الموضوع: تقرير مقابله جاردينيا 21/2/2014 خاص بالمشاركات الخارجه عن اطار الموضوع

السلام عليكم و رحمة الله و بركاته
مبدئيا مش جاي اتكلم عشان اعمل فيها حكم مثلا ولا اي شيء مما شابه

مجرد رأي و محاولة لتوضيح وجهات النظر بين الاطراف كمقدمة للصلح , بخصوص المشاركات اللي قريتها دلوقت حالا في الموضوع ده , و حديثي هايقتصر على اول 3 مشاركات تحديدا لأن ما بعدهم هو باختصار تصاعد الموقف الناتج عن سوء التفاهم
و معلش استحملوني بقى انتوا عارفين انا رغاي شويتين :))))

اللي حصل باختصار بين الاستاذ صدام و الاستاذة سما هو سوء تفاهم ناتج عن اختلاف رؤية المنتدى بين الطرفين

1- استاذة سما لها رؤية لطبيعة المنتدى اظنها متفقة تماما مع كامل ادارة المنتدى على اساس التنسيق المستمر ما بينهم
و استاذ صدام له رؤية مختلفة شوية فيما يبدو عن رؤية ادارة المنتدى

2- استاذ صدام للأسف فاته ملاحظة اختلاف رؤيته المايلة للجانب الاحترافي بنسبة كبيرة فيما يبدو لي كعادته اللي كلنا نعرفها , و الميل ده مش عيب , عن رؤية الادارة اللي فيها اكتر الجانب الاجتماعي و التشاركي اكتر من الجانب الاحترافي , و برده ده مش عيب

3- استاذة سما ردت من واقع مهمتها كمديرة للمنتدى , لكن استاذ صدام ما يعرفش ده بالظبط او رؤيته مختلفة

4- للأسف فات استاذة سما نقطة اختلاف الرؤية دي فتجاوبت معاه من خلال رؤية الادارة من غير ما تلاحظ نقطة اختلاف الرؤية و ده اصاب الاستاذ صدام بالاحباط لأن الرد كان على خلاف ما توقعه تماما , هو فسر ده بإن دورها في المنتدى كإدارة و ربما كاجتماعيات و تنظيم للمشاركة و لكن مش كسيارات , و بالتالي فاقتراحاته مش موجهة لاستاذة سما و لكن للمسئولة عن مسئول ما يخص السيارات في المنتدى و طبعا ما يعرفش غير كري

5- و ده كان فحوى حديثه بخصوص ان مشاركتها في ادارة المنتدى ادارية مش فنية لكن خانه التوفيق في توضيح ده مما بدا كاستهانة بالاستاذة سما و ده طبعا اغضبها باعتباره اهانة شخصية اضيفت الى انتقاداته لبعض النقط في المنتدى اظنها اخدتها بحساسية شوية نتيجة لتكرار نفس الشيء اكتر من مرة من اكتر من عضو قبل كده و لتناقض ده مع الجهد اللي الادارة بتبذله لكن طبعا احنا كأعضاء ما نعرفش عنه حاجة و بنتكلم و ايدينا في المياه الباردة , و ده كلام سليم جدا , .. و ده دفعها للرد بحدة ........ و تصاعد الموقف للأسف الشديد

5- استاذ صدام فاته ان مشاركته جت في مود مختلف تماما عن مود الموضوع , الموضوع اجتماعي صرف , و مشاركته احترافية صرفة , فعلا موضوعة في غير محلها , و ان كانت مش جريمة , سوء تقدير بس


اختم كلامي ببعض النصائح لادارة المنتدى

1- اتمنى تحاولوا تفيدوا المنتدى من خلال الخبرات اللي زي استاذ صدام كمثال معانا و من كل الاعضاء المماثلين , حتى لو استدعى الامر تخصيص منسق او فريق لنقطة تنظيم الاقتراحات و بحثها بجدية و انتم ادرى طبعا بالكيفية من واحد على قده زي حالاتي :) , لو بين كل 30 فكرة غير مفيدة جت فكرة واحدة مطرقعة فاستفادة المنتدى هاتبقى كبيرة جدا , و بالتالي طبعا الاعضاء وبالتالي نشاط محبي السيارات في مصر بشكل عام

2- اتمنى تخصيص احد اعضاء الادارة للقيام بمهمة المتحدث الرسمي للمنتدى (كمهمته الاساسية) , من ناحية الاستفادة بالتخصص , و اكيد اللي بيعمل حاجة هي مشاركته الاساسية مش زي اللي بيعمل حاجة عنده جنبها 10 حاجات منهم 5 ولا 6 اهم منها , و من ناحية رفع العبء ده عن كاهل استاذة سما و باقي اعضاء الادارة و تفريغهم لمهامهم الاساسية في الادارة

3- اتمنى تحاولوا تتخطوا سوء التفاهم ده و محاولة تفادي اي سوء تفاهم في المستقبل بأي شكل حرصا على الكيان الجميل اللي اسمه نايل موتورز القائم على الاجتماعيات في الحقيقة :)

نصيحتين لأستاذ صدام

1- ما عهدناك تفقد اعصابك , و اظن ان السبب هو حماسك الكبير لأفكارك و طبعا الاحباط اللي حصل لك , اتمنى تظل زي ما عهدناك , دايما قدوة ليا انا على الاقل في نقطة زي دي يا ريت ما تفقدهاش

2- يا ريت تصبر على مسئلة تعديل - او تطوير حسبما يترائى لك - العقلية عن الاطراف الاخرى , الموضوع مش سهل صدقني , و لو حاولت تصيغ رؤيتك و افكارك في شكل مشاريع كاملة و تطرحها على الادارة يبقى افضل , و لو الادارة ما تجاوبتش معاك في امكانك طرحها على الاعضاء و اكيد ان شاء الله هتلاقي اللي يتحمس معاك لكل فكرة , و في حال حدوث تقدم في الفكرة اكيد هاتجذب نظر الادارة ساعتها بصفتها مشروع ناجح , اتمنى في يوم من الايام اشوفك متبني حاجة زي كده :)

اتمنى ماحدش يتخيل اني منحاز لطرف على حساب طرف , الحمد لله لا ليا مصلحة عند الادارة ولا عند استاذ صدام , ولا ليا عداء مع اي منهم برده , في النهاية ما عنيت الا بمحاولة لتوضيح وجهات نظر الطرفين لبعضهم زي ما انا شايفها و لا اتمنى الا الخير للمنتدى و ادارته

و اقعدوا بعافية جميعا :)