تقرير حصرى بالصور تركيب تكييف لسوزوكى سويفت (متجدد)

السلام عليكم ورحمه الله وبركاته

قرب يدخل علينا الصيف ويهل علينا بنفحاته الحاره وصعب أوى الصبر على الحر بدون تكييف السياره قولت لازم أركب التكييف قبل دخول الصيف
لسه جاى من بورسعيد بعد شراء تكييف كامل للسويفت وتم الفك من نصف كامل من سياره 1600 cc
سربرتينه خارجيه وفلتر وكومبروسر بقاعدته وسيره ومواسير التكييف والثلاجه الداخليه والمروحه والموزع وبداخله سربنتينه الماء الدافىء وواجهه التكييف فى التابلوه بكل وايراته وكذا كل السلوك والفيش المتعلقه بالتكييف والكتاوت وكمان مساميره كلها والكنترول بتاعه وكل ما يتعلق به
وبسم الله ما شاء الله
النص المفكوك منه التكييف كأنه لسه خارج من مصنعه
هما الأجانب دول مش بيستخدموا حاجه خالص

ما علينا
أشتريته بعد فصال وتعب الفك ب 2600 جنيه

والحمد لله فكيته أنا بنفسى بالمسمار وأن شاء الله هركبه بنفسى عدا وصلات الكهرباء سألجأ فيها للكهربائى
أنتظرونى بالجديد بكره
دمتم فى رعايه الله
وفضله

ألف مبروك يا وائل باشا .. أنا كنت هعمل الموضوع ده قبل كده بس اكتشفت ان التكييف مفكوك من نص الدركسيون بتاعه يمين فرجعته .. و أنا أصلا كانت عربيتي فيها تكييف بس كان راكب .. و أنا كنت عاوز نضافه أركب واحد أصلي.

بالتوفيق ان شاء الله.

الف مبروك وفى انتظار الباقى ..

اقتباس:

---

المشاركة الأصلية كتبت بواسطة kar!m

ألف مبروك يا وائل باشا .. أنا كنت هعمل الموضوع ده قبل كده بس اكتشفت ان التكييف مفكوك من نص الدركسيون بتاعه يمين فرجعته .. و أنا أصلا كانت عربيتي فيها تكييف بس كان راكب .. و أنا كنت عاوز نضافه أركب واحد أصلي.

بالتوفيق ان شاء الله.

---

الله يبارك فيك يأستاذ كريم
وكرمك فاكره ومش ناسيه
وده ألى حصل فعلا وهتفهمنى بعد كده

اقتباس:

---

المشاركة الأصلية كتبت بواسطة j a g u a r

الف مبروك وفى انتظار الباقى ..

---

الله يبارك فيك وعذا على الأنتظار طويلا

السلام عليكم
أسف جدا على الغياب وده لظروف كتيير منها قطع النت عنى ( شركه غبيه )
ما علينا خلينا فى موضعنا
الحكايه بدأت بانى روحت سألت ودورت كتيير على التكييف
من دمياط للمنصوره لبورسعيد وكل يغنى على ليلاه ألى عنده قطع ويؤالى كده أوفر طب أجمعهولك طب خد التلاجه والسربنتينه من عندى وكمل من مكان تانى طب هو مينفعش اصل العربيه 1300
مسألتش فى حد كل ألى فى دماغى أفكه من على نص وبمزاجى وانا ألى أفكه كمان (طماع أنا )
وأخيرا لقيت نص كابورليه فى بورسعيد مكنه 1600 يميين وكنت خلاص هفك منه بس ربنا الهمنى وأترددت أفكه ورجعت دمياط سألت كتيير وطلع أنى كنت هاكل مقلب متين لولا ستر ربنا


العربيه اليمين


http://nileup.com/up/uploads/nilemotors_13944766851.jpg


http://nileup.com/up/uploads/nilemotors_13944766852.jpg

ورجعت أدور من تانى على نص مكييف شمال أفكه بأيدى طلعت على المنصوره وهاتك يافتى من التجار
كبر مخك بيع وريح دماغك وخد تلاجه وكمل من بره وأشترى مواسير جديده وكلام فارغ
رجعت أدور فى بورسعييد وأخيرا جانى المراد
نص 1600 شمال على أبوه
والله العظييم النص ده كانه لسه خارج من مصنعه أنا بفك المسامير وعليها بوهيه بلادها ومتبرشمه وتسمع طقه فك المسمار بتاع مصنعه
بصييت فى عدادها لقيتها عامله 33 ألف كيلو بس
لو كان معايا فلوس كفايه كنت أشتلت النص كله
موتور 1600 كاربراتيير قيل عنه نصف أنجيكشن مختلف أختلاف كلى على الكاربراتير العادى
باور مكيفه الدبرياج بتاعها مش على واير على زيت مرايات كهرباه زجاج أبواب كهرباء
كل ما تتمناه فيها
لغايه حساس السرعه وكمان تاره بتتحرك لأعلى ولأسفل
وعزرا مقدرتش أصورها كان كل همى الفك
أبتديت أفك السربنتينه وألى أفكه أحت معاه مساميره فى كيسه صغيره وأربطه بيه
وبعديه الكومبروسر وقاعدته وكانت القاعده مشتركه معاها فى الباور طبعا فكيت الكومبروسر بالقاعده وفكييت منها طرمبه الباور وخدت كمان السير
وبعديها فكييت كل المواسير بجلبها ومساميرها
وفكييت كل ضفيره الكهرباه لغايه الحساس بتاع الحراره والكتاوت وصولا لعلبه الفيوزات
ودخلت جوه النص فكييت التابلوه وأبتدييت أخرج الموزع وبداخله سربنتيينه المياه الدافئه ومعاها جلبها
وبعديها فكييت التلاجه والمروحه وفكييت كل الفيش والكونترول وكل المسامير كما زكرت فى أكياس صغيره مربوطه فى متعلقاتها
وكمان فكييت مواسيير الهوزاء من التابلوه
وكده كله تمام

