بتحلم بإيه لنايل موتورز؟

**OlaOsman** · 28-09-2008 11:24 PM

من سنتين بالظبط مجلس إدارة فريق زدني طلب من أعضاء الفريق كلهم انهم يقولوا بيحلموا بإيه لزدني و خلانا نتخيل زدني بعد 20 سنة هايكون شكلها ايه و قسمونا فرق و كل فريق يطلق العنان لخياله و يحلم لزدني.. ساعتها انا فاكرة كويس ان م/محمد الدالي (هو حاليا بيحضر للدكتوراة في كندا) ساعتها قال لنا إحلم لزدني.. إحلم و ما تحطش سقف لأحلامك.. يعني كل شئ ممكن. و فعلا ده اللي حصل و كل فريق حط أحلامه لزدني على شكل PowerPoint Presentation و كل فريق اختار اتنين منه يقدموا مشروع أحلامه لزدني. الأحلام دي كان منها أكاديمية زدني العلمية العالمية و مقرها القاهرة.. وكالة زدناسا الفضائية و مقرها الخرطوم.. أكاديمية زدني للفنون الراقية و مقرها اليمن.. افتتاح قناة زدني الفضائية3.. و هكذا.

اللي حصل انه في الميتنج الأخير لأعضاء فريق زدني من إسبوعين فقط أعلن د. محمد عمر رئيس الفريق عن قرب افتتاح فرع زدني في السعودية بعد العيد ان شاء الله و سفر اتنين من أعضاء الفريق عشان يديروا الفرع هناك.. و في خلال الشهرين القادمين فيه فرع هايفتح في السودان و بعده ان شاء الله في اليمن. انا و باقي الناس اللي اشتغلت في مشروع أحلم لزدني ما كناش مستغربين الأخبار دي خالص عشان حلمنا و ما حطناش سقف لأحلامنا و ده نتاج طبيعي للحلم مع العمل، بعد سنتين فقط من الحلم لقيناه بيتحقق و كنا فرحانين أوي عشان حاسين اننا جزء من تحقيق الحلم :)

طيب ما تيجوا نعمل كده برضه مع نايل موتورز.. المكان اللي بنقضي فيه كتير من وقتنا و بنفيد فيه بعض و نستفيد.. تعالوا نحلم له و ما نحطش سقف لأحلامنا.. انا عن نفسي سرحت امبارح مع نفسي و تخيلت ان نايل موتورز بأت أول قناة فضائية عربية تهتم بكل ما يخص السيارات.. مش زي القنوات الموجودة حاليا على النايل سات و اللي بتهتم بس بالسباقات و الفورميولا.. لأ دي قناة فضائية شاملة كل حاجة عن العربيات.. و مافيش حاجة بعيدة و لا مستحيلة.

انتوا بأه بتحلموا بإيه لنايل موتورز؟ ما تنسوش.. إحلموا و ما تحطوش سقف لأحلامكوا

**Nader** · 28-09-2008 11:31 PM

بحلم لة انة يكون اكبر منتدى متخصص في عالم السيارات بمصر

والعالم العربي.

بحلم باصدار تقارير موسمية عن حالة السوق المصرية.

بحلم بلن يكون لة صوت مسموع ويكون سند ضد جشع بعض

التوكيلات.

الاحلام دي مش بعيدة، ان شاء الله تتحقق في المستقبل القريب.

