تجربتى مع تغيير المساعدين الخلفين لعربيتى الكليو 2003
السلام عليكم يا احلى رجالة .. رجالة رينو :)
انا عربيتى كليو 2003 1200 سى سى
لاحظت انى فى المطبات بسمع خبطة ورا من الناحية اليمين .. مخبيش عليكم عرفت انها من المساعدين ومحتاجين يتعيروا .. بس طنشت
لحد ما حسيت ان الموضوع بقى مزعج ومش حابب اسوق العربية خالص
المهم كنت عند المهندس فى جسر السويس فقلت اسال بالمرة على المساعدين الخلفى لاقيته بيقولى عندى ال KYB اليابانى الاصلى مش يابانى مضروب زيت على غاز وعاملين 450 جنيه ..
وفعلا مكتوب عليهم انهم صناعة يابانى
لاقيت سعرهم مناسب توكلت على الله روحت مشتريهم
فكيت القدام لاقيت واحد جيد وليس كويس .. والتانى لاقيته ضايع والاتنين ضاربين زيت
ركبت الجداد والحمد لله الموضوع كان فى منتهى السهولة .. وبس
طلعت بالعربية ويا ريتنى ما جربتها ههههههههه
اولا العربية بتتنطط من ورا جامد زى الهيونداى الاكسل كدة بس بنشوفية اكنى مركب عفشة رياضية بس على سوست عالية :untitled 1:
ضغط الكاوتش انا بظبط على 32 ورا وقدام
يمكن الكاوتش هو السبب مع العلم ان التعليمات على الباب بتقول بدون حمل الضغط المفروض قدام 29 وورا 26
على العموم هجرب واقولكم علشان محدش يتدبس ويركب مساعدين ورا زيت على غاز
وخصوصاً انى بعد ما بحثت فى الموضوع عرفت انه يفضل ان الزيت على الغاز يكون قدام .. وان ورا يكون زيت بس علشان انعم .. مع العلم ان الزيت على الغاز ورا اكثر فى التحمل وفى الثبات وكدة
ان شاء الله اجرب واقولكم
وان شاء الله انقللكم قريب جداً تجربتى فى تنظيف بوابة الثروتل والمشاكل اللى حصلتلى واتحلت ازاى :16: .. اسف على الاطالة
