صيانة ال ٢٠ الف لل ٣٠١ :-)
السلام عليكم يا رجالة نايل موتورز
انا عامل الموضوع ده علي السريع كده عشان افيد اي حد بيسأل او يدور علي تفاصيل تخص البيجو ٣٠١ . عشان ان استفدت كتير برضه من مواضيع الرجالة هنا فبالتالي مقدرش ابخل عليكو بأي تجارب بالعربية.
من حوالي شهر كده كملت ٢٠ الف كم بالعربية وان شاء الله العربية في شهر ٥ الجاي تتم معايا سنة كاملة مشفتش منها حاجة وحشة الصراحة او بالاصح مزعلتنيش في حاجة
المهم حجزت ميعاد في فرع بيجو غمرة . وصلت الساعة ١٠ تقريبا ، استلموا العربية وسالوني عن اي ملاحظات في العربية ومكانش يعني في ملاحظات تذكر غير صوت تزييقة في الكرسي بتاع السواق . وصوت تحجيرة في فرامل العربية في بعض الاوقات في المطالع فقط . وطلبت منهم تركيب سماعتين خلفيتين عشان عربيتي بيز لاين
الصيانة اخدت وقت حوالي ساعتين تم فيهم الاتي :-
تغير زيت محرك
تيل فرامل
فلتر هواء
فلتر تكييف
فلتر زيت
بوجيهات
علبة فوم لتنظيف الموتور
اتكلفت الصيانة ١٦٠٠ جنيه شاملة المصنعيات واللي علا الفاتورة هو تيل الفرامل تمنه تقريباً ٤٠٠ جنيه.
بعد كده قالولي مفيش وقت نركب السماعات ف تعالي يوم تاني.
وفعلا حجزت ورحت يوم تاني وركبت عدد ٢ سماعة خلفية وانكلفو ٨٠٠ جنيه شامل المصنعية.
العربية الحمد لله كويسة جداً وبقول للالي بيفكر توكل علي الله واشتري انا كده عملت بالعربية ٢٣٠٠٠ كم لحد دلوقتي.
احسن حاجة في الموضوع:
التوكيل كويس وبيهتموا بالعملاء كويس وشايف اني اسعاره كويسة يعني .
العربية كويسة متخافوش منها .
اوحش حاجة بقي :
المكان اللي موجود فيه مركز الصيانة فرع غمرة مكان سئ لوجود توكيل منطقة زحمة وصعب الوصول والخروج منها.
التوكيل بيحط زيت موبيل
موضوع تزييق الكرسي متحلش في المرتين الاي رحتهم وفي النهاية اوصو بتغيير الكرسي بس علي الانتظار شوية.
نصيحة:
خد معاك زيت غير موبيل
روح بدري
متخليهومش يغيروا حاجة او يشيلوا حاجة قبل ما يقولولك .
احتفظ بقطع الغيار القديمة فهي اكيد لسة جديدة برضة وممكن تنفع قدام في حالات الطوارئ
متروحش للتوكيل في حالات السمكرة ومتفتكرش انو احسن واني التأمين هينفعك . في نقطة السمكرة دي بالذات شايف اني بره في ناس شاطرة لاني الموضوع محتاج حرفية فقط . ده غير اني التأمين عند ورش بره ومش بيحب التعامل مع التوكيل عشان غالي وبالتالي بيشيل المواطن الغلبان اللي هو انت وانا في اي فلوس ، كان عندي خبط بسيطة جداً في الرفرف الخلفي التوكيل اخد مني ٢٣٠ جنيه معاينة وقالي هتتكلف ٣٠٠٠ . المهم صلحتها بره علي البارد في الحرفيين ب ١٥٠ جنيه وخسرت بس انا تمن المعاينة.
وشكراً ليكم يا رب اكون افدتكم ولو بشئ بسيط
