الموضوع: تقرير عن الإيمجراند

المشاركة الأصلية كتبت بواسطة the lawyer

هذا التقرير تم نشره علي احد صفحات الفيسبوك امس ، وانشره للمناقشة ليس الا فأنا لست من ضمن ملاك الإيمجراند .

تقرير منقول للإفادة عن جيلي امجراند 7

مقدمه : الحقيقه وراء عمل التقرير الاتي : ان العربيه لسه جديده لازم الناس تعرف عنها تفصيليا دون الانحياز لها او لغيرها
- السبب الثاني ان العربيه عليها اقبال بسبب سعرها المغري دون التوعيه من احد لعيوبها
- السبب الثالث و الاهم وجود جروب غير معلوم المصدر على الفيس بوك يدعي جروب جيلي امجراند مش هنتكلم عنه كتير و لكن الضلال الذي يحدث به كافي جدا .... يضلون اي حد ينوي على شراء هذا الموديل من جيلي و من يتحدث عن عيب واحد بها يتم طرده من الجروب دون علمه .
__________________________________________________ _________
المواصفات الخاصه بالعربيه :
محرك : 1500cc بيخرج 107 حصان لسرعه قصوى : 165 كم
ناقل حركه : ل5 سرعات
الفرامل : في كتالوجها ABS&EBD
يعنى الكتالوج غير الحقيقه؟؟
__________________________________________________ _________
المميزات :
1- تعتبر بها 4 عجلات و بتمشي
2- واسعه من جوه
3- غبور حطلها ليدات في الفانوس الخلفي ( بسم الله ما شاء الله )
طيب رضا الحمد لله
__________________________________________________ _________
العيوب :
هنبدأ جزء جزء بالتفصيل من الامام الى الخلف .
سمعنا يابرنس

1-الفوانيس الاماميه : الباغه الخاصه بها ( البلاستيك الخارجي للفانوس ) بعد تجربة 5 شهور يحدث الاتي : الباغه بتبهت و بتصفر من 5 شهور ! و الرؤيه بتنعدم لان الاضائه هتضعف
ده لو فانوس 128 مش هيحصل معاه كده و عالعموم هى بقالها 8 شهور و لسه ماصفرش اكيد العيب فيا عشان بغسلها بسيجنال تو

2- الشبكه : هي شكلها نيكل من بره / و كما نعتاد ان معظم الشبكات النيكل بتكون قوية البنيان و تقيله زي بتاعت النوبيرا و الانوس و مرسيدس القديم
اما شبكة الامجراند مصنوعه من اردء انواع البلاسيك و سهلة الكسر
البلاستيك اكتر من النيكل مش اكتر

3- الاكصدام الامامي شبيه بالوررق مصنوع من اقل خامات الفيبر و للتأكد هات موديل منها و اسئل متخصص فيبر
تفتكر شركه جيلى الى اشترت فولفو هتصنع اكصدام بالشكل ده ؟؟

4- اما عن الاكصدام الحديد ما تحت الفيبر فلا يمثل اي وسيلة امان بسبب ضعفه الشديد و لتجربة ضعفه خارج السياره قم بالطرق عليه لعدة مرات 10 مرات مثلا و شاهد ماذا يحدث ؟
ياريت تجيبلنا فيديو نشاهد معاك الى هيحدث

5- مش هنتكلم عن عيب الريدياتير غير ان بعد استلام سياره من نفس الموديل زيرو بعد عمل 1600كيلو و بعد ملاحظة نقص المياه ان الريدياتير فيه خرم صغير مش ظاهر للمشتري
سبحان الله يعنى نفس الخرم فكل العربيات ده برنس اووى

6- معذره نسيت الفوجات : تعرف ان فيه شبه تخريفه كده في امجراند 7 ان الفوج بينور مع الريموت عند الفتح تقليد للمرسيدس بيحصل خطأ ان الفوج بيفتح و يقفل و بعد كده يفتح في اقل من ثوان غير ان الفوج فيه لمبتين لو حد شديد الملاحظه هيلاحظ ان الفوج الايسر اللمبه الشمال الي بتنور والفوج الايمن اللمبه اليمنى الي بتنور !!
يعنى عربيه حوله ده شىء هايل و كمان بتقلد مرسيدس دول عاوزين الحرق

7- الكابوت بعد فتحه لو بصيت عليه هتحس انه فيه سمكره لسه معموله في بعض العربيات مش كله / من الخارج في بعض العربيات ايضا بيكون الكبوت راشش و مرقع بعد تفكير عميق ان فيه عربيات منهم بتعمل حوادث قبل التسليم في نقلهم من المحافظات الى اخري ** و بالصور
ده حقيقى و مش الكابوت بس الى عاوز سمكرة ده دماغ واحد اعرفه الى عاوزه رد عالسخن

