سؤال عن Starmaxx tyres

**Auditor** · 27-02-2014 08:20 AM

السلام عليكم ورحمة الله وبركاته
ممكن لو فى حد من السادة الأعضاء يعرف حاجة عن نوع الإطار ده يقولنا رأيه إيه
هو التوكيل بتاعه شركة النيل (بريدجستون) وأنا شايف إن سعره مناسب جدا (375 جنيه الفردة) خصوصا إني بغير الكاوتش بالعمر الإفتراضى علشان أنا مش بستخدم العربيه كتير
كمان أنا هغير مقاس الكاوتش فى عربيتى (Speranza A113) من 175/60/14 إلى 185/60/14 علشان صراحة أنا زهقت من المقاس ده بسبب تكرار إنقطاع الكاوتش (مرتان خلال 3 سنوات) فى حالة إصطدام السيارة بالحفر فى الطريق ( وما أكثرها)
وأتمنى أن لا أكون قد أطلت عليكم بالأسئلة

تحياتى للجميع

**eslamsubaru** · 27-02-2014 09:28 AM

أولا : انا مسمعتش عن النوع ده . ممكن حد يفيدك فيه احسن منى .

ثانيا و ده الأهم:
يعنى ايه هتغير عرض الكاوتش لعرض اكبر علشان القديم كان بيتقطع ؟؟ ايه علاقة عرض العجلة بقطعها !!!

غالبا انت بتمشى فى طوب و حفر كتير و بتاخدها بسرعة : ده سبب قطع الكاوتش انما مش عرض العجلة السبب.

و الأهم : مقاس الكاوتش اللى انت ناوى تجيبه ده هيخلى حجم العجلة ككل اكبر من العجلة الأصلية سواء فالارتفاع و الحجم و ده غير مسموح علشان متحكمش على عفشة عربيتك بالضرر . العرض اه مسموح بيه انما ميكونش 60/185 .. لو عايز تعرض العجلة يبقى المقاس المظبوط عندك هيكون :
يا 14/55/185 و الأفضل يكون 14/55/195 الأخير عرضه اكبر بس عربيتك تشيله و حجم العجلة مش هيفرق معاك فى قراءة عداد العربية.

**Auditor** · 27-02-2014 10:02 AM

أستاذ eslamsubaru
شكرا جزيلا على الرد
الفكرة أنا يهمنى أكثر زيادة الـ Sidewall بتاع الفردة علشان مع الإنضغاط الحاصل مع الإصطدام بالحفرة تقوم شفة الجنط بقطع الكاوتش من الجانب نتيجة إنخفاض الجانب
فالتعديل اللى أنا عايز أعمله هيؤدى إلى زيادة السيد بمقدار 6 مم تقريبا
وأحب أشكر رأى حضرتك بخصوص إقتراحات المقاسات ولكن اللى مخللينى متمسك بالمقاس الجديد أن كثير من مستخدمى السيارة قاموا بالتعديل إليه ولم تقابلهم أى مشكلة كمان أنا بشوف عربيات كتير مركبة المقاس ده .
مرة تانية أحب أشكر حضرتم على مرورك وردك وتقبل تحياتى