الموضوع: قابلت Hema_Basha ربنا يجعله من اهل الجنة

انهاردة وزي ما اتفقنا إمبارح اتقابلنا في رأس البر

وبصراحة كانت مقابلة محترمة جدا من إبراهيم إنسان محترم واحسبه على خير ولا أزكي على الله
ركبت معاه العربية وكان معايا أخويا وواحد صديقي
بدأنا نتحرك بالعربية وهو كان سائق وبدأنا ندردش عنها واخبار استهلاكها والتوكيل وووو
ومرة واحدة لاقيت إبراهيم ربنا يبارك فيه ويحفظه ويجازيه عني كل خير ويرزقني وإياه حسن الخاتمة
وقف بالعربية وبيقولي سوق
قولتلوا لا الله يكرمك وهو صمم اني أسوق رغم اني كنت كاتب اني محتاج اركب مع صاحب العربية بس ومش شرط أسوق بس هو خلاني أسوق عشان احس بيها أكتر
وفعلا اتحركت بالعربية وحبيت اشوف موضوع النتشة دي اللي ناس كتير بتكلم عنها
انا فعلا حسيت بيها بس هي حاجة كدا لا تذكر وميخدش باله منها إلا اللي يركز معاها
والعفشة متوسطة مش ناشفة وبصراحة محبتش أجرى بالعربية واعمل مناورات بس عملت كيك داون خفيف العربية عايزه تجري
واتمشيت بالعربية شوية وبعد كدا نزلت وربنا يبارك فيه ويحفظه وصلنا مكان ما اتقابلنا ومشينا وبصراحة كان انطباعنا ممتاز جدا

انا زي مقولت قبل كدا ان اول تعارف ليا مع المنتدى لما كنت بسال عن الايمجراند

بس عمرى مكنت أتخيل للحظة أن في تعاون يوصل لدرجة انك تجرب عربية واحد زميل في المنتدى ومتعرفهوش ولا هو يعرفك لمجرد أنه حابب يساعد بدون أي مقابل ولا مصلحة وأسأل الله أن يكون عمله هذا خالصاً لوجه
والله انا لما رجعت البيت وحكيتلهم عن اللي حصل قالولي والله لو الشعب المصري بقى متعاون مع بعض كدا زي إبراهيم الخير هيعم على الكل وهنبقي أحسن شعب في العالم من حيث التعاون وحسن الظن بالآخر ودي بالذات بقيت مفقوووودة لأبعد الحدود

انا عارف انى طولت عليكم سامحوني :)
بس كان لازم احكي تجربتي دي لاني بجد فخور جدا جدا بمعرفة إبراهيم ومهما أقول مش هعطي إبراهيم حقه
وجزاكم الله أهل المنتدى عن الجميع خير الجزاء

المشاركة الأصلية كتبت بواسطة nonalaziza

ربنا يباركله ع العربية و نستلم على خير ان شاء الله.
انا جايه راس البر بكره علي فكرة هههههههههه

ياااااه ده راس البر تنور والله
والله احلي حاجة في المنتدي هنا ان ماشاء الله كله ناس محتزمة ومحدش بيبخل علي حد حاجة

المشاركة الأصلية كتبت بواسطة J A G U A R

ربنا يديم روح التعاون بين الاعضاء وبين كل الناس ..

اللهم امين يارب

يا باشا والله كتر الف خيرك وده اقل حاجة والله وبجد ربنا يكرمك علي كلامك اللي بجد مش لاقي رد يوفي اللي عاوز اقوله وانا بجد اتشرفت بمعرفتك يا اسلام وانت برضوا انسان محترم وربنا يجازيك خير علي كلامك الجميل ده بس برضوا كان نفسنا نعمل معاك اي واجب بس انت كنت مستعجل

المشاركة الأصلية كتبت بواسطة hema_basha

يا باشا والله كتر الف خيرك وده اقل حاجة والله وبجد ربنا يكرمك علي كلامك اللي بجد مش لاقي رد يوفي اللي عاوز اقوله وانا بجد اتشرفت بمعرفتك يا اسلام وانت برضوا انسان محترم وربنا يجازيك خير علي كلامك الجميل ده بس برضوا كان نفسنا نعمل معاك اي واجب بس انت كنت مستعجل

واجب اكتر من اللي انت عملته :)

انا كان عندي عقد قران بليل زي مقولتلك وروحت متأخر شوية وظبطوني ف البيت الصراحة :d

وان شاء الله المرة الجاية نتقابل لما استلم العربية ويكون معانا أكرم
وبإذن الله معرفة خير

المشاركة الأصلية كتبت بواسطة nonalaziza

محدش اداني لفه

شرفينا انتي بس في دمياط واحنا نعمل معاكي الواجب ومتخافيش احنا مش من الدمياطة اياهم