8- الرفارف من الداخل بداخل الحوض لو حضرتك قربت منها هتلاحظ سوء التقفيل الواضح مما يجعل وجود شك للمشتري
سوء التقفيل فكل حته ماجتش عالرفارف

المحرك و تفاصيله لاحقا
الدواخل :
9- الطابلوه : مليان عيوب مريره
ايه عيوبه عصبى مثلا و لا بيحب يقعد لوحده

التكييف الي التوكيل و الجروب سبب شراء هذا الموديل الفاشل يتحدثون عنه و كأنه مثل الثلاجه
10- عيوب التكييف : بعد جلسه طويله مع ملاك ايمجراند وجدنا ان التكييف ساعات بيشتغل لواحده (عيب كهربا ) و بعض الاحيان لم يعمل نهائي و بعض الاحيان عند الضغط و التشغيل لم يعمل الا بعض الضغط 3 مرات
- و هو تكييف عادي بدائي ولا تلاجه ولا اخر
بجد؟؟

11- الكاسيت : نفس مشكلة التكييف بيشتغل لوحده و بيقفل لوحده و هو شغال
- تيجي تدخل CD سطلع تاني مرتين مثلا و يرضى في الثالثه
الصوت على سبيل المثال لو حضرتك مشغله على درجة صوت 15 ممكن بعد دقيقه تلاقيه وصل ل 7 !!
- زراير الكاسيت بتعلق بشكل مستمر
الكاسيت سىء اه بس انت بتالف فموضوع انه بيشتغل لوحده؟؟

12- العداد بعد تجربة سير من ميدان لبنان الى دخلة الشيخ زايد العداد كان 12345 بعد الوصول فضل زي ما هو !
مافهمتش معنى رقم العداد فمش هرد

13- لمبة التشيك CHECK ENGINE دائما منوره من ساعة الزيرو مبتقفلش !! تكلم التوكيل يقولك عادي !
اه عادى فعلا سببها معروف امال انت شارى ازاى و مش سائل عالعيوب يابرنس

هتتفضل تروح تزور التوكيل بيحصل الاتي تتفضل الصالون و تدخل بتتقفل بس بطريقه غير شرعيه بيشيل فيوز من علبة الفيوزات من الاخر كده و لو تم قفلها عن طريق جهاز كشف بترجع تشتغل تاني
الله اعلم انت و ضميرك فالكلام ده

14- لمبة الزيت من المعروف عند اضائتها يتم غلق المحرك و اركن بأي جابن لانها من الممكن تسبب تلف المحرك . ( بالنسبه للمبه بتاعت الزيت انها بتقفل و تشتغل كل شويه زي الاشارات)
واضح ان عندك خلط فلمبه الزيت و لمبه الحزام عادى غير النظارة

15- هي الشركه كاتبها في كل حته السرعه القصوى 165 ايه لازمة وجود عداد 240 على عربيه لا يوجد بها اي نوع من الثبات و غير انها بتجيب 160 و صوتها بيعلى
طيب ممكن حضرتك تقولى انت راكب ايه عشان تقول انها مفيش ثبات عن نفسىجيبت بيها 185 و كانت ثابته .. موضوع العداد عشان نازله فالخليح 1800 سى سى فهو نفس العداد

16- الصبح لما تيجي تدور بتسمع صوت مياه غريب ورا الطابلوه ملوش سبب ده ايه يعني صرف !
ده طبيعى صوت السخن فماسورة التكييف و كذا عربيه كده مضايقك الغيه خالص

17- الكراسي الامامية ناشفه جدا جدا متختلفش عن الكراسي الخشب و مش مريح خالص
نجد واحد يريحك

18- الدواسات ليه مصممه لتعب السائق و خاصة الدبرياج يعتبر اكنك (بتتخانق معاه) متعب جدا
دبرياج صينى لازم يبقى جامد عشان مايكسرش

19- عداد البنزين ممكن يسبب قلق جامد للناس الي مش بتاخد بالها ازاي ؟ بعد تجربة تفويل العربيه للاخر لاحظت ان عداد البنزين نزل للنص بعد 15 دقيقه فقط ! وبيعلىلوحده ايضا
ده ديجيتال حضرتك فاهم يعنى ايه؟؟

20- الخامات رديئه جدا في الطابلوه من الممكن تكون مصنعه من البلاستيك
قارن بالفيرنا و قولى لكن اتفق معاك

