الموضوع: دليل اختيار قطع الغيار - البديل

كنا اتكلمنا قبل كدة عن قطع الغيار الاصلية و ازاى نعرف الاصلى من التقليد فى الموضوع دة:

http://www.nilemotors.net/Nile/405150-a.html

طبعا دة لا يعنى ان لازم تشترى الاصلى و بس و اى حاجة تانية تبقى وحشة... السوق فيه قطع غيار بديلة و كويسة و بعض منها بيبقى زى الاصلى و البعض الاخر اقل من الاصلى و البعض بيبقى احسن من الاصلى و فيه كمان المضروب...

النهاردة هنتكلم عن القطع البديلة و نعرفها بشكل احسن...

بما اننا قولنا فى الموضوع السابق ان القطعة الاصلية هى الافضل يبقى لما نيجى نشترى قطعة بديلة هيبقى الاختيار المنطقى هو ان الواحد يشترى قطعة بيدلة بيعملها نفس المصنع اللى بيعمل القطعة الاصلية...

يعنى مثلا لما نشترى طقم بوجيهات نجيب الطقم الNGK لأن هى اللى بتعمل البوجيهات الاصلية



و لما تشترى سرير كاتينة تشترية Gates لان هى اللى بتعمل السير الاصلى



و لما تشترى طلمبة بنزين تشترى الKAFUS لان هى اللى بتعمل الطلمبة الاصلى و لما تشترى بلى عجل اشترى الNSK لان هى اللى بتعمل البلى الاصلى

طيب هنا فيه سؤال مهم... ليه منشتريش القطعة البديلة اللى بيعملها الناس دى و منشتريش الاصلى طالما اغلى؟؟؟؟

سؤال وجية... و اجابتة سهلة... GM بتبقى حاطة مواصفات للجودة و الاداء للقطع اللى بتقبلها و المصنع اللى بيورد القطع دى لازم يلتزم بيها و الا GM مش هتقبل القطع دى و بالتالى لما بتشترى الاصلى بتبقى عارف كويس اوى اوى ان القطعة مناسبة للعربية و هتشتغل كويس اوى و عمرها الافتراضى طويل

انما لما بتشترى القطعة البديلة فا المصنع ممكن فى اى لحظة يغير من خامات المنتج اللى بيعملة او مواصفاتة و دة ياثر على اداءة او عمرة الافتراضى و بالتالى ميبقاش كويس زى الاصلى او عمرة الافتراضى يبقى اقل من الاصلى و دة واضح فى مثالين:

اولهم طقم الدبرياج الفاليو... زى ما احنا عارفين ان الطقم الاصلى صناعة شركة فاليو انما الطقم الفاليو اللى بيتباع فى السوق اقل بكتير فى الكفاءة و الاداء من الاصلى و دة منعكس بوضوح على فرق السعر (سعر الاصلى حوالى ضعف الفاليو)



ثانيهم هو تيل الفرامل... زمان كان اللى بيعمل التيل هو مصنع سانج شاين و كان بينزل تيل باسمة فا انا قررت اشترى السانج شاين لانة كان اخرض (45 جنية مقابل 90) و كان شغال كويس بالرغم من انه كان بيخلص اسرع من الاصلى... فى مرة من المرات اشتريت طقم سانج شاين و طلع مش بيفرمل خالص و كان هيخللينى اعمل حادثة و ناس كتير كانت بداءت تشتكى فا واضح ان المصنع غير تركيبة التيل و دة انعكس على كفاءة التيل



نفس الكلام حصل مع التيل الجولد صحيح مش هو اللى بيعمل الاصلى بس التيل الموجود النهاردة ناشف بزيادة و مش هلو مقارنة بالتيل الجولد اللى كان موجود اول ما ظهرت الماركة دى فى السوق



طيب يعنى كدة نشترى البديل ولا الاصلى؟؟؟

تشترى البديل طول ما هو متجرب و معروف انه كويس... يعنى محدش اشتكى من البوجيهات الNGK و السيور الجيتس ولا الطلمبات الكافوس... يبقى خلليك فيهم و وفر فرق الفلوس

انما مثلا فى التيل هات الاصلى... طقم الدبرياج هات الاصلى... و هنا بيبقى فرق السعر بين الاصلى و البديل كبير و بيديك مؤشر ان البديل بعيد اوى عن الاصلى فى الكفائة

