واحشني يا بتوع نايل :D
بقالي فترة مدخلتش معارض وفليت العربيات
واحد حبيبي عايز يبيع عربيته ( معاه فيكترا B ) وعايز لما يشتري يجيب حاجة يحس انه مانزلش فقولتله مفيش غير الألماني لأن الفيكترا لو نزلت ركبت كوري هتحس بفرق وش
المهم هو عايز حاجة بالكتير 170 وانا كنت فاكر الفانتازيا في الرينج ده ... طلع أول فئة فيها ب 212 !!!!!!!
ايه الأرقام ده !!!
المهم نزلت معرض أبص عالعربيات هناك وبالمرة عشان انا بفكر في عربية جديدة قريب
انا بطلع من باب عربية أخش في التانية وأحس بالفرق
أول حاجة مالقتش الفانتازيا فركبت ال a7 الجديدة بس اللي كانت قدامي كانت مانيوال !!
انا ركبت وأول حاجة قلتها لا أراديا ... ايه القرف ده !!!!! ..... ده ب 223 !!!!!!!!!!!!!!!!
ده بلاستيك حقير وتحرك الفتيس تسمع صوته في الكبوت وطابلوه ولا طابلوهات التسعينات !!!
بس بصراحة تقفل الباب تحس انه باب محترم
نزلت دورت علي أعلي فئة ... لقيتها بس بصراحة ولا تستاهل كل الفلوس ده
لما جيت أفكر لقيت ان العربية المانيوال ب 223 ومافيهاش أي حاجة ... اه فعلا فيها وسائل أمان وده حاجة أحترمها جدا ... بس العربية فقيرة جدا جدا .. مش أوبشنز أكيد لأنها متنفضه ... بس الخامات فقيرة وحاسس العربية عادية جدا ... طبعا مجربتش العربية بس انا عارف الموتور ال tsi اللي فيها ال 122 حصان عشان كنت مجربه في جيتا ... بس كتسارع انا عارف كويس ان التسارع هيبقي عادي
نزلت منها وقلت أشوف الأسترا الجديدة ... انا ركبتها قبل كدة بس التربو ... كان موتور جراي جداااااااا ... انما من جوة برضه حاسسها فقيرة جدا وماتستاهلش !!
وطبعا اللي موجودة دلوقتي الموتور العادي 1600 من غير تربو و ب 182
فكرت أقول للي عايز يشتري وقلتله رفضها وقالي بلا ده عشان قطع الغيار ... بصراحة العربية مش منتشرة زي الفانتازيا مثلا وهيتعب علي ما يلاقس قطع غياها الخارجية .. انما الموتور هيلاقي لأنه زي الكروز بالظبط
نزلت منها قولت بس ... انا أطلع علي أختها التقليد وأشوف الكروز ... أعلي فئة ب 162
طبعا رقم وهمي بس بصراحة ... هي أكتر عربية لو بقارن ... هقول ينفع يتدفع فيها المبلغ ده
موتور الأسترا وقطع غيار هتبقي متوفرة .... وخامات انا شايفها أفضل من الأوكتافيا a7
انا كنت جربت السيراتو والألانترا قبل كدة كويس
وركبت كذا فئة من ده وده
فركبت الأتنين في المعرض كدة ... أديني شايفهم وأتفرج شوية
طبعا هما نسخ من بعض ... بس علي أرض الواقع ... سيراتو أعلي فئة ده وهم وفعلا حسيت فيها بثبات علي عكس القديمة اللي كانت بتوهم ناس بالثبات ... بس عايز تجرب ... ممكن تمشي علي مفصلات كوبري لافف علي سرعة قليلة وشف الضهر بيعمل ايه
القديمة كانت بتنط ... الألانترا لغاية أعلي فئة فيها حاليا بتنط ... السيراتو الجديدة أعلي فئة مانطتش وكمان ممكن أقول عليها ناعمة ... مش نعومة كورولا مثلا ... بس علي جنط 17 وكل الثبات ده فهي ناعمة
المهم قلتله عليها من قبل ما أروح بس هو رفض وانا مكنتش عايز أقوله هات كوري عشان لو معجبتوش بعد كدة هيقولي حرام عليك
قولت أشوف اللسيفيك مثلا ايه اخبارها مع اني ركبت ال 2012 وقلت قبل كدة خامات زبالة وقالوا أتعدلت في 2013 .... بس بصراحة زبالة برضه ومسألتش عالسعر ... وعارف موتورها كويس ومجربه
الكورولا الجديدة ... طابلوه معجبنيش وخامات عيانة .... انا مجربها برضه بس موتورها كويس لأنه الموتور القديم بتاع 2008 وشكل خارجي كويس
انا رايح أقول للي هيشتري أحساسي بكل عربية وهو براحته بقي ويجرب هو كمان ولو اني شايف ان افضل حاجة ليه دلوقتي هي الكروز مع انها كوري بس العربية ده محترمة جدا ومش هتحسسه انه نزل جامد لما ساب الفيكترا
نيجي بقي نشوف عربية ليا ... هي ممكن ماتبقاش دلوقتي للأسف عشان ماقتعتش بعربيات كتير
جربت الدودج دارت .... فيها شوية حركات كدة بس برضه غالية جدا وفي حاجات أفضل
جربت الألنترا كوبيه ... بيحاولوا يخلوها سبور ... بس من وانا قاعد ورا الدركسيون وشايف التابلوه قدامي .... حاسس انها مسخ ... بس مجربتهاش في الجري ولا ثبات
سايب انا اخر عربيتين في دماغي للأخر عشان دول اللي عليهم العين بقي وانا عارف انا ناوي علي ايه
الفئة التالتة والفولفو s80
ركبت الأول الفولفو ... ايه الوهم ده !!!!!!!!!!!!!!!!!! ... طيارة ده كلمة قليلة ... خامات فظيعة وعدادات ايه وشكل ايه ووسع ايه
انا مش قادر اقول أقل من كلمة اني أتوهمت وبعد ما فليتها قولت العربية ده هتبقي في الخطة وربنا يسها بس أجرب ال 320 الأول
ملقتش غير ال 316
اول حاجة .... انا ركبت وعارف كويس قاعدة ال bm
لا معلش بقي انا في ال bm انبسطت أكتر ومسكة دركسيون سبورتي أكتر وشكل هجومي .... انا أتوهمت اكتر من الفولفو ... بس خامات الفولفو أحسن بصراحة
يمكن عشان ده كانت 316
من الأخر انا يمكن لو كبير في السن شويتين هختار الفولفو ... فخامة عالية جدا
انما في الوقت الحالي فهي ال bm ويمكن لغاية سن ال 50 كمان
بس بعد ما جربت الأتنين دول ... انا نزلت بصيت علي كل العربيات اللي موجودة وجربتها بقرف ... دول ماينفعش يتقال عليهم عربيات جنب دول
يالله الحمد لله :D
اسف عشان طولت عليكوا بس انتوا كنتوا واحشني :16:
