استفسار عن العدادات في الصني 2014 الاوتوماتيكك اللي بي 110

يا جماعه انا اشتريت عربيتي من القرش وخدتها واللي كان بيسلمهالي شرحلي حاجات فيها ومنها العدادات... قالي العربية ماشية 17 كم ووراهالي.. لحد كده كويس... روحت وقلت افول التانك ﻷني لاقيت علامة البنزين بتروح وبتيجي في العداد .. فأول لما فولت العربية .. لاقيت حاجة غريبة في العداد ظهرلي رقم 475 كم وكل لما امشي للبيت الاقي الرقم بيزيد وفجاة لاقيت الرقم وصل 531 وبعدين نزل لي 529. طبعا انا اول لما فولت لعبت في الزرار اللي على الشمال في العداد وكان بيطلعلي ال trip وفيه وكمان لاقيت كلمة odo ومش عارف دي بتاعت ايه ... فعايز اعرف القرش كده لبسني في عربية ماشية 530 كيلو للعلم انا بيتي ورا دار الدفاع يعني من بيتي للقرش المسافه مش مكمله 3 كيلو وانا راكن العربية لحد لما ورقها يوصل. يعني ما اتحركتش بيها خالص.. انا عايز حد يشرحلي العداد ويفهمني موضوع ال 531 االي نزل لل 529 .. وكمان حد يقولي فين مؤشر الحرارة انا مش لاقيه خالص.. وجزاكم الله خيرا..

موضوع الكيلو متر الى ظهر دة مش عداد العربية
دة استهلاك البنزين يعنى العربية هتخلص البنزين بعد الكيلو متر الى حضرتك كاتبة

السلام عليكم بص ياباشا لما انت فولت ولقيت 531 ده بيعرفك ان البنزين اللي ف العربيه ممكن يمشيك علي السرعه دي حوالي 531ك وده بالتقريب مش اكيد ممكن لما السرعه تزيد تلاقي بيديك عدد كلوات اكتر ولما تقل السرعه او لما تيجي تسخنها تلاقيه مديك قراءه اقل وبالنسبه للodo ده عدد الكلوات اللي العربيه مشيتها وال TR A ده تخصصه للزيت يعني تصفره كل ما تغير زيت وال TR B ده تخصصه للرحلات او كل ما تفول تصفره عشان تعرف العربيه عامله استهلاك اد ايه داخل وخارج البلد وال ODO ده تسيبه ثابت عشان تعرف العربيه عملت كام كيلو اما بالنسبه لمؤشر الحراره ال EX نازله من غير بس في لمبه بتنور لو الحراره ارتفعت وربنا يباركلك فيها ويكفيك شر العين ودي معلوماتي ولو في حاجه خظأ الأخوه الأعضاء يعرفوهالك

الف شكر يا جماعه والله ... استاذ احمد كفييت ووفييت .. كنت رايح اتخانق مع القرش.. ربنا يباركلكم ... وشكرا مره ثانيه

كلام سليم
الف مبروك

[color="blue"]مبرووووووك العربية وربنا يديك خيرها ويكفيك شرها
بس لازم تحكيلنا اشترتها بكام و اية انطباعك عنها اول ما اركبتها[/color]

بصو يا جماعه طبعا بما اني موظف .. وبدخل البيت ببطيخه وجورنال.. هههههة فالله الحمد لفيت لفه محترمه جدا جدا تقريبا في كل التوكيلات ومعارض مدينة نصر ومصر الجديدة .. اللي اكتشفتو انهم في حرب شعواء ما بينهم ... المهم والاحسن ان فيه سعر بتاخد بيه المعارض من الموزعين ( السبع مثلا ) اكبر موزع بيدي للمعارض بسعر 113 الف وده اسمو السعر التجاري... اما بالنسبة لسعر المعارض فهو 114.5 ااو 114 ... فطبعا السبع اتجدعن معايا وجبلي سعر 114 ومعاه بون صيانة مجانية لحد ال 10 الاف كم + خصم على المصنعيات 50 جنيه لحد ال 100 الف + تركيب سنسور بارك خلفي... طبعا حاجات مغرية جدا جدا .. بس العين بصيرة والايد قصيرة ... وافتكرو البطيخه والجورنال ههههههههه... المهم انا جبت سعر 113 من معرض .. بس جبتها من القرش بي 113.25 ومحدش يسالني ليه ؟؟ يمكن استريحت للشخص اللي استقبلني.. ولاقيتهم محترمين لحد دلوقتي.

