مشكلة غريبة فى السيارة اثناء السفر ..

الاخوه الزملاء
تحية طيبة وبعد
حدث معى موقف غريب اثناء سفرى حوالى 400 كيلو
الموضوع كالتالى
اولا امتلك سيارة لانوس 1 موديل 2000 قمت بتفويلها بنزين 80 قبل ان ابدء السفر وقمت بغسيل السيارة لدى احدى المغسلات قبل السفر ب ساعتين ..

المهم بدئت السفر وانتهى تقريبا نصف تانك السيارة . واثناء تحركى فى احد المطالع صدمت قطعة حجر بظهر السياره وحسيت ان الظربة جات فى الشكمان من الخلف . المهم مشيت بالسياره عادى ومع الوقت بدئ يحصل معايا شيئ غريب جدا . ادوس بنزين السياره متخدش سرعه خااااالص مهما ادوس بنزين مبتسحبش خااالص ولو سحبت تسحب بالراحة تماما تقريبا على سرعة 20 ولما سرعه قوى وصلت ل 50 بالعافية . المهم العربية كانت بتجيب سرعه معايا بس لما اضغط بنزين وارفع رجلى تانى من على البنزين وادوس مره تانيه وهكذا باستمرار غير كده العربية تقف وتبقى بطيئة جدا ..

وملاحظة مهمه: كنت لما ادوس بنزين باستمرار على الدواسة وارفع وادوس تانى وهكذا 30 او 40 مره باستمرار علشان العربية تجيب سرعه اسمع صوت فرقعه فى الماتور قدام .. وصوت زى التشحيط كده ..
مش عارف ايه السبب بتاع الموضوع ده حصل معايا فجاءه ..

وكمان فى ريحة دخان داخل الصالون كان شديد جدا .. واحتراق غير كامل للبنزين ..


جبت ميكانيكى على الطريق السريع وقالى ان السبب مشكله فى الرشاشات مش عارف الكلام ده حقيقى ولا ايه ؟
وحل الموضوع ايه ؟؟ علشان ميحصلش تانى

لما رجعت البيت وريحت العربية يوم كامل شغلتها تانى ومشيت مفيش اى مشاكل ... بس خايف اسافر بيها سفر طويل تانى يحصل معايا نفس الموضوع ده ..

اكشف علي الشكمان من اول الشجره لغايه الاخر عند ميكانيكي بيفهم او واحد بتاع شكمانات ثقه

متاابع باذن الله يدخل تانى حد من الزملاء برأى اخر يفيد برضوا
بالتوفيق

هى لو الخبطة كانت جامده ممكن توصل للشكمان اللى نازل من فرن الماتور

بس ده لو كانت جامده اوى بقى بس ان شاء الله خير

اكشف عليها عشان تكون نفسيا مستريح

المشكلة فى غسيل العربية
اكيد فيه مية جت على اماكن حساسات او كهربا او سلك بوجيهات عند الموتور بدليل ان العربية لما خدت مشوار طويل وسخنت ونشفت من الميه اشتغلت تمام
نصيحة ماتسافرش بالعربية بعد الغسيل مباشرة لازم العربية تنشف

مع إني مش فاهم إزاي حجر خبط في ضهر العربية وانت بتتحرك لقدام في مطلع
بس الاحسن تبص بصة علي تانك البنزين من تحت ممكن تكون الخبطة جت فيه اثرت علي عمل طرمبة البنزين

السلام عليكم ورحمة الله

الموضوع عندك بينقسم لتلات حاجات :
1- غسيل العربيه ودا محتاج عنايه وواحد يكون على دراية باستعمال المسدس وخصوصا عند الموتور سواء من تحت او من فوق لان الحساسات او الموبينه او الكمبيوتر لو وصله ميه لازم تركن العربيه فى الشمس لمدة يوم كامل وطبعا يفضل عدم غسيل الموتور الا للضروره لان فى عربيات ما ترضاش تدور بعد غسيل الموتور وتلاقى حصله مشاكل كبيره
واقدر اقول لحضرتك ان دا سبب المشكله عندك هو الغسيل

2- بنزين 80 ودا مشاكله معروفه لو مغشوش او فيه شوائب فبيؤدى لتلف الطرمبه او تسقيفه للموتور ولكن مش سبب للمشاكل عندك

3- الضربه بتاعت الطوبه مش هتأثر على حاجه فى العربيه من تحت وخصوصا لو فى الجهة الخلفيه لان ما فيهاش غير التانك والشكمان والعفشه الخلفيه ودا ما كانش فيهم مشاكل ولله الحمد ولو افترضنا ان الشكمان اتكسر او وقع كله فى الارض مش هيعمل غير صوت عالى ومش هيحصل فرقعه ولا السحب هيقل ودا برضه مش سبب للمشكله ما تقلقش منه

4- واذا نويت السفر توكل على الله وارمى حمولك عليه وما تقلقش

والله أعلى وأعلم