الموضوع: سؤال لملاك لانشر شارك 2014 هايلاين؟

المشاركة الأصلية كتبت بواسطة spidars

اي فتحت سقف لازم تكون بتميل لفوق وتفتح لاخر هتلقيه ميعرفش حاجه

فعلا كل فتحات السقف فيها الابوبشن ده مضاف الى الخاصيه الاساسيه وانه يفتح بالكامل اكيد لو تلاحظ ان مفتاح الهوايه له اكتر من حركه ...

أولا: خاصية الـtilt بتتفعل لما حضرتك بتضغط "press" على الزرار بتاع فتحة السقف، فبتلاقي الفتحة مالت لفوق شوية... انما عايزها تفتح للآخر بتحرك نفس المفتاح للخلف "push backwards"... انت دلوقتي حركته زي ما قلتلك للخلف فتلاقي الفتحة بتتحرك بالكامل للخلف لحد ما تغطس تماما جوة التجويف بتاعها وتبقى اتفتحت بالكامل... طيب عايز تقفلها تاني، هتحرك نفس المفتاح للأمام "push forward" بضغطة واحدة طويلة هتلاقيها ماشية معاك لقدام لحد ما تقفل بالكامل، إلا لو حبيت توقفها عند اي نقطة تحبها "تسيب نصها أو ربعها مثلا مفتوح" فبتقوم شايل ايدك من على الزرار تلاقيها وقفت عند النقطة دي... حاجة كمان: لو هي على وضع tilt وانت عايز تقفلها بتزق الزرار لقدام برضه "push forward"...

معلهش انا بحاول افسرها لك على قد ما اقدر، فحاول تجرب تاني وتقول لنا...

ثانيا: انا معايا الـ2013 هاي لاين ومش لاقيلها AUX خالص وهتجنن لأن الشاشة التتش فيها الـicon الخاصة بالـAUX... واللي مدفون في درج التابلوه ده هو الـUSBفقط لا غير، وفعلا بيبقى ليها غطاء فايبر للحماية... انما عمري ما لقيت فتحة AUX عندي... يا ريت برضه تبص كده وتفيدنا...

وطبعا ألف مبروك على العربية وربنا يرزقك خيرها وان شاء الله تعجبك جدا خصوصا في ثباتها...

المشاركة الأصلية كتبت بواسطة Omar Gamal

و الله حضرتك و ربنا لوحده يعلم أنا فكرت في عربيات كتيرة جدا قبل دي، بس من خلال متابعتي لكلام حضرتك سواء في القسم هنا أو قسم المقارنات فأنا عشقت العربية دي. و خاصة بعد ما عملت عنها بحث كتير و اكتشفت أنها الأنسب لاحتياجاتى، بشكرك من قلبي والله على مساعدتك و مرة تانية على الكلام الجميل ده.

1. بالنسبة لفتحة السقف: أنا حاسس فعلا إن اللي في دايموند ده مكنش فاهم حاجة. فتحة السقف كان زرارها زي ما حضرتك بتقول كده زرار أسود مكتوب عليه tilt و واحد تاني مكتوب عليه push. على حسب فهمي لكلام حضرتك، زرار ال tilt ده مجرد بيميلها أما ال push فمسئول عن فتحها سواء بالكامل أو لأي نسبة أنت عايزها. مضبوط كده؟ هو ده اللي عند حضرتك في ال 2013؟

2. فتحة ال AUX فتحة عقيمة جدا موجودة بس جوا على يمين فتحة ال USB بس بجد صعب الوصول ليها و لكن أنا هحاول أصورها لحضرتك إن شاء الله.

3. بالنسبة للعتب الجانبي، مفيش حد ركبه أو عارف ممكن يتكلف كام لأنه بيفرق في شكل العربية جدا؟ دايموند قال 6000 الإتنين بالرش و التركيب و لكن ده طبعا هزار.

