استفسار بخصوص سوبارو امبريزا ٢٠٠٩

رجالة السوبارو

صديق ليا بيدور على عربية و وقعت قدمانا سوبارو امبريزا ٢٠٠٩ سيدان بالمواصفات دي:
اوتوماتيك الفئة اللي فيها الكروز كنترول و ٦ ايرباجز و سخانات الكراسي
٦٢٠٠٠كم
فابريكة بالكامل من الداخل و الخارج عدا اكصدامين و رفرف امامي شمال
العربية موجودة في معرض و وصلنا معاه لسعر ٨٥٠٠٠ و اتفقنا هانروح نكشف عليها في التوكيل...هو بيقول هتلاقوا فيها تقريبا علبة دركسيون علشان الباور مش مظبوط و حاجة في حساسات الموتور علشان لمبة الشيك انجن منورة لكن غير كده مفهاش حاجة.

الأسئلة اللي بتدور في دماغنا بقى:
العربية دي كويسة و سعرها مناسب؟
قطع غيارها فعلا متعبة و غالية؟
لو احتاجت حاجات هنلاقيها استيراد بسهولة؟
و اخيرا ناخد بالنا من ايه؟

متشكر جدا جدا

اولا ربنا يوفقك
ثانيا انا راى ابعد عنها ودا لسبب واحد
كان مع صاحبى سوبارو 2007 اوتو
لحد ما كانت عامله 120 الف مغيرش حاجه خالص فى العفشه عدا جلبه واحده و مساعد خلفى كان ابتدى يضعف مع انه كان بيلبس كل مطبات الطريق الزراعى تقريبا و النقر و سواقته بهدله لاى عربيه بس لان
السوبارو عفشتها قويه جدا فلحمد لله العربيه كانت زى الفل
فإزاى عربيه 2009 و عامله 62 الف و علبه دركسيونها تبوظ !؟ اعتقد دا دليل على استخدام سىء جدا او ان احتمال العداد مش مزبوط\و ايه الى يخلى التشك انجن ينور غير ان العربيه كانت بتتصين مش فى الوكيل او اتلعب في الكهربا بتاعتها

اوعا تشتري العربية دي العربية دي رشة كلها وعاملة 290000 كم وهو اللي منزل عدادها وهي لونها اسود وعند ميدو كار في مدينة نصر وفيها خبطة في الدواخل والكلام ده علي مسئوليتي الشخصية من ابو غالي نفسه انا جايب الكلام ده

اقتباس:

---

المشاركة الأصلية كتبت بواسطة honda_lover

اوعا تشتري العربية دي العربية دي رشة كلها وعاملة 290000 كم وهو اللي منزل عدادها وهي لونها اسود وعند ميدو كار في مدينة نصر وفيها خبطة في الدواخل والكلام ده علي مسئوليتي الشخصية من ابو غالي نفسه انا جايب الكلام ده

---

لو طلعت نفس العربية يبقى بجد صدفة ملوهاش حل, متيجو نعمل موضوع نحزر فيه الناس من العربيات المضروبه فى السوق و حينفع جدا الناس اللى بتدور على عربيات للشراء

هي فعلا نفس العربية و بالفعل احنا قفلنا منها و طنشناها من يوميها علشان كنا حاسين ان فيها حاجة مش تمام

عاش نايل موتورز و رجالته الجامده :)