الموضوع: خلي بالكو من عيالكو واخواتكو الصغيرين والكبار

المشاركة الأصلية كتبت بواسطة Ahmed Samy

انا مش معاك في الموضوع ده
ولأسباب عديدة

أولا ...لو كانت هذه الحلقة تعتبر سيئة فهي تحتوى على تصوير للنار و الجنة و فكرة الثواب و العقاب وان المخطئ لابد وان يسامح من قبل ضحيته (ودي ميزة)

اما انه رجع و خد اذن والحاجات دي فلاحظ انها كانت حلم في الفيلم


ثانيا .....
توم و جيري به الكثير من الثقافات المفيدة للأطفال و انا شخصيا هناك أشياء كثيرة أعلمها حتى اليوم يرجع الفضل في تعلمها لأفلام توم وجيري

ثالثا .......
اي بديل تتحدث عنه ؟؟؟ بكار ؟؟؟ مسلسل أقل ما يوصف به هو السطحية و الغباء مثله مثل العديد من البرامج المصرية الصنع أو الدبلجة المليئة بالألفاظ الرديئة مثل ابجني تجدني - و قشطة يا ريس و ما يدور على ألسنة المجرمين


رابعا .........
الفيلم الصامت هو أفضل ألف مرة من فيلم يتحدث بالعامية وهو ما يرسخها في الطفل و يجعلها طريقته الوحيدة للفهم
انا كنت طفل كارتوني من الطراز الأول و يرجع الفضل في عربيتي الجيدة (التي أفتخر بامتلاكها على لساني) لحفظي للقرآن الكريم و أيضا مشاهدتي لبرامج الأطفال المدبلجة باحتراف للعربية مثل جراندايزر و جونجار و كابتن ماجد و سالي و بيرين و ليدي ليدي و الفتى ياقوت و القائمة تطول


أما كلمات والت ديزني فاسمح لي أن أعلن عن سأمي من طريقة الإخوة العرب و المسلمين في لصق الاتهامات و التصريحات لمحاربة أي شئ يريدون حربه بداية من البيبسي وحتى توم وجيري مرورا بأحذية نايكي و كوكاكولا ..

ونهاية أوضح أنه وان كانت هنالك سلبيات لا ننكرها لأفلام الكارتون الأجنبية فهي تقابل كما لا يناهز من الإيجابيات

و الحل ...

كارتون عربي على مستوى والت ديزني و رساميه و مفكريه
والا نسكتتتتتتتتتتتتتتتت و نتفرج واحنا ساكتين

انا متفق مع الكلام ده تماما

المشاركة الأصلية كتبت بواسطة Ahmed Samy

انا كنت طفل كارتوني من الطراز الأول و يرجع الفضل في عربيتي الجيدة (التي أفتخر بامتلاكها على لساني) لحفظي للقرآن الكريم و أيضا مشاهدتي لبرامج الأطفال المدبلجة باحتراف للعربية مثل جراندايزر و جونجار و كابتن ماجد و سالي و بيرين و ليدي ليدي و الفتى ياقوت و القائمة تطول

واعتقد ان ده أحد أسباب اتقاني لنطق العربية أيضا




وانا عموما مش شايف حاجة غلط في الحلقة دي لأن في الآخر الموضوع أصلا حلم والأحلام ممكن يحصل فيها أي حاجة واللى المفروض يوصل للطفل هية فكرة الثواب والعقاب




وأحب أوضح حاجتين مهمين جدا

أولا : كارتون توم وجيري أبتدى يتعمل في الثلاثينات والأربعينات والإنتاج الغزير منه كان في الفترة من الخمسينات لغاية الستينات ... يعني ماكانش في حاجة أسمها إسرائيل ساعت ما أبتدوا يعملوه يبقى منين بقى بيشبهوا توم وجيري والكلب بأمريكا وإسرائيل والعرب زي ماناس كتير بتقول (اسرائيل كانت سنة 48 يعني قعدوا على الأقل يعملوا توم وجيري 15 سنة قبل مايبقى فيه حاجة إسمها إسرائيل)