4. للأسف الهايلاين أصبحت زيها زي الفئة التالتة بالنسبة لعدد السماعات (6 و شالو الصب ووفر بدل من 9)، هل حضرتك شايف إن ده ممكن يفرق في جودة الصوت؟

أنا آسف جدا للإطالة، شكرا

ربنا يكرمك يا باشا ولي الشرف والله اني اكون احد اسباب اختيارك للعربية... شكرا لذوقك!!
هحاول ارد نقطة نقطة:
1. فعلا ده اللي قصدته بخصوص فتحة السقف... وطبعا اللي في دايموند لا يفقهوا اي شيء عن العربية رغم بساطتها وعدم تعقيدها يعني... بس ده العادي بتاعهم... في صيانة الألف كنت بسأل الأخ اللي بيغيرلي الزيت وبيربط العفشة سؤال تافه جدا: ممكن تشرحلي الفرق بين عفشة الشارك وعفشة البومة؟ سكت شوية وقالي: زي بعض بس الشارك أحسن!!!! ولما لقاني مزبهل من جهله قام استدرك وقالي: آه مقصات الشارك اكبر!!!! كل ده والعربية مرفوعة قدامه وشايفها حتة حتة...
2. والله اتمنى يكون فيه AUX وهبقى انزل ابص عليها، رغم اني اعتقد مفيهاش... وحتى الكتالوج مبين فتحة الـAUX في التجويف اسفل مفاتيح التكييف... وده عندي متغطي بجزء اسود تحسة متبرشم او ملزوق (يعني مش بيتشال) وواضح انه في عربيات معينة زي الـGT والـSE والـRalliArt وغيره... انما مش في الـ1600 العادية بتاعتنا.... والله اعلم!!
3. بالنسبة للعتب، ده لا يزال من الحاجات اللي مصمم اعملها بس ظروف تواجدي في البحر الاحمر وعدم معرفتي بالحرفيين والاماكن دي هو اللي معطلني... وبعدين فيه هنا اراء متناقضة: فتلاقي ناس بتقول انها ممكن تتعمل عند واحد اسمه رمضان في قليوب وشغال في دايموند وبيشتغل بالكليبسات الأصلية، انما ناس تانية بتحذر وبتقول ان حتى لو الكليبسات اصلية ده مش هيمنع البارومة...
مش عارف بصراحة بس نفسي اعمل الموضوع ده هيحول العربية بجد... وبالمناسبة لما سألت في الموضوع ده اول ما جبت العربية الوكيل قالي العتب الجانبي بـ3600 والكساحتين الاماميتين بـ1500 او 1800 مش فاكر... يعني توتال 5400 على اقصى تقدير... مش فاهم ايه بقى 6000 دي؟؟ الا لو بيستهبلوا وبيضربوا اي سعر والسلام... وانا برجح كده لأنهم فوق جهلهم حرامية كمان...
4. اساسا عندي 6 سماعات مش 9 رغم ان الكتالوج بيقول 9 سماعات!!!! حاجة عجيبة برضه بس ما دققتش قوي لأني عارف اني بسأل ناس مش فاهمين اي حاجة في اي حاجة... الصب ووفر عامل شغل طبعا ومش فاهم ايه اللي دايموند بتعمله ده؟؟ كل سنة تشيل حتة من العربية وترجع تنزل حتة... يعني شالوا الصب في 2012 ورجعوه في 2013 (وكنت محظوظ الحمد لله) ورجعوا شالوه تاني معاك...
عموما الصوت مش حلو بس علشان الصب... الموضوع كله في الساوند سيستم الركفورد فوسجيت... حاجة محترمة جدا والصوت فوق الروعة واحسن من اي حاجة تانية في الفئة دي في نظري... الـbass والـtreble والـmid ممتازين جدا والتويترات في الأبواب عاملة شغل جامد برضه... ساعات بقول لو كان فيه 3 سماعات تانيين كانت العربية هتتفجر ههههه... بصراحة 6 كويسين خالص...

ربنا يباركلك ان شاء الله!!

المشاركة الأصلية كتبت بواسطة Mohamed Gebaly

طب سؤال لو سمحتم فى اعلان العربية موديل 2013 هاى لاين كان مكتوب عن نظام الصوت
Touch panel audio with Rockford sound system
و فى موديل 2014 بقى مكتوب
Unique audio (AM/FM, CD player
هل معنى كده انهم غيروا ماركة الsound system
و شكرا

أوففف... لو ده حقيقي تبقى ضربة قاضية لنظام الصوت فعلا، لأن الـUnique Audio ده بينزل في الفئات الأولى (غير الهاي لاين) وأكيد أكيد جودة الصوت هتفرق عن الـRockford Fosgate مفيش كلام...