كدة يبقى غطينا البديل اللى عاملة نفس المصنع اللى عامل الاصلى... و عرفنا انه اما زى الاصلى او اقل منة بحاجة بسيطة... بس هل دة يعنى ان مفيش حاجة احسن من الاصلى؟؟؟

لا طبعا فيه... زى ما فيه مصانع بتعمل الحاجات الاصلى فيه مصانع بتعمل حاجات افضل و اعلى من الاصلى... مثال على كدة الطنابير

فيه شركات عالمية فى مجال صناعة الطنابير بتعمل منتجات لعربياتنا زى مثلا شركة بريمبو... الشركة دى بتعمل الطنابير بتاعت عربيات عالية اوى اوى زى الفرارى و البى ام دابليو و ليها خبرة طويلة جدا فى المجال دة فا لما بتعمل منتج بيبقى منتج الquality بتاعتة عالية و عمرة الافتراضى طويل و تشترية و انت متطمن على الاخر و كمان تبقى واثق انة افضل من الاصلى او اضعف الايمان مش هيقل عنة باى حال من الاحوال



مثال اخر هو التيل... شركة عالمية زى شركة EBC بتعمل تيل فرامل لعربياتنا و لو حد فيكم دخل على موقع الشركة او شاف الفيدوهات بتاعت تصنيع التيل الEBC هيعرف ان دة منتج بمستوى جودة عالمى و بالتالى لما تشترية تركبة و انت متطمن تماما



مثال تالت هو المساعدين... شركة عالمية ليها 26 مصنع على مستوى العالم زى شركة مونرو لما تعمل منتج و تدى علية ضمان يبقى اكيد المنتج دة محترم و تقدر تشترية بكل ثقة

معنى كدة ان لو فيه مصنع عالمى بيعمل قطع غيار للعربية هيبقى كويس و مضمون و تقدر تركبة و انت متطمن بس طبعا لازم تبقى عارف ان فيه فرق سعر فى الموضوع

طيب كدة غطينا المنتجات اللى زى الاصلى و الاعلى من الاصلى.... هل معنى كدة ان مفيش قطع غيار تانية كويسة؟؟؟

لا طبعا فيه و الامثلة كتير...

اول مثال هو سلوك البوجيهات... من تجاربى السابقة لقيت ان طقم السلك الاصلى عمرة الافتراضى مماثل تقريبا للاصلى و اداءة مفيش فيه فرق عن الاصلى... انما فية فرق سعر كبير بينهم (130 مقابل 45) بالتالى مش من المنطقى انى ادفع 3 اضعاف التمن فى قطعة هتعيش نفس العمر الافتراضى و هتدينى نفس الاداء... الطقم البديل دة اللى هو الKODAECS الكورى



مثال اخر هو قواعد الموتور... القواعد عندنا مش بتتحمل و بتتقطع بسرعة و بالتالى معدل استهلاكها عالى... القواعد الاصلى سعرها حوالى 3 اضعاف الكورى و عمرهم الافتراضى تقريبا واحد... يمكن الفرق الوحيد ان القواعد الكورى بتحسسك باهتزازات الموتور سنة زيادة بس دة مش فلارق معايا (او الفرق اللى عاملة الموضوع دة مش مستاهل انى ادفع 3 اضعاف الفلوس)



مثال تالت هو البطاحات... البطاحات الكورى شغالة زى الفل و مفيش فيها اى مشاكل و سعرها حوالى نص سعر الاصلى... يبقى ليه ادفع ضعف التمن فى حاجة مش هتدينى افضلية او ميزة مقابل فرق الفلوس؟؟



مثال رابع هو سير الكاتينة... فية سيور ماركات اخرى غير الجيتس كويسة زى الدايكو الايطالى... سعرة قريب من الجيتس و بيدى نفس مدة الخدمة



اعتقد كدة انتوا اتلخبطوا على الاخر... الاصلى لا يعلى علية بس فيه احسن منة... و فية زية و فية اقل منة بس شغال زى الفل.... نشترى ايه طيب؟؟؟؟؟؟؟؟؟؟؟؟؟؟؟؟؟؟

مفيش اجابة قاطعة للموضوع دة انما فية قواعد هى اللى ممكن تدلك للاجابة حسب كل موقف

يعنى مثلا لو بنتكلم فى حاجة حساسة و خطيرة زى مكونات الفرامل او مكونات ميكانيكية اساسية للموتور زى السبايك و طلمبة الزيت و بلى الكاتينة و سير الكاتينة... دى حاجات مفيهاش هزار... اما تجيبها الاصلى او تجيب حاجة احسن من الاصلى او تجيب المنتج اللى بيعملة المصنع اللى بيعمل الاصلى بشرط... انك تسال الاول اذا كان البديل دة بيعمل مشاكل ولا لا

