الموضوع: لما بنيجي نستلم العربية

السادة الافاضل:
الموضوع دا كان موجود على PAGE بيقولك BY2OLLAK على ال-FACEBOOK

ف قلت ممكن يكون مفيد ل حضراتكم

عن خطوات إستلام عربية جديدة إن شاء الله



شير عشان غيرك يستفيد

لما بنيجي نستلم العربية طبعا الواحد بيبقي ساعات مش عارف يعمل ايه نظرا لأنه معندوش خبرة .. في السطور الجاية دي هنشرح إيه الخطوات اللي هتعملها لما تروح تستلم عربيتك الجديدة.

في البداية، وقت الاستلام دايما حاول على قد ما تقدر تستلم العربية بالنهار وخاصة والشمس عمودية يعني من الضهر للعصر عشان اي حاجة تشوفها كويس، وبعدين نعمل الخطوات الجاية دي.


من برة العربية:
- تاخد لفة حوالين العربية وتبص اذا كان فيها اي خبطة او خدوش او مرشوشة او فروق، ولو الاستيكر الابيض ده موجود شيله في ساعتها عشان لو فيه حاجة مستخبية كده ولا كده.
- تبص تحت العربية وتشوف فيه حاجة ملحومة في العربية من تحت او صدأ.
- تفتح وتقفل الابواب وتشوف لما بتتقفل مظبوطة ولا فيه فرق.
- تشوف وقفة العربية بشكل عام من بعيد مظبوطة تمام ولا معووجة.


من جوة العربية:
- تبص ع الفرش او الفيبر يعني متقفل مش مكسور ولا مشروخ و لا حتة مفكوكة.
- تشوف الازاز سليم وبيطلع وبينزل بدون مشاكل ولا بتسمع صوت تزييق والاكرة شغالة كويس او لو الازاز كهربا الزراير شغالة كويس بدون ما تعلق طالع نازل اكتر من مرة ورا بعض.
- المسوجر بيقفل ويفتح بدون مشاكل، الاكرة برة و جوة تمام والسنترلوك ان وجد.
- الكاوتش اللي حوالين القايم و الباب تمام مش مقطوع ولا فيه اي مشاكل.
- تقعد على الكرسي وتشوف بيطلع لقدام ولورا، والضهر بيرجع لورا وقدام والفرش والكرسي تمام مفيهوش اي قطع.
- تشوف الكنبة سلمية مش ملخلخة ولا فيها اي قطع، ولو الكنبة من اللي ضهرها بيتقفل ويتفتح تشوفها بتتقفل وتتفتح تمام بدون مشاكل.
- تشوف احزمة الامان كلها لما تشدها بترجع تاني ولا بتعلق والمكان اللي بيدخل فيه الحزام سليم ولا بيعلق.
- الكاسيت او السي دي تجرب كل زرايره و فتحاته والسماعات والصوت، وتشوف الراديو والاريال ميكنش مكسور ومحطوط منظر والصوت تمام.
- شوف الولاعة شغالة ولا لأ، والطفاية موجودة ولا لأ.
- تشوف درج التابلوه بيفتح كويس ومش مشروخ ولا فيه مشكلة، والشماسات بتفتح وتقفل ولا لأ.
- المرايات بتفتح وتقفل بدون مشاكل.
- راجع على كل الفيبر بتاع العربية من اول التابلوه مرورا بعتب الباب لحد الشنطة، واتأكد ان كله متركب تمام و مش ملخلخ و لا فيه كلبسات مكسورة.

بعدين نبص على الشنطة:
- تشوف الشنطة بتتفح وتقفل تمام ولا فيه مشاكل والمفتاح شغال ولا بيعصلج.
- تبص في الشنطة وتشيل الفرش اللي موجود وتبص مفيش صدأ والاستبن موجود والكوريك او المثلث وشنطة الاسعافات لو بتنزل مع العربية موجودين ولا لأ.
- الرف اللي بيتحط عليه السماعات سليم ولا مكسور.


بعد كده نطلع الحوض او يعني المكان اللي فيه الموتور:
- تفتح من جوة وتشوف الكبوت بيفتح ويتقفل كويس ولا فيه مشكلة.
- تبص ع الحوض وتتأكد ان ميكونش فيه صدأ.
- مفيش اي حاجة مفكوكة و كله سليم و كله لسه جديد.
- تراجع السوائل بقي كلها زي زيت الموتور تكشف عليه و زيت الفرامل و مية المساحات و الريدياتير.


أخر مرحلة وهي تجربة العربية:
- ندور العربية ونسخن العربية ونسمع صوت الموتور كويس وهادي ولا فيه مشكلة، وهل فيه اي صوت زي دوشة او رجرجة ولا لأ.
- تلف الدريكسيون يمين وشمال، وهل فيه مشاكل او صوت تزييق.
- تجرب الدواسات تدوس دبرياج وتجيب الأول والتاني والتالت والرابع والخامس لو موجود، ومارشدير وفرامل اليد بتطلع وتنزل بدون مشاكل.

إنتهت النصايح ومبروك العربية الجديدة