اما بالنسبة لرأيي في العربية ... فانا كان معايا شيفروليه لانوس 2009 زيرو .. بس كنت هلكتها اوي اوي ... فطبعا النيسان بالنسبالها كاني كنت متجوز ماري منيب ودلوقتي متجوز هيفا وهبي... انا عامل بيها للان 76 كم ولسه منتظر ورقها قالولي الاحد ان شاء اللهةهيكون موجود ....

سؤال بقااااا للاخوة اللي معاهم العربية .. ترخيص ال 3 سنين بكام ؟؟ ولو حبيت اامن اامن في انهي شركة ؟؟

يا جماعه حد يفيدني اامن فين وترخيص ال 3 سنين بكام ولو حبيت اركب فرش للعربية مين احسن واحد في رنج 500 جنيه ...

انا مليش فى قصة التأمين و الترخيص دى بس الفرش بالسعر ده انزل شارع دمشق فيه حاجات كتير

الف مبروك ياباشا

ترخيص 3 سنين حوالى 1200 ج

الف شكر يا جماعه ... ومعلش فيه سؤال تاني وانا آسف برخم عليكم بكتر الاسئلة بس الواحد لما بيتمدن بيجيب ﻷهله المشاكل ههههههه... واحد نصحني اني اشتري gps واركبه علشان لو العربية اتسرقت لاقدر الله ...طيب هيا انواعو ايه وبكام واجيبو منين وايه هيا طريقة عملو .. ﻷني سمعت انو ممكن تقفل العربية من موبايلك لو مركب gps

مبروك على العربية ألف مبروك . ربنا يرزقك خيرها ويكفيك شرها ،،،

بالنسبة للتأمين هقولك الخطوات بالفلوس :

تشتري ملف فحص وترخيص ملاكي 3 سنين ب50ج ومعاه ورق تأمين إجباري 3 سنين ب320ج ،،

بعدين هتروح تفحص العربية هناك في طابور كدا وترفع البصمة من فني بعدين المهندس هيمضيلك ،

تشتري طفاية حريق سعرها ب120ج تقريبا بعدين هتخلص ورقها وتسلمه وهتاخد لوحتين فاضيين ،

هتطلع تعمل صحة توقيع للفاتورة بتاعت العربية -لازم يبقى ختم البائع في كل ورقة عشان مافيش موظف يرخم عليك -

بعدين تقدم ورقك في شباك الملاكي وتستلم الرقم بتاعك ، هتنزل تختم اللوحتين بأرقامك ، بعدين تسيبهم عند خطاط يكتبلك عليهم ب10 ج،

هتطلع تاني تدفع 800ج ترخيص ال3سنين بعدين هتبصم مرتين وهتستنى 10 دقايق تستلم رخصة العربية ..

هتنزل تاخد اللوح وبعدين تخلي حد يركبهم ليك في العربية ..

وألف مبروك يا باشا ،،وآديك عرفت الخطوات ماتخليش حد يعمل معاك وياخد عمولة بس روح من 8 الصبح عشان الزحمة رهييييبة فعلا ..

