ألا ليت الشباب يعود يوماً !!!!
سلام الله عليكم ورحمته وبركاته
جميعنا نعلم جيداً هذه المقولة " ألا ليت الشباب يعود يوماً "
وكثيرنا يرددها بينه وبين نفسه ويكتفي بذلك ويصاب بالإحباط وأحياناً بالأسف
طيب ما تيجوا نفكر يعقل شوية ونشوف هو إحنا عايزين الزمن يرجع بينا ليه؟
1_ ممكن واحد ماعاش طفولته وبيشعر بالحسرة كل لما بيشوف أولاده بيلعبوا
" طيب إيه المانع لما تشارك أبنك لعبه؟ وتجري وراه وتقرب منه وتتعلم منه
خصوصا التقنيات الحديثة اللي كتير مازال بيحسها مزعجة له"
خصص يوم للأسرة اخرجوا وخرج كل طاقتك معاهم وقتها صدقني وقتها
هترجع بروح تانية خالص مبسوط ومتفائل
2_ ممكن واحد ما إتعلم كفاية ودوامة الحياة والشغل أخدته
طيب إيه المانع دلوقتي عمر المعرفة ما اقتصرت على المدارس ، شوف إنت بتحب
أي فرع من المعرفة وابدأ اشبع هوايتك دي وعلم نفسك بنفسك من جديد
وعلى فكرة هتلاقي الوقت لو إنت فعلاً عايز لكن إنت محتاج شوية إصرار
3ـ كان نفسك تحفظ قرآن وتتفقه في دينك؟
وايه يعني ؟ القرآن في المصحف وفي الراديو وعلى الكمبيوتر
خصص بس وقت لحفظ كل يوم آيتين ( بلاش تستصغر الأمر )
أول الغيث قطرة
4_ كان نفسك تحب وتعيش الحب لكن للأسف اتجوزت جواز صالونات؟
وإيه يعني ؟ بالعكس عندك فرصة أكبر واحسن
عيش ده مع زوجتك أم أولادك ( أقسم بربي المرأة لو شافت من زوجها الحب
والاهتمام والرعاية والتدليل لأذهلته وعشقت رعايته وتدليله وكانت له نعم الصديقة
والأم والأخت والحبيبة ) فاعقلها وتوكل ولك في رسولنا الكريم أسوة حسنة
والأمثلة كثيرة التي تجعلك تقول ( ألا ليت الشباب يعود يوماً )
اطرحها جانباً وإبدأ بأن تعيش يومك برؤية جديدة وبإحساس أجدد
دمتم طيبين برعاية الله وحفظه