ثانيا : هما لما عملوا الكارتون ده كانوا بيعملوه في المقام الأول لعيالهم همة ووالت ديزني ولا اللى جم بعده بعشر سنين كانوا يتخيلوا انه هايبقى كارتون عالمي كده لأن مكانش فيه على ايامهم أقمار صناعية للبث التفزيوني ولا انترنت عالمي ولا كان في دولة بتشتري برامج دولة تانية زي دلوقتي

والعرب لما عرفوا توم وجيري وابتدوا يعرضوه في تلفزيوناتهم كان في أواخر التمانينات واولهم كانت السعودية ودول الخليج بعدها ومصر ماعرفتوش الا في التسعينات

المشاركة الأصلية كتبت بواسطة meza

أنا شايف إن تحليل الكارتون بالطريقة دى .. هو إمتداد لنظرية المؤامرة.

نظرية المؤامرة

بالنسبة للكلام اللى اتقال على لسان رئيس مجلس إدارة شركة وارنر انا مش مصدقه مش عشان أنا أعرف الراجل ولا حاجة بس اتعودت ماصدقش حاجة إلا لما اسمعها بوداني لأن ياما كلام بيتقال وخلاص

ولما بيكون في أي حد شايف شركة أجنبية بتعمل منتج حرام مثلا (وقد يكون المنتج فعلا حرام مش دي قضيتنا دلوقتي) يقوم مطلع كلام على لسان أصحابها ومديريها انهم بيشتموا في العرب وبيقولوا عليهم كلاب واصحابها عمرهم ماقالو كده وأقرب مثل في ذهني دلوقتي الكلام اللى اتقال على مايكل جاكسون انه قال "العرب دول بهايم ورعاع وبتوع جمال وانا مايشرفنيش اني اسطواناتي تتباع عندهم" والشخص دا عمره ماقال كده وانا بنفسي سمعته بالصدفة بعدها بكام سنة على ما الكلام وصله بينكر الكلام ده وبيقول انه عمره ماقال كده نهائي

وزي ما قالوا ان سينسبري صاحبه يهودي ومرخص اللبن عشان اللبن بتاعه في حاجات إسرائيل اللى حاطاها بتعمل (الهوايل) لمجرد انهم عايزين يضربوه في السوق وان حرام نتعامل معاه عشان هوة يهودي (ولو فرضنا انه يهودي فعلا ماهو الرسول صلى الله عليه وسلم كان بيتعامل معاهم عادي وبيبيع ويشتري منهم ويديهم عهود وياخد عليهم عهود) وعلى فكرة صاحب سينسبيري مش يهودي ولا حاجة دي سلسلة محلات ليها مجلس إدارة ومساهمين من بريطانيا وجميع انحاء العالم

وفي مقولة ان بيل جيتس يهودي ومعرفش مدى صحتها ومايهمنيش أعرف لأن الراجل ماعملش حاجة وحشة بالعكس دع بيعمل اللى العرب والمسلمين ماعملوهوش (عامل جمعيات خيرية بمليارات من أمواله الخاصة لفقراء العالم كله مش أمريكا بس





مانا لما أكدب واقول كلام على لسان حد عمره ماقاله ده حرام ومن الكبائر (الغيبة والنميمة والبهتان) مش معنى ان الناس دي بتعمل حاجات غلط اني أقول عليهم حاجات تانية عمرهم ماقالوها

وبعدين معروف ان أتنين من أشهر مخرجي توم وجيري القدام قبل قيام دولة اسرائيل هما يهود مش فاكر اساميهم بس موجودة فى تترات معظم الحلقات القديمة

