الموضوع: سؤال ضرورى فى الشيكات

المشاركة الأصلية كتبت بواسطة أبو صلاح

شوف هي حصلت معايا مرة
كان فيك شيك مصدر باسم الشركة اللي انا شغال فيها وكان على بنك nsgb
رحت صرفته باسمي بس بعد تردد من مدير الفرع وطلب مني تفويض عليه صحة توقيع من البنك

خلاصة الكلام خلى الشركة المصدر باسمها الشيك تعملك تفويض بصرف الشيك (يذكر فيه بيانات الشيك) وصدقه من البنك اللي الشركة فاتحة فيه حسابها

لكن المعلومة اللي قالهالي مديرالفرع انه لو باسم شخص عادي اني ممكن اصرفه يتعمله تظهير ويتصرف فورا لكن بشركة ده مخالف للقانون

ابو صلاح ازيك يا كبير
حضرتك تقصد تفويض صرف على ورق الشركة فى مقر الشركه ولا تفويض داخلى جوه البنك ؟

المشاركة الأصلية كتبت بواسطة أحمد كمال

مفتوح و لا مقفول التظهير و لا مسطر؟

لو مسطر مفيش حل غير انه يتودع في حساب باسم الشركة المستفيدة

لو مش مسطر بس مقفول التظهير يبقى ما ينفعش يتسحب الا عن طريق البنك اللي المستفيد فاتح حساب فيه .... و اللي يسحب يكون توقيعه معتمد عن الشركة المستقيدة

لو مش مسطر و مش مقفول التظهير يبقى اي حد يقدر يصرفه عادي

أ احمد
الشيك مش مسطر
للاسف مش عارف يعنى ايه مقفول او مفتوح التظهير

المشاركة الأصلية كتبت بواسطة alaa74

كلام مظبوط يا احمد باشا بس عندى تعديل صغير
الشيك لو حتى مقفول التظهير (يعنى مشطوب على كلمه لأمر )
ممكن يتصرف عادى جدا ومش لازم صاحب الحساب اللى له حق التوقيع وده
حسب قانون الشيك الجديد وبعد التعديل على القانون .

لكن بعض البنوك بتحاول تأمن نفسها شويه وتريح دماغها ودى امثله للحالات دى :

1- بنك بيطلب تفويض بأسم اللى هيصرف وموقع من من له حق التوقيع وعليه صحه توقيع من البنك سواء مشطوب لأمر أو مش مشطوب (يعنى مقفول التظهير أو لأ )
زى البنك العربى الأفريقى الدولى (وعلى فكره مش كل فروعه ).
2- بنك تانى بيطلب ختم الشيك بختم الشركه المحرر لها الشيك سواء مقفول التظهير أو لأ
وبدون تفويض وتصرف عادى زى البنك الأهلى سوستيه جنرال .
3- بنك تالت ولا بيطلب تفويض ولا ختم ولا أى حاجه حتى لو مقفول التظهير بخلاف ان اللى هيصرف الشيك بيظهره فقط (يعنى بيكتب بياناته على ظهر الشيك ويصرف عادى حتى لو مشطوب على لأمر ) زى البنك التجارى الدولى .

وكل الحالات دى صادفتها فى مكان عملى
علشان كده دايما بننصح أى حد لو هيكتب شيك سواء بأسم شركه أو بأسم شخص
أنه يسطر الشيك (بعمل خطين متوازيين على وجهه الشيك ) وبالاجراء ده مش هينفع الشيك
يتصرف الا من خلال ايداعه بحساب المستفيد (اللى الشيك بأسمه ) عن طريق غرفه المقاصه
من خلال البنك المركزى .
طبعا هو إجراء أمن 100% لأن لو حتى الشيك اى حد حاول يصرفه من على الشباك حتى ولو
كان صاحب الحساب مش هيعرف .

يعنى ممكن الأستاذ صاحب الموضوع يصرف الشيك عادى وحسب القانون .

اشكرك ؛؛؛؛؛؛؛