صيانة ال 60000 سبيد سيرفيس م/ هاني
ده ملخص تقرير صيانة ال 60000 كيلو للاوبترا في مركز سبيد سيرفيس
طبعا م/ هاني معروف في المنتدى هنا من زمان ومش لازم يعني اقول قد ايه محترم وامين في شغلة لابعد الحدود :Ta_clap[1]:
انا وصلت عند المهندس هاني بعد الصلاة على طول ولاقيته لسه المركز مافتحش
طبعا التليفون المتين جاني م/ هاني جري يدوب 15 دقيقة وكان موجود ... طبعا انا استغليت الفرصة ورحت راكن ادام الورشة علشان محدش يدخل قبلي لان يوم الجمعة عند المهندس / هاني بيبقى ضغط جامد ( اللهم لا حسد يعني)
انا مشكلة العربية عندي :
1-في برجلة كده على خفيف
2- في صوت صوصوة كدة من الجنب اليمين وانا ماشي
3- المياة بتنقص
4- مراجعة التيل والزيوت والفلاتر وخلافة ..
المهم بعد تسليم العربية للمهندس هاني وبعد كوباية القهوة المحترمة ابتدى الشغل
كانت جت عربية فيرنا واحنا شغالين وكانت عايزة طنابير وللامانة المهندس هاني قال لصاحب العربية هات الطنابير من نافع في دمشق احسن وارخص من الشرقاوي في جسر السويس واقترح عليا م/ هاني انى اروح مع ا/ احمد (صاحب الفرينا) واشتري الحاجة معاة لعربيتي بالمرة
رحنا دمشق واشتريت الاتي :
كوعة ثرموستات 90 جنيه
كاوتشة مياه علوية 100 جنيه
تيل امامي 200 جنيه
تيل خلفي 210 جنيه (وده رجعته بعد كدة علشان طلع مش هوه)
عدد 2 بلي عجل امامي ايطالي 200 جنيه
ورجعت للمركز تاني واديت قطع الغيار للمهندس هاني وبعت البلي عند الخراط علشان يركبهم
ركبنا الكوعة والخرطوم وغيارنا الزيت والمياة الخضراء (اسباني)
قفلنا كل الشغل وبعد تنظيف البوابة وتغير البوجيهات طبعا فرق السماء من الارض في سحب العربية وصوت الموتور وكله تمام بس المهندس/هاني كالعادة لازم يتمم على كل حاجة بنفسه فسمع صوت كده في العربية وقالي (لأ الصوت ده مش عاجبني) استنى لما نشوف ايه الصوت ده .. لغاية لما عرف انه من بيلة الكاتينة بعد ما فك السيور علشان يتأكد منها بس قالي بلية الكاتينة فيها مشكلة والاحسن اننا نغير البليتين الثابتة والمتحركة :wound09:
وعلى وعد اننا نتقابل الجمعة اللي جاية علشان التيل الخلفي والبليتين
قطع غيار من عند م/ هاني:
1- مياة اسباني 40 جنية
2- زيت وفلتر (فالفولين) مش فاكر كام بالظبط بس تقريبا 330 او 320 جنيه
3- بوجيهات 60 جنيه
4- خراطة 40 جنيه
5- مصنعية : ودي بالذات مكسوف اني اكتبها لانها اقل اقل من القليل
بعد الحفلة دي بقى اكتر حاجة عجبتني غسيل الموتور بالفوم مجاني وبعد الغسيل كنت عايز اقولة فك الموتور علشان اشيلة في البيت علشان مايتوسخش :shyy:
المهم رجعت تاني شارع دمش اشتريت الحاجات دي:
1- تيل خلفي (كوري) 110 جنيه
2- طقم بلي كاتينة ب 400 جنيه
3- ريش مساحات محترمة 30 جنيه (ودي م/ هاني مقاليش عليها ههههههههه)
عموما العربية بعد الحفلة دي العربية بقت زي الفل الحمد لله ومفيهاش الهواء (ده بالنسبالي لكن م/ هاني قاللي لازم البلي يتغير )
اخر حاجة بقى:
انا بأشكر م/ هاني بجد الله يكون في عونه ما بيسبش حاجة تعدي من تحت ايدة الا لما يكون مطمن عليه 3 مليون % حتى لو الشغل عنده كتير لازم كله يبقى تمام وحتى لو العميل نفسه مقتنع ان كله تمام لازم يقوله انه مش تمام من باب الامانه
الف شكر لسبيد سيرفيس وان شاء الله انا معاة يوم الجمعة اللي جايه علشان باقي الشغل وربنا يباركله في شغلة ان شاء الله ... فعلا المحترم بيبان من شغلة