________________________________________________

روحت
وخدت رست يوم الأثنيين وأبتدييت شغل يوم الثلاثاء فى الجراج
رفعت الجمب اليميين وفكيين الفرده ونمت تحت العربييه وحاولت أركب القاعده مكانها مش نافعه يادى الحوسه ركزت شويه وأبتدييت أفتكر فكيتها أزاى والحمد لله ركبت وغسلتها كويس بالبنزين وشحمت الشداد وبعدين ركبت الكوبروسر عليها وجيت أركب السير منفعش طويل أشتريت واحد تانى ألمانى الصنع ب 30 جنيه وركب

بعديها ركبت السربنتينه الخارجيه وعلقت كل المواسير مكانها عدا ربطها بالأجزاء الداخليه

أبتدييت أفك التابلوه وبصراحه قرفنى أخر قرف الله يسامحه الكهربائي ألى ركب السنتر والزجاج الكهرباء ووحده الرفع عاملى شبكه كهرباء تحت التابلوه
أبتديت أفكه ونضفت الزباله بتاعت الكهربائى وظبت الضفيره بالكامل بالشكرتون وكله بقى تمام
وفكييت الموزع القدييم والمروحه القديمه

وبكل أمانه العازل القديم جميل جدا لا يستحق الزياده عليه
لكن كان فى بعض المنطق مهترئه زودتها عازل وحطييت شحم على فواضل السياره وأماكن قد تنشىء بها البارومه

مديت أيدى فوق فتحه المروحه ألى هى موجوده تحت الهوايات تحت الزجاج الأمامى لقييت بلاوى
طييين بالهبل ومبلط مكانه
نظفت على قد مقدرت لأنها مكان مزنوق قوى بالميه والمكنسه ونضقته شويه

وأبتدييت أجمع الموزع أولا ثم الثلاجه ثم المروحه

ودى النتيجه

http://nileup.com/up/uploads/nilemotors_13944766863.jpg


http://nileup.com/up/uploads/nilemotors_13944766864.jpg


http://nileup.com/up/uploads/nilemotors_13944766865.jpg


http://nileup.com/up/uploads/nilemotors_13944766866.jpg


كل الشغل ده خد منى يوميين شغل من الساعه التاسعه صباحا حتى صلاه العشاه
بعديها غيرت ونضفت مواسيير الهواء داخل التابلوه
وروحت للكهربائى
أشترييت علبتيين فريون 12 الواحده 400 جرام سعر الواحده 40 جنييه

وفى الأول شيك على المواسيير بأستحداه ضغط الهواء من موتور ثلاجه قدييم والمياه والصابون

وبعديين سحب الهواء وشحن فريوون وبعديين ركب الأجزاء والتوصييلات الكهربائييه

وعلايه التكييف بتركب مع الكاربراتيير ودى بترفع الماتور أثناء تشغييل التكييف

ووصل وشغل ياعم أحلى شويه هواء بارديين ونقى وركب ياعم كل حاجه كما كانت

أفوجىء التكييف مبيفصلش والكهربائى بيؤالى الكنترول فيه حاجه لازم يتغيير

طيب والحل قالى هنجييت ترموستات بتاع عربييه نقل شبه ثرموستات الثلاجه ونحاول نركبه

حسييت أنه بينصب عليه والغريب أنه بيؤالى أن الثرموستات ده ب 100 جنيه

طب ليه ياعم أصله حلال للكمشاكل ألى زى دى وقلييل وجوده

طب ركبه بس لحد منغير الكنترول برغم أنى حاسس أنه بيشتغلنى وأنه حاجه من أتنيين ياما عايز يكما النصبايه وأما مش عارف يشغل الكنترول

ما علينا ركب وقفل ياسيدى لغايه ما نجييب كنترول تانى ونجرب

--------------------------------------
------------
------------------------------

التجربه والتفيييم

على السلانسيه تبريد ضعييف يكاد تنسييم خفييف فى عز الظهر بعد وقوف السياره فى الشمس ضعييف مع الجرى يبتدى يبرد وتسقع منه
بلييل تمام

التقييم
متوسط ألى معقوول
مستنى أرائكم ومشاركتكم فى تطويير أداء التكييف

عذرا على نقص الصور وأسف على التأخيير
وأعدكم ببعض الصور الأاضافيه للأجزاء الخارجيه وبكل ما هو جديد
اسف على الأطاله

مبروووك

تسلم ايدك والله

ألف مبروك و الموضوع هايل و أحلى حاجه انك عملته بإيدك .. بس ايه سبب ضعف التكييف ده؟
قيس كبس الكمبروسر و خلي بتاع التكييف يشوف الزيت بتاعه و خلي بالك انه بقاله فترة كبيرة مركون.

السؤال.. هل الكباس كان فريون ١٢ ، ده مكتوب على الورق بتاعه...
حتة الترموستات ده له كذا سكة
اولا فيه حاجة في الاكسبانشن بتاع التلاجة وفيه واحد تاني على مواسير الفريون وده بيبقى حساس ضغط وفيه حساس راكب لحرارة المية في الكوعه

ياترى انت شحنت فريون ١٢بالاسم وللا بديل ١٢ ومكتوب عالعلبة ٤٠٦؟؟؟ وصناعته ايه؟؟ هو على حد علمي انك لازم تعمل فاكيوم كويس للمواسير وبياخد في حدود نص كيلو

انصحك انك تعمل كتاوت لقط ما بين كلتش الكومبريسور وكتاوت تشغيل مروحة الردياتير. هيفرق كتير جدا معاك