يعنى كمثال سيور الكاتينة الاصلى معليهاش طلب كبير لان معظم الناس بتجيب الجيتس بالتالى اللى عندة سير اصلى ممكن يبقى متخزن عندة من مدة طويلة و بالتالى ممكن يتقطع بعد وقت قصير من الاستخدام... العيب هنا مش فى القطعة انما فى طبيعة السوق المصرى

غير كدة تجيب التيل الاصلى و الماستر العمومى الاصلى و طنابير صناعة محترمة... طلمبة زيت اصلى و نفس الكلام فى اطقم الصبابات و الكستبانات و طلمبات المية و مكونات المحرك الرئيسية... نفس الكلام ينطبق على المكونات الكهربائية و الالكترونية زى الحساسات و البوبينة

بالنسبة للقطع اللى تدخل تحت بند الصيانة الدورية زى الزيوت و الفلاتر و البوجيهات و السيور (معدا سير الكاتينة و البلى بتاعة) فا هنا الاختيارات كتير لان القطع غالبا مش بتبقى غالية و فيه بدائل كتير... يعنى ممكن تركب فلتر هوا كورى و فلتر بنزين كورى عادى... بس ب3 شروط:

اولا ميبقاش صينى و مكتوب علية كورى (و دة هنتكلم عنة فى موضوع المضروب) عشان كدة القطعة هتتلف فى زمن قصير جدا و فولسك هتبقى اترمت على الارض

ثانيا يبقى فرق السعر بينة و بين الاصلى يبقى كبير و يستاهل... يعنى متجيبش فلتر بنزين كورى ب40 و الاصلى ب45

ثالثا انة يبقى بديل حقيقى مش حاجة غلط... يعنى متجيش تركب طقم بوجيهات مش بتاع العربية و مفيهوش المقاومة بتاعت التشويش على الكونترول و تقول دة بديل... او تحط مية حنفية فى الرادياتير و تقول دة بديل

لو بنتكلم فى حاجات اقل اهمية زى قواعد الموتور و سلوك البوجيهات (حاجات لو تلفت مش هتسبب خسائر مادية او توقف تام للعربية) هنا تقدر تجيب بديل سعرة حنين لان الفرق بينة و بين الاصلى مش كبير فى الشغل لكن فرق السعر كبير جدا (فرق الفلوس اكبر بكتير من فرق الاداء و العمر الافتراضى)

مثال لكدة خرطوم البخار اللى على شكل حرف T... الخرطوم دة اصلى ب70 جنية و فية منة مصرى ب25...

ايه هى خطورة الخرطوم المصرى اللى تبرر انى ادفع 45 جنية زيادة عشان اجيب الاصلى؟؟؟... ولا حاجة بالتالى هنا اقدر اجيب مصرى او كورى... حاجة تؤدى الغرض و مفيش خطر منها



نقطة مهمة لازم تاخد بالك منها و هى سهولة تغيير القطعة... يعنى متجيش تسترخص فى ترموستات كوعة و تشترى ترموستات معفن ب 20 جنية عشان توفر 20 ولا 30 جنية و بعد ما تركبها يحصل مشكلة و تلاقى نفسك عايز تفك الكاتينة بالكامل عشان تغيرالترموستات تانى و تشرب مصنعية 100 جنية على الاقل غير تمن مية التبريد اللى هتنزلها على الارض او على الاقل هتفقد جزء مش قليل منها... نفس الكلام فى البلى الامامى على سبيل المثال و يضاف عليها ان البلى لو تلف ممكن يبوظ الصرة فا تبقى تكلفة صيانة بزيادة عليك...