21- المشكله الشهيره بالعربيه ديه الصدا ايوه حضرتك شاري عربيه جديده مصديه فك حضرتك البيبان الخلفيه و شوف الصدا و التوكيل بينكر ده ! امال الصدا جاي منين !
ضمير التوكيل فاجازة ده مش ذنب العربيه

22- ممكن حضرتك تحل ضهر الكنبه و تشوف الي تحتيه تشوف طريقة التقفيل تشبه و كأن عامل محاره مقفل الجزء الخلفي (سوء تقفيل)
نفس اجابه 21

23 - انا فعلا قولت انها واسعه بس هي مظهرها كده عشان منفوخه لكن ورا هيركب 3 بالعافيه زي الفيرنا
واضح ان الى بيركب عندك من نوعيه بثينه فمسرحيه تخاريف
__________________________________________________ ___________
24- الشنطه : تكون حضرتك لسه مستلم العربيه و الشنطه مش راضيه تفتح بالريموت مهما تحاول و بيكون الحل انك تروح التوكيل طب هي ليه متنزلش من غير حاجه زي كده
اصلها بتكسف

25- يعني ايه تروح تبص على عربيه لسه واقفه في التوكيل تفتح الشنطه تلاقي لمبة الشنطه الداخليه واقعه و السلك ظاهر
العين فلقت الحجر

اما عن لمبة الشنطه الخارجيه الي بتنور على النمر بعد ما احد الزملا اشتراها للاسف و لسه خارج من المعرض وجد لمبه شغاله و التانيه لا
نفس اجابه الى فوق

26- ممكن حضرتك و انت بتشتري ترفع الفرش الي في الشنطه و تطلع الاستبن و تتفرج بعينك بلاش انا اوضح تشوف بعينك افضل سوء التقفيل
تحت الفرش الصاج سوء تقفيل ايه الى فالحديد

27 - و حضرتك لسه بداخل الشنطه مفيش مانع انك تبص على ماركة السماعات الي راكبه هتلاقي اسمها GOLDI بتاعت احمد بهجت يعني سماعات تليفزيون !
حاجه تكسف صحيح
__________________________________________________ __________
نخرج تاني للجسم الخارجي :
28- تعرف ان فيه واقعه حصلت في توكيل جيلي فرع احمد عرابي المهندسين ان واحد راح يشتري عربيه بيحسس على الجانب الشمال وجد انه فيه بويه غير بتاعت المصنع فيه الجانب كله يعني رشه جانب معنى كده انها عملت حادثه
قام التوكيل شالها من الفرع ده و بعتها لمعرض في مدينة نصر باين و المعرض الي راحتله العربيه و عمل عليها عرض خصم 2000 جنيه و واحد غلبان لبسها بس الموضوع اطرمخ عليه
اثبت ياباشا

29- الاكصدامات الخلفيه تشهد بسوء التصنيع ايضا مثل الاماميه و للعلم ان كان الاكصدام الحديد الي تحت الفيبر الامامي ضعيف فا ده اضعف و بالصور
نفسى اشوفلك صورة من اول ام الموضوع

30- الفوجات الخلفيه في الاكصدام الي على طول منوره ده عيب كبير بعد ما سئلت اكثر من شخص و قال انها عاديه بتعلق
بتعلق و لا مش عارف يطفيها
__________________________________________________ ________

المحرك و ناقل الحركه و العفشه و الاداء و الاستهلاك :
31 - العربيه 1500 بتخرج 107 حصان ده كدب كان بان على اداء العربيه من غباء شركة جيلي انها بتجرب المحرك قبل التقفيل في جسم العربيه بمعنى ان حضرتك لو جربت العربيه على ال DYNO مش هتطلع عدد الاحصنه ده !
ده انت فالجلاشه

32- العربيه سحبها وحش جدا لو هنقارن بالفيرنا مثلا مش معنى كده اننا بنشكر في الفيرنا و نفس عدد الاحصنه !
طيب لو قارنا مثلا بالافيو الانوس و الاوبترا و النوبيرا هيحصل ايه؟؟

33- استهلاك العربيه عالي جدا و ملحوظ و اعتقد ناس كتير من ملاكها عندهم نفس الشكوى و هي على العموم بتسحب 7 لتر لكل 100 كم و اعتقد اعلى من كده و ده كدب من التوكيل
غير البوجيهات و شوف كده

34 - المحرك للي بيشكر فيه مش هقولك غير انه جاب وش سلندر بدون سبب ولا قرص على محرك ولا حرق عليه
اثبت ياباشا

