اتلخبط تانى

**ahmed_moslem** · 12-07-2007 01:31 AM

السلام عليكم ورحمة الله وبركاته.
بعد تفكير وبحث وبفضل الله ثم فضلكم استقريت على ان الواجا افضل عربية فى مصر من حيث الامكانيات بالنسبة لتمنها وتلك الميزة جعلتنى افكر فيها ولو بالتقسيط حيث انها اعلى من امكانياتى.
لكن ال Honda City نزلت و قلبتلى دماغى تانى وحاسس ان فيها نفس الميزة أضف الى دلك انها يابانى (حتى لو متجمعة فى تايلاند) مع العلم ان أحد اسباب حبى للواجا انها ماليزى من دولة اسلامية.
و بصراحة ولأنى حاسس اننا بقينا عائلة واحدة :P انا هاقول ليكو على امكانيياتى المادية بالتقريب طالبا منكم نصيحة بوجه عام
انا دلوقتى معايا فى حدود 25 الف (ثمن تقريبى لعربيتى ال128 ال1300 موديل 1989 مريحانى جدا لان حالتها جيدة جدا ....) وعلى شهر 1 أو 2 الجايين بالكتير هاقدر اجمع فى حدود 30 الف كمان يعنى المجموع حوالى 45 الف و هاقدر بفضل الله ادفع قسط يوصل ل 2000 جنيه فى الشهر يعنى ان شاء الله ممكن اخلص القسط على سنتين.
اضف الى ذلك انى لو صبرت لشهر 6 أو 7 السنة القادمة سأستطيع باذن الله تدبير حوالى 20 الف كمان يعنى الكاش اللى هايكون معايا (بالكتير) 65 الف.
انا دلوقتى عاوزكو تحطوا نفسكم مكانى
واحد أول مرة يسوق فى حياته من 3 - 4 شهور و دى امكانياته المادية ايه احسن وقت يفكر فى الزيرو (دلوقتى ولا شهر واحد الجاى ولا شهر 6 ولا لما اجمع التمن كاش)
أرجو اسداء نصيحة لاخ صغير شوية فى السن (26 سنة) هل انا مستعجل فى موضوع الزيرو ولو لم اكن مستعجل يبقى جاوبونى على السؤال الاول :lol: الواجا ولا السيتى

ولا تنسوا ان تدعوا لى بالهداية لان موضوع العربيات ده أكل دماغى على الاخر.

**معاذ الشرباصى** · 12-07-2007 02:41 AM

القسط من كاش مش هتفرق كتير, خاصة لو هتقسط على سنتين, يعنى الفايدة مش هتبقى كبيرة

اما لو تجيب زيرو من مستعمل

دى حسب سواقتك, لو انت شايف انك بقيت متمرس, او سواقتك اتحسنت و بدأت تعمل حاجات لا تلقائية, كانت زمان بتاخد منك تفكير (يعنى تبص فى المرايات بسلاسة, رجلك الاتنين شغالين حلو و ايدك متعودة على النقل) يبقى هات زيرو

لو شايف انك محتاج وقت, خد وقتك خالص, لأن الخدش فى الزيرو بينكد على الواحد جامد جدا
و الوقت بيعدى بسرعة و الله, يعنى السنة بتعدى و لا كأنها شهر

--------------------------------------

اما بالنسبة للواجا او السيتى, انا افضل الواجا

الصاج افوى, الموتور 1600, ثبات ممتاز, قطع غيار ارخص.

**memo_hefnawy** · 12-07-2007 08:10 AM

أنا مع معاذ فى كلامه بس أحب أضيف أن الإنتظار أفضل خصوصا قدام معاك عربية مريحاك و الحمد لله مش بتعمل مشاكل يبقى إستنه حتى لشهر 6 هايكون معاك فلوس كويسه حتى لو إتبقى 20 ألف تقسيط سهله ده + إن موديلات كثير هاتتغير و إنت عربيتك مماشياك

**aboalm** · 12-07-2007 10:52 PM

بصراحة كلام محمود خلى مافيش كلام تانى يقال دى نفس الفكرة اللى كنت عايز اقولها لك
وربنا يوفقك

**محمد ابراهيم 1** · 13-07-2007 10:59 AM

واجا بدون تردد

**Ahmed Hassan** · 13-07-2007 03:54 PM

استنى لما تجمع فلوس اكتر و تتقن السواقه اكتر و بدل عربيتك الحمد لله مريحاك يبقى مفيش مشاكل.

بأذن الله ارشحلك الواجا

**Karim_Monir** · 13-07-2007 04:44 PM

الواجا وهيا جاية من ورايا وانا شايق بحس فيها جزء من مرسيدس وجزء من الفا روميو
بس يعيبها اعادة البيع

**ahmed_moslem** · 14-07-2007 11:57 PM

جزاكم الله خيرا ونفع الله بكم ورزقكم الفردوس الاعلى.

قال رسول الله صلى الله عليه وسلم
المسلم أخو المسلم ، لا يظلمه ، ولا يسلمه ؛ من كان في حاجة أخيه فإن الله في حاجته ، ومن فرج عن مسلم كربة فرج الله عنه بها كربة من كرب يوم القيامة ، ومن ستر مسلما ستره الله يوم القيامة
الراوي: عبدالله بن عمر - خلاصة الدرجة: صحيح - المحدث: الألباني - المصدر: صحيح أبي داود - الصفحة أو الرقم: 4893

وقال عليه الصلاة والسلام
من يكن في حاجة أخيه ؛ يكن الله في حاجته
الراوي: جابر بن عبدالله - خلاصة الدرجة: صحيح بمجموع طرقه - المحدث: الألباني - المصدر: السلسلة الصحيحة - الصفحة أو الرقم: 2362

**abo3bdolrahman** · 15-07-2007 04:37 PM

أصبر لحد ما تجمع تمنها ما دام معاك عربية مريحاك و أفضل لك عدم التقسيط حتى تبعد عن الشبهات و أنا جربت التقسيط قبل كده و استسهلت فى الفتوى و لم أجد أى بركة و كمان فى الآخر بعت العربية و خسرت فيها أكثر من 40 % من تمنها و كانت لسه جديدة نوفى.
ربنا يوسع عليك و ييسرلك و تجيبها كاش إن شاء الله.