بالتوفيق بأمر الله

وبالنسبة للتأمين فاسأل الوكيل اللي انت شاري منه ﻷن السبع كان عامل شراكة مع تأمينات مصر فالتعامل هيبقى معاه مش مع شركة التأمين ودا أفضل ،، التأمين 4500ج في أول سنة بعدين بيقل 20% كل سنة .. بالنسبة للتعويض فلو حادثة هم متكفلين ب100% من الخسائر أما لو سرقة فبيتكفلوا ب75% .. وطبغا لازم تصور مكان الحادثة لا قدر الله يعني باﻹضافة لعمل محضر في الشرطة

الف شك د. م نعمان ... فعلا رد شافي ووافي .. ووفر عليا عناء السؤال... طيب وايه اخبار ال Gps ...؟؟

مبروك وربنا يكفيك شرها

يفضل تركيبه فى التوكيل عشان الضمان
انا كمان سمعت ان شركات المحمول عملت الخدمة دى

اقتباس:

---

المشاركة الأصلية كتبت بواسطة Dr M.Noaman

مبروك على العربية ألف مبروك . ربنا يرزقك خيرها ويكفيك شرها ،،،

بالنسبة للترخيص هقولك الخطوات بالفلوس :

تشتري ملف فحص وترخيص ملاكي 3 سنين ب50ج ومعاه ورق تأمين إجباري 3 سنين ب320ج ،،

بعدين هتروح تفحص العربية هناك في طابور كدا وترفع البصمة من فني بعدين المهندس هيمضيلك ،

تشتري طفاية حريق سعرها ب120ج تقريبا بعدين هتخلص ورقها وتسلمه وهتاخد لوحتين فاضيين ،

هتطلع تعمل صحة توقيع للفاتورة بتاعت العربية -لازم يبقى ختم البائع في كل ورقة عشان مافيش موظف يرخم عليك -

بعدين تقدم ورقك في شباك الملاكي وتستلم الرقم بتاعك ، هتنزل تختم اللوحتين بأرقامك ، بعدين تسيبهم عند خطاط يكتبلك عليهم ب10 ج،

هتطلع تاني تدفع 800ج ترخيص ال3سنين بعدين هتبصم مرتين وهتستنى 10 دقايق تستلم رخصة العربية ..

هتنزل تاخد اللوح وبعدين تخلي حد يركبهم ليك في العربية ..

وألف مبروك يا باشا ،،وآديك عرفت الخطوات ماتخليش حد يعمل معاك وياخد عمولة بس روح من 8 الصبح عشان الزحمة رهييييبة فعلا ..

بالتوفيق بأمر الله

---

مش عارف الgps لواحده بصراحة بس أي حاجة تعوز تركبها روح بيها التوكيل عشان ماتخرجش العربية بره الضمان

اقتباس:

---

المشاركة الأصلية كتبت بواسطة mimic

يا جماعه حد يفيدني اامن فين وترخيص ال 3 سنين بكام ولو حبيت اركب فرش للعربية مين احسن واحد في رنج 500 جنيه ...

---

1000 مبروك يا باشا عن تجربه الدلتا للتأمين غايه فى الاحترام والالتزام وربنا يحفظك من كل سوء

بالنسبة للفرش الجلد انا بفضل سبير كار ودة لية فروع كتير منهم فى مدينة نصر وفية فى وسط البلد جنب وزارة الداخلية ,,,ويركبهملك كائنة تركيب المصنع ,,,,وفية اخوة فى المنتدى بيشكروا فى جينز كار فى التجمع بس انا ركبت الفرش عند سبير كار ,,,,بالنسبة لل gps انا كنت فى التوكيل امبارح وسألت علية قالولكى انة هينزل منتصف مارس القادم وهيكون شاشة وكاميرا خلفية + gps والجهاز بالتركيب فى حدود 4000 جنية وبيركب مكان الكاسيت ,,,,وبصراجة انا شايفة غالى جدا

حضرتك تقصد جهاز تتبع السياره ب Gbs وﻻجهاز Gbsلمعرفه الطرق ده غير ده اﻻول مخفى والتانى ظاهر