الموضوع: مقارنة سريعة بين الفانتازيا والباسات الجديدة :)

السلام عليكم أحبائي الكرام..
طبعاً حضراتكم عارفين إن ربنا أنعم عليا بالباسات بعد تفكير طويل..جايبها عاملة 5000 كيلو وحالياً عاملة 10000 كيلو..والحمد لله ماشية زي الفل بلا أي مشاكل.قولت أعمل مقارنة سريعة بينها وبين حفيدتها الفانتازيا :)

بسم الله





ندخل في الموضوع علي طول :-
-------------------------------

طبعاً العربيتين لا غبار عليهم..والفانتازيا هي السبب الرئيسي اللي ساعدني في اتخاذ قراري بالنسبة للباسات.لأنها من أحسن العربيات اللي ربنا أنعم عليها بيهم وعمرها ما خذلتني.

أوجه الشبه :-
---------------
العربيتي روحهم قريبة أوي من بعض.يعني لما تركب الباسات وتنزل منها تركب الفانتازيا....تحس إن فيهم تقارب شديد من بعض.يعني نفس نظام الـ climatronic ونفس الكاسيت تقريباً.مروراً بشاشة العدادات .. يعني.

أسلوب القيادة ( بصرف النظر عن التسارع عشان ده هنتكلم فيه لوحده ) لكن كثبات علي الطريق تقريباً واحد. العفشة نفس المتانة..ثقتك في العربية انها هتسعفك في أي موقف مفاجئ سواء فرامل أو تفادي ميختلفوش عن بعض تقريباً.

الخامات المستخدمة بوجه عام وجودة التقفيل متشابهين بنسبة 90%

أوجه الإختلاف :-
----------------

- العفشة في الباسات أنعم شوية بسيطة.
- الباور في الباسات أخف بشكل ملحوظ في وضع الثبات ومش عارف إيه السر لأن المفترض إن نفس الـ system
- العزل أعلي في الباسات خصوووصاً صوت الموتور.
- اللمسة الجمالية في الـ interior وإن كان ده ميقللش من وقار الفانتازيا بس في الباسات تشدك بجد في الديزاين بتاعها خصوصاً منطقة الكونسول والفتيس وشكل الطارة بزرايرها والعدادات اللي بتنور علي حسب قوة الإضاءة المحيطة في الشارع.
- تبريد التكييف أسرع من الفانتازيا.
- المخدع اللي في الكنبة الخلفية بالـ cup holders ده كان المفروض ميتشالش من الفانتازيا.
- مخرج فيشة الكهربة الموجود تحت فتحة التكييف الخلفية في الباسا..إختراع يا كوتش.
- 10 إيرباج مقابل 2 في الفانتازيا.
- جنوط 16 مقابل طاسات في الفانتازيا.
- 12 سماعة في الباسات مقابل 8 في الفانتازيا ( وطبعاً ده ميقللش من قوة الـ sound system في الفانتازيا اللي كان بيهد العربية ).
- نظام الإضاءة الداخلية في الباسات أحلي ولونه الأحمر حلو وتوزيعته علي طابلوه حلوة.
- القاعدة في الصالون أريح وأوسع من الفانتازيا..وخصوصاً كرسي السائق اللي كهربة و فيه lumber support .. ومساند الرأس مريحة جداً خصوصا موضوع إنك تقدر تحركها للأمام والخلف مش فوق وتحت فقط.
- وجود حساس ضوء للفوانيس الأمامية.
- وجود مفتاح Auto Hold لفتيس العربية وده أوبشن حلو فعلاً.

التسارع :-
-------------
- طبعاً تسارع الفانتازيا كان بالنسبة ليا مُرضي وبجري بيها زي منا عايز وبوصل بيها الـ 200 من غير مشاكل..ولكن :- اللي إخترع المواتير الـ TSI ده راجل ابن أبلسة.وخصوصاً مع الفتيس البعبع اللي مخوف الناس علي مستوي العالم ( DSG ) والجميل في ده كله موضوع الـ Shifting paddles في الدريكسيون.آخر سرعة وصلت ليها 215 وكان فيها تاني.والتسارع بتاع العربية من الـ 0-100 هااااايل.


حاجات مضيقاني :-
-------------------

- الفانتازيا كانت مرايات ضم كهربة الباسات لا مش عارف جالهم قلب ازاي يعملوها كده.
- الفانتازيا كان فيها بلوتوث الباسات فيها تجهيز وزراير الهاتف موجودة والسوفت موجودة ولكن الـ module مش راكب وبيتباع في التوكيل بـ 2600 جنيه.
- الـ Day running light والـ Cornering light مش عارف أشغلهم إزاي وناس قلولي لازم زيارة للتوكيل عشان يفتحوهم من السوفت وير بتاع العربية.
- صوت حزام الأمان السخيف اللي مش بيسكت إلا لما تربط الحزام.
- الفانتازيا كانت أعلي من الباسات في المطبات العالية المتخلفة بتاعة الأهالي.

بس خلاص..تعليقاتكم الجميلة بقا وتحت أمر الجميع في أي إستفسار إن شاء الله :)