طيب يا جماعة الخير , كلامكوا كله حلو وأراء كويسه ونقاش بصراحه عاجبني ,,
ليه بقى طيب ما ناخدش الحيطه ونشدد أكتر الرقابه ؟؟؟
ماهو الله الوحيد الأعلم بنوايا اللي عاملينهم , سواء بدر منهم السوء أو لأ ,, ليه أصلا ما نحطاتش وخصوصا أنكم مجمعين أنهم عاملين الكلام ده لأبناءهم بالوجه الأول ,
يعني أكيد موروث ثقافاتهم كله محطوط فيه عشان يزراعوه في أبناءهم , أكيد فيه طبعا العنصريه وخصوصا ان فترة التلاتين والأربعينات والفترات دي كانت العنصريه على أشدها كاللون والجنسيه والدين ,,
ثقافتهم غيرنا , لما يجيب ولد بيقبل فتاة غالبا عادي عندهم لأن كده كده الطفل حيشوف ده في كل مكان +أنهم بيأصلوه فيه عشان حيوصل سن معين حيبدأ يعمل كده ,, أحنا عندنا مش كده فليه نطبع أبناءنا على الكلام ده ,,
عشان كده بتساءل ليه مبنعملش حاجه فيها تقاليدنا وعادتنا
وليه لما بدأنا نعمل ,, عملنا اللي فيه عادتهم _متهيألي لأن اللي عمل ده خلاص أتطبع بطباعهم وبقت دي طباع مجتمعه للأسف_
ليه منبدأش نرجع تاني لأصلنا وكمان نبقى مسايرين العصر ,
ليه مابنختارش صح القائمين عالأدوار ؟؟!!!
في حد في الدنيا يجيب سمية الخشاب تعمل دور في كارتون ؟؟
لأ والأدهى بقت الأثارة كمان موجود في الأفلام والمسلسلات والكارتون كمان !!!!
ليه مانصرفش بزمه وبضمير ونطلع حاجه صح ؟؟؟
ليه بقينا بنبتذل كل حاجه
وليه بقينا مجرد مقلدين وcopy n paste؟؟

ليه منجمعش محترفين الجرافيكس في مكان ونحاول بيهم نعمل حاجه نعيد بيها أطفالنا للعادات السليمه والأدب والأحترام ,, ومن قبلهم الكبار ,,
الشمكله مش والديزني ولا غيرهم ,, أحنا بقينا خلاص بنقلدهم بالصح والغلط بتاعهم,
ماكذبش انهم متفوقين وبيعملوا حاجات هايله فيها ,, بس الله أعلم بنوياهم,,
وأكبر دليل أننا لما بدأنا نعمل بقينا نعمل أقذر منهم ..
صح ولا غلطان ,,
أتمنى المعنى اللي أقصده يكون وصلكوا من أني عملت الموضوع ...

المشاركة الأصلية كتبت بواسطة Ahmed Samy

انا مش معاك في الموضوع ده
ولأسباب عديدة

أولا ...لو كانت هذه الحلقة تعتبر سيئة فهي تحتوى على تصوير للنار و الجنة و فكرة الثواب و العقاب وان المخطئ لابد وان يسامح من قبل ضحيته (ودي ميزة)

اما انه رجع و خد اذن والحاجات دي فلاحظ انها كانت حلم في الفيلم


ثانيا .....
توم و جيري به الكثير من الثقافات المفيدة للأطفال و انا شخصيا هناك أشياء كثيرة أعلمها حتى اليوم يرجع الفضل في تعلمها لأفلام توم وجيري

ثالثا .......
اي بديل تتحدث عنه ؟؟؟ بكار ؟؟؟ مسلسل أقل ما يوصف به هو السطحية و الغباء مثله مثل العديد من البرامج المصرية الصنع أو الدبلجة المليئة بالألفاظ الرديئة مثل ابجني تجدني - و قشطة يا ريس و ما يدور على ألسنة المجرمين


رابعا .........
الفيلم الصامت هو أفضل ألف مرة من فيلم يتحدث بالعامية وهو ما يرسخها في الطفل و يجعلها طريقته الوحيدة للفهم
انا كنت طفل كارتوني من الطراز الأول و يرجع الفضل في عربيتي الجيدة (التي أفتخر بامتلاكها على لساني) لحفظي للقرآن الكريم و أيضا مشاهدتي لبرامج الأطفال المدبلجة باحتراف للعربية مثل جراندايزر و جونجار و كابتن ماجد و سالي و بيرين و ليدي ليدي و الفتى ياقوت و القائمة تطول


أما كلمات والت ديزني فاسمح لي أن أعلن عن سأمي من طريقة الإخوة العرب و المسلمين في لصق الاتهامات و التصريحات لمحاربة أي شئ يريدون حربه بداية من البيبسي وحتى توم وجيري مرورا بأحذية نايكي و كوكاكولا ..

