زايد ) ومش هاقول عنوان علشان الادارة ماتزعلش منى
المهم العربية بتاخد 5 لتر زيت بالفلتر انا حطيت 5 لتر من غير فلتر اهو الى حصل بقى ماكنتش اعرف معلش :L_bhuhhh[1]:
رحت اشتريت الزيت ال 5 لتر (جركن 4 وواحد صغير 1 لتر ) ب 400 جنية
اسمة كاسترول ايدج العادى مش السبورت ( السبورت احسن للقيادة الغبية بتاعتى بس اغلى ب 70 ج وماكانش معايا فلوس مش لازم تحرجونى بقى )
سالت المحل على واحد كويس اغير عندة زيت قالى ورايا علطول ورشة سورية
قلت يا محاسن الصدف
بس
الى فيها فاهميييييين جدااااا اة والله اه والله
جة الاول واحد مصرى علشان يسحب الزيت القديم من الموتور بالماكينة الى معاة دى وهيا حالفة ما تتطلع نقطة واحدة جة واحد سورى صاحب الورشة قال للمصرى الرينو الداستر الزيت بتاعها بيتسحب وبيتفضى من الطبة تحت
نزلنا تحت المصرى راسة والف سيف لازم نفكك مصفحة الموتور والسورى قالو هاتلي مفتاح 13 ايد طويلة جابهولة راح هوووووب فاكك طبة الزيت من غير اى مصفحة ولا بتنجان :) وانا وقتها كنت عايز اولع فى المصرى وعلشان يراضينى قالى هاربطلك العفشة قلتلة لا لا لا لا اطلع برة يلا وما اشوفش وشك تانى ( مش اوى كدة بس كنت عايز اقوله كدة بس اتكسفت والله ) المهم تم تغيير الزيت وتمت العملية بنجاح
المهم الدروس المستفادة من الرغى دة :) الزيت التوتال الى كان فى العربية كان زى الفل مع انى عامل بيها 10 الاف كيلو وحاررق علطول حتى الميكانيكى السورى قالى حرام تنزلة دلوقتى سيبة 10 الاف كيلو تانى :iloveu: :error404:
قلتلة لا المفروض يتغير بقى خلاص والمهم صوت الموتور بقى انعم بكتيييييييييييييييير للصبح والله
السحب زى ماهو ويمكن اتحسن بس دى مجرد احاسيس مش حقيقى الله اعلم
الصبح وانا بادور العربية بقت تدور اسرع مش عارف ازاى بس بقت ما تصدق احط فيها المفتاح وتروح عن عن عن شغالة
وقت التسخين الموتور وظهور عداد الحرارة الاول كانت بتاخد بتاع دقيفتين الى 3 وهيا باردة دلوقتى يدوب دقيقة ويمكن اقل والله
استهلاك البنزين اتظبط بقى يعمل 500 : 520 لتر بعد ما كان اخر مرة يدوب بيعمل 460 : 450 لتر
اممم بس كدة
طبعا زهقتو منى :) انا عارف بس معلش سيبونى اخد فرصتى
العفشة لازم كل 5 الاف كيلو اربطها مش عارف دة طبيعى ولا اية بس اهو دة الى بيحصل
الكاوتش كويس وناعم وصوتة هادى بس فية فتحات ف النقشة كبيرة ما بتصدق تمشى على زلطه علشان تمسك فيها وتفضل تدوشنى ف اقرب فرصة هاغير الكاوتش
التكييف اتحسن جدا جدا جدا بعد اول 5 الاف كيلو سواء بارد او سخن
امممم
اة غيرت سماعات الابواب هما مقاسهم 13 سم مدورين جبت اتنين بايونير واتنين كينوود وركبتهم بنفسى ( احلى حاجة احساس انك تكون عامل الحاجة ب ايدك)
الصوت بقى احسن بكتيييييييييييييييييييييي ييييييييير بس مش للدرجة الى كنت متخيلها بس احسن من الاول بتحسن 70 % مثلا
( اسعار الاربع سماعات 420 ج )
اة الزجاج الخلفى الى ورا السواق من فترة وانا ماشى كنت بافتحة لقيتة علق بينزل ومش بيطلع وفلت بتاع ربع ساعة احاول مع الزرار واطف العربية واشغلها وبعدين اشتغل لوحدة وماعملهاش تانى :) مش عارف بقى المشكلة كانت فين
اة وكنت ماشى على الدائرى وزلطة بنت تيت عملتلى شرخ بطول 12 سم وقلت خلاص انا كدة لازم اغير الزجاج وانا مروح جنب البيت عندى فية مركز د. خالد لاصلاح شروخ السيارات ( 6 اكتوبر الحى التانى )
قلت هاعملة عندة لحد ما اغير الزجاج علشان الامان وكدة دخلت والراجل قالى تعالا كمان نص ساعة رحت شربت سيجاااارة ورجعت مالقيتش الشرخ !!!!!!!!!! اتفاجأت والله وادانى ضمان مدى الحياة وقالى ماتقلقش منة وماتغيرش الازار ( هو يدووووب باين يعنى اختفي بنسبة 90% )
واخد 70 ج مش خسارة فية والله واديتة 10 ج للى عملهولى :) فلوسى بقى وانا حر فيها :)
بصو انا رغيت كتير معلش :) واسف غلى الغلطات الاملائيه الى فوق ( عارف ان فية بس مش هاعرف اطلعهم واصلحهم ) مدارس لغات بقى معلش :makeup:
بس كدة
