الموضوع: للتصحيح : شنطة فلوانس 2014 مش 530 لتر

زملائي الاعزاء بقسم رينو، السلام عليكم.
النهاردة كنت مع صديق لي في معرض سمير ريان عشان محتار مبين الفلوانس و الكوروﻻ ، الغريب انهم كانو حاطين العربيتين جنب بعض و لما سالته دي صدفة قالي ﻷ معمولة بقصد عشان ناس كتيرة بتقارن مبينهم.
المهم و انا بتفرج فتحت شنطة الفلوانس لقيتها قريبة جدا جدا من حجم شنطة الكوروﻻ !!!
الفرق مبينهم متلاحظوش الا لما يكونو الاتنين جنب بعض و فاتح الشنطتين و بتقارن .
الحجم تقريبا واحد و الاختلاف بسيط جدا ان الفلوانس اعرض سنة اما الكوروﻻ اغوط سنة.
بس الكلام مش منطقي بالنسبة لي لان حجم شنطة الكوروﻻ صافي 470 لتر مش 460 بالمناسبة و حجم الفلوانس زي محضراتكم تكرمتم و قلتوا 530 لتر !! يعني فرق 60 لتر يعني ان 13% زيادة و مش ملحوظة ! طب ازاي يعني خصوصا ان عندي خلفية هندسية عن الابعاد بطبيعة عملي و اقدر اميز بالنظر الاحجام.
المهم سألت السيلز علي المعلومة دى قالي اه دي 530 لتر ، قولتله طيب و الكوروﻻ ؟ قالي 470 لتر قولتله طب بص كدة و قارن مبين الاتنين و قولي هل دي ارقام صحيحة، فبصلي و هو مندهش قالي مش الفرق ال 70 لتر خالص ، بس هو ده اللي مكتوب في الكتالوج.
المهم رجعت البيت و بصيت في الكتالوج المصري لقيت مكتوب 530 لتر ، فقولت طب مشوف المواصفات علي النت فنزلت البروشور الاوروبي و لقيته مكتوب 530 لتر برضو !! بس في جنبيها علامة * نجمة زي اللي بنشوفها في عروض شركات المحمول يقولك دقائق مجانية غير محدودة و جنبيها *نجمة صغيرة و مكتوب تحت بخط صغير بحد اقصي 1000 دقيقة في الشهر للاستخدام العادل.
مش هطول عليكم ، لقيت مكتوب جنب النجمة دي ان ال 530 لتر دول بدون وجود الكاوتش الاستبن في العربية ! و ان الحجم 490 لتر فقط ، وده الكلام الصح و المنطقي جدا لما تقارن مبين العربيتين بالنظر فرق اقل من 5% لا يمكن ان تلاحظه بعينك .
بصراحة انا متضايق من حاجة واحدة ان البروشور المصرى و الاوروبي كوبي بيست نسخة طبق الاصل حتي بالصور ماعدا الملحوظة دي ! طب انت ناقل كل حاجة بالمللي اشمعني دي اللي سبتها.

* ملحوظة لزملائي الكرام :
الموضوع ده ليس الغرض منه التقليل من العربية لانها جيدة جدا و اثبتت نفسها و لا تحتاج لمزايدات، و لكنه للمشاركة و توضيح المعلومات للافادة لينا جميعا و ده الهدف الاساسي من المنتدي ، و فعلا هزعل جدا لو حد اخد الموضوع بمحمل تاني لان فعلا نيتي التوضيح و التصحيح ليس اكتر.