التويوتا الياريس

**marsguy** · 28-10-2008 10:27 AM

يا جماعه الياريس عربيه عظيمه ومن أكتر العربيات مبيعاً حالياً في العالم كله، وبتبيع كويس في الدول الغنيه والفقيره، وعلى فكره دبي مليانه ياريس بس هاتشباك.

أنا شخصياً مش باحبها أوي بس مقتنع بيها جداً بعقلي، وبالنسبه لعيوبها فا طبعاً ما فيش عربيه خاليه من العيوب ولولا إختلاف اﻷذواق لبارت السلع.

**limo** · 28-10-2008 10:30 AM

بص بالاختصار
الياريس عربيه اقتصاديه جدا سواء فى استهلاكها للبنزين او استهلاكها لقطع الغيار وفى نفس الوقت فيها امان زى الاير باج 2 والفرامل الabs فى الاتوماتيك
وتقريبا عيوب التصينع فيها قليله جدا وبتجيب جزء كبير جدا من فلوسها لما تبيها تانى
بس الفكره انها عربيت مدينه اكتر يعنى ممكن تكون احسن عربيه فى فئتها للاستخدام داخل المدينه بس اقل عربيه فى فئتها للاستخدام خارج المدينه نظرا لانها اقل ثبات من العربيات فئتها وكمان متورها الصغير ال1300
حته الشكل والعداد الى فى النصف افضل متكلمش فيها لانها اذواق فى الاول والاخر

**sa3dawy** · 30-10-2008 04:23 PM

المشاركة الأصلية كتبت بواسطة tutankhamoun

أنا معاك في النقطة دي و مش عارف ايه الحكمة من النقطة دي

السيارة الياريس خفيفة ....... آه و ده مأثر على الثبات ماشي

إنما سحب العربية
بسم الله ما شاء الله و لا حول و لا قوة إلا بالله ( ربنا يبارك لأصحابها فيها و فيهم )
سحب أكثر من ممتاز لسيارة 1300
الموتور ناعم قوي .......... و هو هو موتور الكورولا ال 1300
و توفير للبنزين رائع بسبب ( موتور حلو و تكنولوجيا متقدمة و سيارة خفيفة )
يعني لو بنتكلم في السحب ......... يبقى الياريس ممتازة
أنا بس حبيت أقول كلمة حق علشان واضح أن حضرتك مجربتهاش

و بما أني كتبت في الموضوع
أنا لست من ملاك الياريس و لكني إذا أحب صاحب الموضوع سماع رأيي يتفضل إن شاء الله

أكثر ما يميز السيارة هو المحرك
محرك ناعم ........ سلس ...... موفر في البنزين ..... سحبه عالي قوي بجد لموتور 1300 ......... أعطاله قليله بشهادة أصحابه
خدمات ما بعد البيع لتويوتا ممتازة بشهاة أصحاب السيارة
و سعر اعادة بيع جيد جدا

أسوء ما فيها
الثبات ضعيف فوق 110 أو 120 ( العربية عالية عن الأرض و خفيفة و كاوتشات رفيعة) ......... صاج ضعيف ....... ثمن مبالغ فيه شوية ( بس أغلب عربيات مصر كدا ) ...... الشكل ( أذواق طبعا ) ........

و دي الأنطباعات الأولية لواحد من غير ملاك السيارة و لكني جربتها عدة مرات و لكن طبعا الرأي الأفضل سيكون ممن جربها لمدد طويلة و هو الأكثر دراية بها
و إن شاء الله ربنا يوفق

من الاخر توت باشاا قال كل الياريس فى مشاركة واحدة .. هى دى الخلاصة
انا رأى المشاركة دى يتعمل بيها موضوع جديد فى قسم تويوتا
والله استاذ

**Samir Elshahawy** · 31-10-2008 11:32 AM

السلام عليكم..

أود ان اشكر كل من شارك في هذا الموضوع علي افاداتهم و معلوماتهم القيمة التي استفدت منها كثيرا, و اسمحوا لي ان اعلن لكم السبب الحقيقي وراء طرحي لهذا الموضوع و هو ان الشركة التي اعمل بها تستخدم هذه النوعية من السيارات و من المفترض ان اتسلم واحدة منها - جديدة طبعا- و اوتوماتيك لذا اردت ان اعرف كل المعلومات المتاحة عنها رغم تحفظي الشديد علي شكلها الخارجي و التابلوه الذي في الوسط

اسف علي الاطالة و شكرا لكم جميعا