- و مش كده و بس كنت في مركز صيانه شوفت عربيه امجراند جايبه مكنه كامله هتتغير في اقل من 7 شهور و معملش 100.000 كيلو حتى
نفس الكلام الى فوق

35- الفتيس طبعا الكل سمع عن عضة الفتيس بتاع الامجراند و ان الغيار مشواره طويل و الدبرياج تقيل و غير كده بلية الفتيس رديئه بمعنى الكلمه بتبوظ بسرعه
نفس الكلام الى فوق الى فوق
__________________________________________________ ______________

36- العفشه رديئة المستوى الى حد كبير و التعليق بها يستحق ان يقال عليه فاشل
طب انت ركبتها و لا حكمت ازاى و فاشل من ناحيه ايه ؟

العفشه الاماميه :
37- بالنسبه للمقصات العربيه بتاكل جلب مقصات كتير خاصة و الاكتر الجلب الكبيره
اثبت يابرنس

38- البارات بتحتاج كل فتره انها تتكبس على مكبس لانها بتخف بسرعه
اثبت يابرنس

39- المساعد و السوسته : المساعد ناشف جدا لان مفيش كاوتش فاصل بين السوسته و المساعد كبير او سميك الي موجود رفييع جدا و بيتقطع بسرعه مع الشغل الكتير و العفشه الاماميه بتحتاج كل فتره تتربط عليها بعادة العربيات الصيني
العفشه ناشفه عشان الثبات مش اكتر و مش بالطريقه الغبيه اركب السيراتو جنط 17 و قولى رائيك

العفشه الخلفيه :

40 - الدنجل الي عليه الكلام كله ورا ضعيف جدا جدا بعد اول مره انزل تحتيها و حسيت انه سبب كارثه كبيره ممكن تحصل و التعليق الخلفي سئ مكنش المفروض ناس تتكلم عنه كده و تفخم فيه
اثبت يابرنس

41 - العربيه ناشفه ورا نظرا لانها تعتبر واطيه مش عاليه خالص بيبان مع حمولة شخصين او 3 ورا
انظر لتعليق 23

42- بعد تجربة تغير عفشتها الخلفيه بأيدي اتأكدت انها عربيه فاشله المساعد عشان ينزل و يركب محتاج معجزه للاسف
سلامه ايدك يا حبيبى
__________________________________________________ __________
الفرامل :
موضوع ال ABS&EBD ده كذب العربيه معظم حوادثها من الفرامل اصلا
و حتى لو فيها ABS&EBD اكيد بخامات و نظام اقل و اردء و اسوء من اي عربيه
مش فاهم يعنى كذب و لا فيها

-الفرامل بتعتها لو حلوه فعلا مكانش ظهر الشخص الي عمل بيها حادثه على 120 بسبب انه حب يدوس فرامل زي بقيت الناس و الفرامل مجمعتش الا بعد ما داس 3 مرات على الفرامل ! بعد ما لبس و العربيه لسه جديده
43- ( و ده عشان فيها عيب نازل طبيعي في كل الموديلات في الماستر العمومي )
و ياترى لبس بعد الدوسه الثالثه و لا قبليها و ياترى لسه عايش ؟ طب لو عايش هل الايرباج فتح ؟ يعنى عربيه امنه ؟ بعمل حادثه على 120 و لسه عايش احمدك يارب

*للعلم وجود طنابير اماميه و خلفيه سكاكين ده المفروض يكون في كل عربيه مش حاجه ان اصحابها يفتخخروا بيها و للعلم تكلفتها على الشركه ارخص و برضه منفعش بالموديل ده
ماشى
__________________________________________________ ___________
الثبات :
44- العربيه معدومة الثبات بعد ال 100 و الي بيقول غير كده بيضحك على نفسه و او من يدعي بكده نفس من يقول ان الفيرنا فيها ثبات بعد الفيرنا
اى هرى... بص لتعليق 15
__________________________________________________ ____________
45- فيه عيب في دورة التبريد للعربيه و شكوى كتيره من ملاكها و ده بسبب ان المواسير و الاكواع في بعض العربيات نازله مسدوده ! و الثرموستات بتقفش
اه ترموستات فيها مشكله وقابلتنى شخصيا لكن مواسير مسدوده ديه جديده اكيد من كتر الصرف