ونهاية أوضح أنه وان كانت هنالك سلبيات لا ننكرها لأفلام الكارتون الأجنبية فهي تقابل كما لا يناهز من الإيجابيات

و الحل ...

كارتون عربي على مستوى والت ديزني و رساميه و مفكريه
والا نسكتتتتتتتتتتتتتتتت و نتفرج واحنا ساكتين

اوءيد الكلام دا بشدة

انا اعترض معاك فى الفكرة ديه لان مظنيش ان الناس ديه وهيا بتعمل الكرتون ده مش بقبا فى نيتها حاجة زى كدة
ده غير ان مصر لسة معرفتش تعمل كرتون ناجح زى ده انا عن نفسى لما بلاقيه على التلفزيون بعد اتفرج عليه

انا اعتقد ان احسن مسلسل مصري اتعمل للاطفال هو قصص الانبياء اللي بالصلصال اللي كان بيجي عالاولى زمان و احسن حاجة انهم كانوا عاملين الانبياء على شكل نور

شئ منافي للمسلسل دة

في فلم اجنبي شوفته مش فاكر اسمه المهم المفروض ان الله(استغفر الله العظيم) هو مجرد ممثل و هيختار و احد تاني المهم ان التاني هتوصلوا الدعوات و الصلوات عالايميل و هيقدر يتحكم في قضر الناس

احسن حاجة عجبتني في الحوار انه مفيش خلافات و اسلوب متحضر للحوار ياريت نكمل كدة

المشاركة الأصلية كتبت بواسطة hussein

نقطتين فى غاية الخطوره والاهميه و رأى اذا كانالاطفال اتعلمو كتير من توم و جيرى فالنقطتين دول بالذات كافيين جدا انهم يمسحوا كل الحاجات الحلوه اللى اتعلموها من توم و جيرى
تخيل ان الطفل يكون فى دماغو انه هيحسابو قطه
ولمل تيجى تقولو ربنا يسامحك
تفتكر هيجى فى دماغو ميين اللى هيسامحو ؟؟!!!!!!!!
طبعا الكارتون زى كل حاجه حولينا فى الكويس و الوحش وربنا يسترها على العيال :)

نقطة جيدة جدا

حضرتك لو اديت ابنك قطعة صلصال (طينة يعني) و قولتله اعملها شجرة

هايجرب يعمل

هاتلاقيه بيجرب خطوات صحيحة و خطوات خاطئة ولو سيبته هايطلع شكلها و حش غالبا بسبب الخطوات الخاطئة ...

لكن مع المتابعة ..لما تلاقيه جرب خطوة صح تشجعة وتأكد على الخطوة دي
ولما يجرب الغلط نمسك ايده و نقوله كده مش تمام

مع تكرار التنقيح الفكري لتجارب الطفل هانوصل بيه انه ياخد التجارب الصحيحة و يبعد عن الخاطئة

يبقى الحدوته دي (اللي في الفيلم) لو قعدنا مع ابننا بعدها قعدة صغيرة نأكد على اللي يفيدنا (ان فيه نار و جنة و حساب و كتاب و لما هانموت هانطلع لربنا)
و نفند اللي مايفيدناش (ان القط مش هو اللي بيحاسب ده علشان كارتون ..اللي بيحاسبنا هو ربنا و ما ينفعش نرسمه ) (ماحدش بيرجع تاني من فوق عند ربنا بس هو توم كان بيحلم)


كده يعني

يبقى زي ما الكل أكد دورنا الرقابي لابد منه
و غرس أصولنا القومية و الدينية (على اختلافها) هي مسؤليتنا نحن
وتواجدنا لابد و أن يكون أقوى من تواجد الأفلام و الميديا وليس التواجد المقصود وقتيا فقط
بل أقصد التواجد المعنوي ان الوالد يكون معروف لدى الطفل انه المرجعية الأقوى