**OlaOsman** · 29-09-2008 12:02 AM

الله عليكوا يا شباب.. هو ده الكلام

**TIMODAX** · 29-09-2008 12:20 AM

يكون ليه صوت ضد جشع تجار العربيات بعد ما فقدنا الثقه في صحف السيارات اللي بقت عباره عن نشرات اعلانات مش أكتر

و تفعيل الدور ده عن طريق الاتصال بجمعيات حقوق المستهلك و جمعيات اللي هيا ضد الغلاء و الحوارات ديه
و كل سنه و منتدانا الجامد جامد

**Ahmed.kamel** · 29-09-2008 12:38 AM

كان أحد الاصدقاء الاعزاء أقترح أن المنتدى يبدأ يكون أكثر تفاعلية وأن نعمل مقارنات عملية للسيارت وتقييم ليها ...حاجة زى برنامج توب جير كده...ويكون المتطوعين من أعضاء المنتدى بسيارتهم ...أعتقد موضوع بالشكل ده تعتبر نقلة جديدة وتتطور فنوع المعلومات اللى بيقدمها المنتدى وبشكل تنافسى ....مش عارف الموضوع ده وصل لفين بس محتاج أهتمام وتبنى من أداره المنتدى ...وكل سنة وانتم طيبين ...وتصبحوا على خير بالمره ...

**iunknown** · 29-09-2008 12:45 AM

بحلم بتفعيل دوره كمنظمة من منظمات المجتمع المدني

الجرايد خلاص بقة حاكمها هتعمل كام اعلان عندي وانا اقول ان عربيتك احسن اختراع بعد الكهربا

بحلم ان اعلان العربية الفلانية ييجي يقول انها احسن سيارة عائلية في تقييم نايل موتورز لسنة 2010

بحلم بتجار ومستوردين ووكلاء بيعملوا للتقييم السنوي بتاع نايل موتورز الف حساب هيقول ايه على عربيتهم من موتور لاتزان لخامات لكماليات
على حملاتهم التسويقية و مندوبي مبيعاتهم
علي خدمات ما بعد البيع عندهم

بحلم ببرنامج زي توب جير بيقدمه ويعده ويشرف عليه ناس زي استاذ خالد سبعاوي واستاذ ممدوح وابو عبدالله والكثير والكثير من اعضاء المنتدي الفوق متميزين

بحلم بمجلة اسبوعية ولا حتى شهرية فيها ملخص المقالات المتميزة وفيها تقيمات وتحليلات وتجارب تفيد كل محبي السيارات

كل ده مش بعيد يتحقق

**abdelaziz-waleed** · 29-09-2008 12:53 AM

بحلم اسمع الاخبار

اخبار السيارات: غادر البلاد اليوم وفد نايل موتورز متوجها الى فرنسا بناءا على الدعوة الموجهة من شركة بيجو لفحص وابداء الرأي في السيارة الجديدة بيجو 310

تم القبض على مدير معرض عوكل للسيارات بعد التأكد من انه يقوم ببيع سيارات بها خبطات ومتصلحة على انها سيارات زيرو. وهذا بعد ان اخطر فريق نايل موتورز بهذه المعلومات بعد فحص سيارات المعرض

انتهى مدربي نايل موتورز من دورتهم التدريبية الرابعة في صيانة السيارات بقيادة المدرب سبعاوي واداب المرور بقيادة المدرب توت عنخ امون. وقد حضر الدورة التدريبية 250 شخص من مختلف الدول العربية

ولسة حاجات كتير
انا نفسي اول ما واحد من نايل موتورز يدخل على صاحب معرض سيارات او قطع غيار كأن عذرائل دخل عليه من شدة الخوف

**علي66** · 29-09-2008 12:57 AM

تطوير الصفحة الأولى للموقع http://www.nilemotors.net
وأن يكون المنتدى جزء من موقع متكامل يهتم بكل جوانب السيارات
بحيث تعرض اسعار السيارات ومواصفاتها وصورها وتقييمها والمقارنه بين انوعها من حيث مواصفات كل كل سيارة
واسماء وعناوين الوكلاء وعارض البيع والصيانة المعتمدين
وكذلك معومات اساسية عن السيارات والمحركات والقيادة وغيرها
وحيث كانت البداية في كوناكت أن شاء الله يتفوق نايل موترز ويغني الزوار والأعضاء عن أي موقع آخر
والأعلانات المعروضه تكون كثيرة وعمل دعاية للموقع في صفحات وصحف السيارات