لو القطعة مش سهل تغييرها فى المستقبل حاول تجيب حاجة مضمونة اوى عشان مصنعيات التغيير هتضيع اى توفير انت عملتة قبل كدة و نفس الكلام يتطبق لو القطعة ممكن تسبب تلف قطع اخرى لو هى نفسها تلفت

ارجو ان يكون الموضوع افادكم و برضة لو فيه حاجة وقعت منى ياريت حد ينبهنى

MMamdouh

المشاركة الأصلية كتبت بواسطة MohammedAladel

شكراً على الموضوع الرائع

شكرا ليك

حضرتك تتحدث هنا عن قطع الغيار البديلة بخصوص شركة فاليو الفرنسية بخصوص طقم الدبرياج
حضرتك تقصد أن شركة فاليو نفسها أصبحت تصنعه بمواصفات أقل وأصبح ردئ الصنع ؟
أم تقصد أن هناك شركات أخرى تقلد المنتج وتبيعه على أنه فاليو أصلى ؟

انا مجيبتش سيرة التقليد خاااالص... انا هنا بتكلم عن قطع الغيار البديلة..... التقليد و المضروب هيبقى له موضوع منفصل ان شاء الله

نقطة أخرى ألا وهى المواصفات التى تضعها GM لو تعاملت مع شركة مثل فاليو أو جيتز على سبيل المثال ... أنا من وجهة نظرى أنه موضوع تجارة لأن هناك شركات كثيرة تستطيع صناعة نفس المنتج بنفس الجودة ولها نفس السمعة الطيبة .... وأيضاً لن أعتقد أن شركة مثل جيتز بسمعتها العالمية كجودة وعمر افتراضى طويل ستنتظر شروط جودة GM بالصورة التى تجعلها تنزل نفس المنتج بمواصفات أقل للسوق العادى لأن هذه الشركات نفسها لها قوانين وضوابط لو تنازلت عنها أصبحت مثلها مثل الشركات التى تصنع القطع المضروبة

انا مقولتش حاجة غير كدة... بس فيه نقطة اختلطت عليك

مش شرط ان GM لأيها شروط معينة فى المنتج بتاعها يبقى فاليو ولا جيتس بتعمل شغل اى كلام...

انا شركة بتنتج سيارات ليا مواصفات خاصة... انت بتغطيها بمنتجك العادى يبقى حاجة كويسة... مش بتغطيها هيبقى مطلوب منك دة عشان انا اخد منك انتاجك احطة فى عربيتى

انت بقى بتنزل منتجك العادى فى السوق و بتبيعة انت حر... و كمان حر تغير مواصفات منتجك دة زى ما انت عايز و التغيير دة ممكن يغير فى كفاءة و عمر القطعة بدون ما حد يقولك انت بتعمل ايه

المستهلك لازم يبقى فاهم دة و عارف ان المنتج اللى بيشترية النهاردة ممكن بكرة ميبقاش بنفس الكفائة طالم انه مش الاصلى و علية لوجو GM

علمت أن طلمبة بنزين ميجان 2 هى نفسها طلمبة اللانوس وكثير من السيارات الأخرى وفى سيارتى نوعها بوش .... ولكن قلما تجد البوش فى السوق ... وهذه الطلمبة 99 بالمئة من المنتشر فى السوق منها مضروب ويباع بأسعار عالية وهى لا تساوى 30 جنيه !
فلو تكرمت أخبرنى عن ماركة كابوس التى تتحدث عنها وأين تباع ؟

معتقدش ان طلمبة الميجان هى هى طلمبة اللانوس... ممكن يكون قصدك على الموتور اللى جوة الطلمبة و هنا يبقى الموضوع سهل... روح توكيل بوش (شركة A part بالتجمع الخامس) و اشترى منهم موتور طلمبة بوش اصلى و ركبة جوة الطلمبة بتاعتك

وأين تباع أيضاً مساعدين مونرو ؟

مساعدين مونرو وكيلها غبور... و دة له مركز توزيع فى اخر شارع مراد من ناحية ميدان الجيزة جنب منزل الكوبرى قصاد جاد

و فية موزعين معتمدين لمونرو زى:

- ابو الحسن فى شارع المرور - بين السرايات
- هشام لهيطة فى شارع ذكى - التوفيقية
- المواردى فى شارع مصطفى رضا متفرع من شارع المنيل - المنيل

وحدثتك سابقاً على الفيس بوك عن شحم الفرامل الذى يوضع على مسامير الكايبر ؟ أين يباع ؟ وما أسمه لأن هناك من يقول أن شحم السيليكون يصلح للفرامل وآخرون يقولون أن شحم الليثيوم هو الأصح
مع العلم أن فى كتالوج الصيانة لسيارتى مكتوب أسم غريب له وهو Frenbloc !

اللى قريتة ان مينفعش تستعمل شحم اساسة مواد بترولية... لازم يبقى اساسة سيليكون او يكون تخليقى

للاسف لا اعرف اسامى منتجات ولا موجود فين فى مصر

MMamdouh