وده عن طريق بناء جسر من الثقة مع الطفل و احترام عقليته والالتزام بالكون قدوة حسنه و مثلا أعلى على الدوام

انا فاكر الحلقة دي كويس جدا جدا جداَ مع إني شفتها و انا صغير أوي معتقدش أكتر من 5 ولا 6 سنين .. و لما أبصلها بمنظور و انا دلوقت عندي 21 سنة شايف إن دي بصراحة طريقة عبقرية لتوصيل فكرة الثواب و العقاب و الجنة و النار و التسامح و المحبة بين الناس لطفل صغير مداركه علي قده .

و انا برضه زي دكتور أحمد سامي كنت طفل كرتوني جداَ و لغاية دلوقت حافظ مواسم كاملة من مازنجر و جريندايزر و كابتن ماجد و طاردو الأشباح و كل ده (مكنتش بحب توم و جيري أوي عشان مكانوش بيتكلموا ) بس جزء كبير من معرفتي للغة العربية كانت من مجلة ميكي و الكارتون المدبلج و أكيد أكيد مش من المدرسة .

المشكلة الحقيقية فعلا هي نظرية المؤامرة .. إن احنا بنفسر أي حاجة جاية من الخارج من ناس مش مسلمين إن جواها مصيبة و عداء و مؤامرة لفناء الإسلام! مع إن في معظم الأحوال إحنا اللي بنروح نشتري الحاجات دي مش هم اللي بيفرضوها علينا يعني إحنا اللي بنجيها و نشتري حقوق الدبلجة .

فيه مشكلتين في العقلية دي أولا إنها متصورة إن غير المسلمين (المشركين برسالة نبينا محمد صلي الله عليه و سلم علي حد تعبير كاتب الموضوع ) متخيلين إنهم وحوش منغولية لها قرون و مناخير طويلة و طول الليل متجمعين عالترابيزة بيكلموا بعض بهمسات شريرة عن المقلب اللي هيلبسوه للأمة الإسلامية و يفترسوها و يبيدوها من علي وجه الأرض .. و ده مش صحيح بالتأكيد كلنا بني أدمين في الأخر بندور علي التقدير و البسمة و الذهن الصافي و بس كأي إنسان خلقه ربنا .. أي حاجة في الدنيا لو تفكيرك أساسه نظرية المؤامرة ممكن تفسرها تفسير مش كويس .

المشكلة التانية إن المسلمين حالياَ مسابوش حد غير و إتهموه بالعنصرية و إنه بيضطهد المسلمين و يعاديهم في حين إن المجتمع الإسلامي حالياَ لا يخلو من بعض العنصرية و التحيز للإسلام .. يعني لو رجل أعمال علماني تلاقي الناس كلها بتشتم فيه لمجرد إنه علماني .. و لو يهودي عمل إنجاز يقللوا منه لمجرد إنه يهودي .. بغض النظر عن لو الراجل ده عمل إنجاز كبير فعلا و بيقول كلام كويس يفيد الجميع! بإختصار إن مفيش ثقة أو حب إلا لما هو داخل المجتمع الإسلامي .. فا إحنا دلوقت بنطلب من الغرب إن يدونا حرية الإندماج معاهم .. بس إحنا عمرنا ما هنأمنلكوا ولا نحبكوا ! طب إزاي !؟

فيه جملة قالها عادل إمام في فيلمه الأخير عجبتني أوي .. قال البذرة في الأرض مبتعرفش اللي زرعها مسلم ولا مسيحي ..
يعني الخير بيكبر بغض النظر عن مين اللي عمله .. و المفروض إننا نحب الخير مش دايماَ نشكك في نوايا اللي عمله .. يعني انا متخيل لو كان توم و جيري ده عربي في الأساس كانت الناس هتقول عليه قمة العبقرية في التواصل مع الأطفال .. و التواصل مع الأطفال ده للأسف فن لا نجيده حالياَ كان مجرد بعض المحاولات اللي بعضها يستحق التقدير بجد في الماضي و لكن إندثرت مع الوقت .