بسم الله الرحمن الرحيم
تحيه من القلب عاما لكل مرتادى قسم تويوتا
وتحيه من القلب خاصه لمالكى الوحش اليابانى
((( كورولا 2014 )))
اليوم الجمعة الموافق 12 / 2 / 2014
وهذا يوم مع كورولتى الحبيبه
وطبعا انا مبخبيش عليكما حاجة بينى وبينها وده مزعلها منى انى بطلع اسرارنا الشخصية للمجتمع والناس بس فداكوا
طبعا الكورولا 2014 تفاصيل الاضائة فيها كالاتى :
الفوج لايت .. H16 19W
النور الواطى .. H11 55W
النور العالى .. HB3 60W
من القائمة الى فوق تلاحظ ان فية مشكلة فى الفوج لايت وهو انا القدرة بتاعته ضعيفة شوية للطريق مقارنه حتى بالموديلات السابقه للكورولا ..
لذلك كان فية اجتهادات مننا كلنا ان نعدل الاضاءة مبدئيا فى الفوج لايت باضائة اقوى وكانت كما فعل معظم زملائنا منهم فى التوكيل ومنهم عملها بره التوكيل ..
وكان الاستبدال الفوج لايت .. H16 19W باخرى H11 55W
وفى الاورجينال كانت Osram وفى التغيير كانت Osram.night breaker plus وكانت النتيجة مرضية تمام اللجميع ولمبات المانى معمره ..
واليوم لابد ان ناتى بالجديد وهو
تركيب لمبات زينون بالاجهزة بتاعتها على الفوج لايت
خارج التوكيل بشغلى ايدى
..:: نبدا الحكاية ::..
1 - اختيار اللمبات : السوق مليان لمبات الزينون ومتنوعة وللاسف كلها صينى والى يجتهد ويقول كورى وفى الاخر بتطلع صينى وعن تجارب كتير قبل كدة .. لكن ما لا يوجد خلاف عليه ان لازم نجيب لمبه H11
ملحوظة : فية لمبات مكتوب عليها 35 وات واخرى 55 وات .. اية الفرق ؟
مفيش فرق بينهم الى هيحدد قدرة اللمبة هو الجهاز الى هيركب للمبه وجربت الاتنين على جهاز 55 وات ونفس النتيجة على اللمبتين
سعر اللمبات 95 جنيه 8000K 55W H11
ودى الصورة للايضاح
2 - اختيار الجهاز : نفس الكلام السوق مليان اجهزة كتير جدا ومنها الى مكتوب عليها made in Germany وهو صينى لان سعره 550 جنيه للجهزين بس صينى محترم شوية ودة الى انا جبته بعد كتر الاسئلة واللف والدوران لحد ما رجلى دابت
ودة صورة للايضاح
3 - الخطوة التالته بقى انك تجمد قلبك شوية وتنزل معايا تحت العربية علشان نفك
- فك بطانة الرفرف عباره عن مسمارين 10 وكليبس
- هنبدا الاول بالصور مع بعض واحدة واحدة بفك المسامير ببيبه 10 زى ما انا ماسكه فى الصورة كدة
العربية مليانه طين من تحت معلش اعذرونى لان الوقت ضيق انا يدوب غسلت الكاوتش بس الطين الى فيها ناشف محدش يخاف مش هيتعك
- نبدا نفك المسامر التانى بنفس الطريقة بالضبط وبرضة الصورة الجاية هتوضح اكتر
- لو لاحظتوا فى الصورة السابقة ان فكيت المسمار وسبته ماسك على حاجة بسيطة بس علشان اوضحها اكتر وبدات افك فى التانى
- يبقى لينا حاجة واحدة بس وهو الكليبس ويتم فكه عن طريق مفك عادى او مبطط ويتحك فى حافه الكليبس والضغط لاسفل والصورة هتوضح لينا اكتر بس محتاجة تركيز شوية مكان راس المفك علشان تشوفه هو داخل فين بالضبط
- اعتقد الموضوع سهل خالص .. كدة بطانه الرفرف اتفكت بس متشالتش من مكانه وماسكه من فوق وبدات تتحرك معاك عادى خالص ومتاحة ليك انك تبدا تمد ايدك وتفك اللمبة الاورجينال الى راكبه ودى صورة توضح اكتر
- نبدا نفك اللمبة الاورجينال كالاتى : تفك الكهرباء الاول منها بالضغط على لسان او ريشة الفيشة والسحب لاسفل .. ثم حركه اللمبة عكس عقارب الساعة .. كدة اللمبة اتحررت من مكانها شيلها وعينها فى مكان اامن علشان متكسرش ودى صورتها
4 - تركيب لمبات الزينون والجهاز
طبعا الجهاز للامان ليس اكتر ولا اقل لفه بحته فيل او الورق الابيض الى هو بيجى فيه ولفه حوليه شكرتون علشان تعزله عن الميه وكدة وبيتثبت باى افييز بلاستيك علشان ميتحركش دة بالنسبة للجهاز
بالنسبة للمبات الزينون هتركب مكان اللمبات العادية وتوصل بالجهاز والجهاز يتم توصيله بالفيشة الاساسية الى جاية من البطارية .
