الموضوع: اصحاب الخبرة

انا يا جماعه الحمد لله اشتريت دايو لانوس 2 موديل 2007 وكنت عايز اعملها طقم سيرفيز كامل ومعرفش الاسعار ولا الاماكن الى هشترى منها وكنت عايز اعرف هشترى ايه لطقم السرفيز وبكااام ومنين وهكون شاكر ليكم اوى اوى اوى

بسم الله الرحمن الرحيم
نزلت النهارده الجمعة 21/2/2014 التوفيقية
واول ماروحت روحت على الزقازيقي ليه بقى مع ان الناس بتقول انه بيطلع قطع غيار مضروبه
السبب ان والدى شغال فى قطع الغيار وكان عارف الزقازيقي دا ايام مكان لسه صغير
المهم عملت كشف كالتالى
سير كاتيينه جيتس العلبه الخضرا 55 جنيه واخدته هديه على البيعه
سير دينمو اصلي40
سير تكييف اصلي25
مساعدين kyb امامي 360 جنيه وابراهيم البنا قال 400 جنيه والعمده قال 380 جنيه
مساعدين خلفى kyb عامله 220 جنيهعند البنا 250 عند العمده 220 جنيه
عدد 2 كوبايه مساعد اصلي 60 جنيه
عدد 2 بطاحه لانوس كوري 120 جنيه
عدد 2 مسمار ميزان اصلى بالجلب 30 جنيه
فلتر بنزين اصلي 35 جنييه
فلتر زيت اصلي اربعه خرم 25 جنيه
كارتيره خلفى لانوس اللى هى حتتين فبر كدا الواحده 17.5جنيه
كارتيره اصلى امامي فبر 130 جنيه من عند عزيز سليمان بعدالعرض
طقم بيض مقص ctrعامل 115 جنيه
طقم بيض دريكسيون ctr عامل 115 جنيه
بليه كاتينه لانوس كوري 60 جنيه الاصلي 275 جنيه جبت الكورى وقولت ابقى اغيرها مع كل سير بلاش اغير البليه كل سيرين
ثرموستات كوعه اصلي 40 جنيه
بليه او بكره تكييف htc عامله 40 جنيه .. عند البنا الالصى 80 جنيه عند عزيز سليمان 75 جنيه

سألت عند الزقازيقي عن الاكصدام الامامي قالى الاصلى الفبر 300 جنيه والخلفى تيلاندى او تيوانى عامل 300 جنيه برضو استغليتهم .. روحت للبنا قال مافيش روحت للعمده قال مافيش روحت لعزيز قال مافيش رجعت تانى بأقول للزقازيقي ريح الامر شويه قالى اتباعوا اصلا ( هما ماتباعوش لانه كان مغليهم جدا ولما خرجت وسألت عليه بره محدش افاد بالسعر فهو فكرنى عرفت السعر الحقيقي فقال اتباعوا )

جبت بقى الكلبسات اللى بتبقى ورا الفبره اللى فى القايم من جوه الكيس بـ 15 جنيه فيه كتير
وجبت كلبسات الشنطه اللى هو الفبر اللى فى الشنطه جبت كلبساته بـ 35 الكيس ومليان على عين مامته خالص
عدد 4 دلايات اللى بتبقى ورا العجل صيني بـ 45 جنيه من العمده

وبعد التجربه خالوا بالكوا من الزقازيقي بيشتغل فى المضروب .. وعن ثقه علشان والدى صديق صاحب المحل وكان صاحب المحل بيلاغيه فى شويه شغل .. بس لو عرف انك فاهم مش هيديك مضروب .. وطبعاكل اللى جبته اصلى عليه العلامه المائيه وكلمه جى إم وطبعا عمل خصم ف الفاتوره وسير الجيتش هديه

العمده اللى هو فى المجمع من جوه مغلوانى شويه وفاصل معاه ( ولو معندوش الالصى هيحاول يلبسك اى حاجه اقل من الاصلي )
اللى استغربتله بقى ان ابراهيم البنا كله بيشكر فيه بس بصراحه هو غالى عن اى حد حتى عن عزيز سليمان وبيشطح ( لمؤاخذه فى اللفظ ) فى الاسعار جدا
فيه واحد اسمع عصام برضو فى المجمع جوه .. انا كنت بسأله بس ( حسيت انه فى حاجه مش مظبوطه ومقدرتش احكم عليه علشان ماشترتش منه حاجه ) قالى صحيح الاكصدامات الصيني الخلفى والامامى بـ 320 باين مش فاكر كويس

فيه بقى فى المجمع من جوه إتنين فاتحين محل جمب العمده لازق فيه على طول مباشرررررة الشابين دول شكلهم تمام وبيبيعوا الاصلي هما فى الدور التانى فوق كدا سألتهم عن جلب المقصات الاصلى قالوا هيشوفوا بس بعد صلاه الجمعه بس شكلهم ناس محترمه وبتوع شغل وعندهم زحمه
جلب المقصات مش موجوده خالص فى السوق

وهذه كانت التجربه السعيده
طبعا مشيت واللى ناقصنى
اكصدام خلفى لانوس 1
اكصدام امامي لانوس 1
طقم عرقات نضيف
شماسه لانوس وان خلفى
سبويلر .. ولاقيت هناك حاجات حلوه بس كلها لون ابيض والاستعمال نضيف على فكره بس اللون مشكله
عدد اربع جلب مقصات اصلى ودول مهمين جدا جدا جدا
سيلكون حرارى ودا سهل اجيبه من المنصوره
فوانيس شبوره صيني
ظرف كوبلن ودا اللى قال عليه العفشجى وإلى الآن مش عارف دا ايه
طبعا دا كله نقصنى لأن والدى كان بيوزع شغل على الناس فى التوفيقيه ورايحين كام مشوار فقولنا نمشى ويبقى يوم جمعه تانى ننزل نفرم التوفيقيه ونرجع

للعلم الفاتوره نزل منها 100 جنيه وسير الكاتينه هديه نوع جيتس علبه خضرا
يلا كفايه كدا بقى علشان اتبهدلت شويه حلوين النهارده