46- عيب في قربة الباور و خراطيمها لما واحد يكون لسه مستلم من اسبوعين و يلاقي الطاره تقيله بسبب نقص زيت الباور بالقربه بدون سبب غير ان الخراطيم بتنشع زيت !
لا ياباشا الزيت هو الى نوعه وحش مش اكتر زيه زى الفتيس الى بيعض و ناس غيرته و بقى الفتيس تمام
__________________________________________________ _________
الامان :
47- فين الامان الي موجود بداخل السياره او خارجها
- الايرباج نازل معيوب اصلا بيطلع متأخر 2 ثانيه يعني تموت و هو لسه هيطلع
- صاج العربيه ملوش دعوه بالامان خالص لانه ضعيف جدا
- ABS&EBD ملهومش لازمه ما دام فيه عيب في الماستر العمومي !
- مفيش امان لعربيه معدومة الثبات
دى الدنيا كلها مفيهاش امان جات عليها اكتب مؤخر عالى شوية
__________________________________________________ _______________
التوكيل الخاص بها قبل و بعد البيع :

قبل الشراء كدب و نصب و عدم احترام لعقلية العميل

_ اتفضل حضرتك روح اي توكيل و شوف درجة الكدب في اقناع حضرتك بالعربيه و يحسسك انها تويوتا

بعد الشراء : التوكيل ماشي بشعار( و انا مالي )

تروح في اي مشكله و احنا مالنا و تلكيك على اي حاجه عشان يطلعك من الضمان
و ان حضرتك روحت و انت شادد حيلك عليهم و بتشخط فيهم هيعملوا الي حضرتك عاوزه كله

التوكيل اتكسر عينه بعد ما الناس اكتشفت عيب الصدا الي في العربيه ده و هتشوفه صور

بس برضه في معامله سيئه للناس مش كفاية سوء التقفيل !

و للعلم التوكيل بتاع غبور في الاقاليم و الصعيد مفهوش مهندسين و لو فيه تقريبا كانوا بيعيدوا سنه في كليتهم لان ناس كتير بتشتكي من سوء الصيانه هناك من الفنيين و المهندسين
التوكيل مقصر مفيش كلام
__________________________________________________ _________________
اما عن جروب جيلي امجراند :

عندما تقدمنا اليهم بتقديم يد المساعده رفضوا ذلك بطريقة سيئه

و عندما تقدمنا اليهم بعرض و شرح عيوب العربيه و ازاي تعالجها بنفسك او عند فنيين تم طردنا من الجروب

من قوانين الجروب هناك : عدم التحدث عن عيوب العربيه نهائي و عدم مقارنتها بأي عربيه غيرها
بمعنى عشان محدش يشوف ان فيه عربيه افضل منها في نفس السعر مثلا

و ان كانت المقارنه في حق امجراند فلا داعي لمسحها من على الجروب

الجروب بيطرد اي حد و يعطيه بلوك دون انذاره او معرفته قبل الطرد او معرفة سبب الطرد

و سبب طردي منه بعد ما احد الاشخاص كان مقبل على العربيه انا قولتله منصحكش بيها

و اي كلام لم يكن على مزاج مديري الجروب يتم مسحه على الفور

و كفايه ان مديري الجروب مش بيحترمو الاعضاء الي معاهم

- اعضاء الجروب عمله ايفينت يجتمعوا فيه و ايفينت له قوانين و محترم جدا عشان الاداره مش موافقه عليه اتخلت عنهم بكل سهوله و قالت احنا مش موافقين عليه !
- كفايه انهم بيرفضوا انك تتكلم عن العربيه بطريقه وحشه و اكنها اله مقدس

- كفايه ان محدش هناك بيحترم غيره الا لو كان رأيه من رأيه
- الجروب صاحب اكبر وسيله لضلال الناس هناك الي مش معاهم العربيه و خلوهم يشتروها من غير ما يعرفوهم اي عيب فيها و لو واحد من الي فوق من العيوب
- اي حد هناك بيسئل عن العربيه محدش بيقوله عن عيب كله بيتكلم عن مميزات وهميه و حاجات غريبه تقريبا محدش بيشوفها غيرهم
- اعضاء الجروب قارنوا بينها و بين الفانتازيا و طلعه الجيلي افضل منها !
الجروب له ماله و عليه ماعليه و طبعا لان اغلبهم من الملاك وماقابلهمش المصايب الى انت كاتبها فطبيعى هيشكروا فيها
__________________________________________________ ______________
لو انت قرأت الكلام ده و حسيت بجد انه يفرق مع او ناس كتير ما يعرفش العيوب و الكوارث ديه عن العربيه اعتبر ان ده خير و انت بتنشره و هتاخد ثواب فيه
انا رايى تجيب صور و فيديوهات عشان تثبت كلامك ياما تسكت ده الخير فعلا