حصل موقف ضايقنى شخصيا اثناء العمل
- تم تركيب لمبة وجهاز وتم تقفيل بطانة الجنب اليمين وشغال وزى الفل وتم التجربه
- ما فعلناه فى الجنب الايمين نعمله فى الجنب الايسر بالكربون وتم بالفعل وتم تجربة اللمبات الاول مباشره على البطارية مع الجهاز المخصص لها وزى الفل
- تم تركيب الجنب الشمال وعند توصيل كبل اللمبة فى الجهاز والتشغيل تم توقف اللمبتين واقسموا بالله انهم مش شغاليييين تانى
(((((( حصل مشكله )))))
- نبدا تانى فك اللمبة الاخيرة والجهاز وتركيب اللمبة الاورجينال (( نور الفوج لا يعمل ))
- جه فى دماغى على طول الفيوووز شييع وتم مراجعته وبالفعل الفييوز شيع
- تم تركيب فيوز من الاحتياطى الى نازل مع العربية بعد فك اللمبة والجهاز اشتغل وبعد كدة وقف تانى وتم تشييع الفيوز التانى
(((((( حصل مشكله )))))
يبقى هنا فية مشكله او فية حاجة غلط انا عملتها وانا مش واخد بالى وبعد تشييع فيوزين اكيد مش هضحى بالتالت ابدا
(((((( حل مشكله )))))
الجهاز الزينون الى كان راكب فى الشمال كان فية قفلة داخله كان بيعكس الكهربا فبيطير الفيوووز ( يعنى العيب مش فيا ياعم الحج العيب فى الجهاز )
- تم مراجعة البائع وتم التبديل بجهاز اخر والحمد لله الفيوز سليم والانوار شغاله
ودى صورة للايضاح
طبعا الصورة بالنهار فمش قادر تمييز اوى الاضاءة او قوتها او مدى انتشارها
فقولنا علشان محدش يتكلم نستنى الليل يسدى ستائره وياتى الظلام بس الحقيقة الفرصة لن تسمح لى بالانتظار فجاء الرد من شركه الكهرباء بانقطاع التيار الكهربائى لمدة ساعة قولت والله حاسيين بيا انى عايز اجرب الزينون والتعب الى تعبته هههه
ودى صورة للايضاح
فى نهاية المساء بعد التعب قولنا نروح الجراج بقى نركن العربية وكفاية الفيوزين الى شيعوا دول نروح نشوف هنجيب فيوزات اصلية منين واخدنا صوره علشان نشوف النور بيفرق وفارش على الارض ولا لا
كدة الامورة الشطورة دخلت الجراح بتاعها وبتمسى على الناس الحلوة بعد ما نشفت دمى وتعبتنى النهاردة كانت عملية ولادة مستعصية وانا نايم تحت العربية ولا بلية العجلاتى
ودى اخر صورة اخدتها للكورولا من داخل الجراج وهى بتستغيظ باصحاب القلوب الرحيمه
اى حد يقدر يوفرلها فيوزين مكان الى شيعوا وله الاجر والصواب على الله
علشان كدة مكنتش عايزة تسبنى الا لما ارجعلها الى فوقد منها من فيوزات
فى النهاية
اتمنى يكون الموضوع خفيف ونال اعجابكم واى استفسارات انا تحت امركم
تحياتى
د . محمد أبو فندى