دبرياج و سوسات ارجو المساعدة

**metenawy** · 24-02-2014 11:05 PM

انا عندي العربية لما باجي اطلع من الاول بتترج فا الميكانيكي قلي محتاجة طقم دبرياج خصوصا ان العربية سحبها وحش (((( رغم اني معتقد ضعف السحب داه سببه الحساس لاني لما نضفتو علي طريقة كبير الدايواية الاستاذ ممدوح العربية رجعت تسحب و بعد شهرين من التنضيف رجعت تاني متسحبشي) و كمان الميكانيكي قالي ان العربية واطية اوي لانها محتاجة سوسات بس قلي كل السوسات مضروبة في السوق هات عليات 1 بوصة

فا روحت للزقازيقي في التوفيقية قالي انت عربيتك لسه ممشيتشي 60 الف و ممكن تمشي علي الدبرياج كمان شوية و مرضاش يديني الطقم و قالي ان في سوسات اصلي عنده عملا 200 احسن من العلايات لان العلايات حتخلي العربية تعوم
انتو بقي شايفين اصبرعلي الطقم الدبرياج شوية ولا اغير و هل اجيب سوسات اصلي ولا علايات
و اسف علي الاطالة لكن اعمل ايه بحكم شغلي كمحامي بتكلم كتير ههههه

**Abo Yasso** · 25-02-2014 09:45 AM

لازم تغيره عشان ميفتحش فى حاجات تانيه معاك
الاهم انك تجيبه اصلى مش مضروب
البنا او ابو الحسن
السوست دى مشكله انا عندى نفس المشكله وكل واحد اقوله يقولى بلاش اليومين دول السوست اللى فى السوق كلها مضروبه
بالنسبه للعليات اعتقد بلاش سامع كلام عنها زى الزفت

**a_mohamedsamir** · 25-02-2014 10:26 PM

طقم الدبرياج عندي غيرته بعد ٤٦ الف

**metenawy** · 26-02-2014 02:39 PM

المشاركة الأصلية كتبت بواسطة abo yasso

لازم تغيره عشان ميفتحش فى حاجات تانيه معاك
الاهم انك تجيبه اصلى مش مضروب
البنا او ابو الحسن
السوست دى مشكله انا عندى نفس المشكله وكل واحد اقوله يقولى بلاش اليومين دول السوست اللى فى السوق كلها مضروبه
بالنسبه للعليات اعتقد بلاش سامع كلام عنها زى الزفت

طب اعمل ايه في السوسات اجيب الاصلي من الزقازيقي ولا اشوف حوار سوسات الاسبور استيراد الي سمعت عنها رغم ان الزقازيقي بيقولي مش كويسة

**metenawy** · 26-02-2014 02:41 PM

المشاركة الأصلية كتبت بواسطة a_mohamedsamir

طقم الدبرياج عندي غيرته بعد ٤٦ الف

دا معناه انه ممكن يضرب في اي وقت طب حضرتك حطيت الاصلي ولا فاليو و عامل معاك ايه

**MMamdouh** · 26-02-2014 03:14 PM

الدبرياج طالما بيرجرج يبقى الاسطوانة وحشة و عايزة تتغير

فى الدبرياج مش فارق الكيلومترات خالص... دا طريقة سواقة و طبيعة استخدام... انت ممكن تعمل 1000 كيلو على طريق سريع دوس فيهم دبرياج 10 مرات و ممكن تعمل 10 كيلو جوة البلد تدوس فيهم دبرياج 1000 مرة

الدبرياج تجيبة GM اصلى

السوست تغيرها و تجيب اصلى لو هى فعلا واطية.... قيس المسافة من صرة العجل لشفة الرفرف و شوفها كام سنتى... لو اقل بكتير من 37 سنتى امام و 36 سنتى فى الخلف يبقى السوست ريحت و محتاجة تتغير

انسى موضوع العلايات دة خالص... علاج القربة المقطوعة انك تعالج القطع مش تملاها مية

MMamdouh