تقرير مقابله جاردينيا 21/2/2014 خاص بالمشاركات الخارجه عن اطار الموضوع
صديقي المواطن
أنا سعيد من أجلك
ولكن قولا واحدا هو ده اللي بيخوفني ويزعلني ويخليني متردد لحضور جلسات المنتدى العزيز على قلبي كمية اﻹعتذارات واﻹنشغالات وأنا باخد اﻷمور بطريقة شخصية يعني منتدانا ضخم وكبير وأنا بموت في اللمه وأخاف أحضر مقابله تحس إنك حتقابل من 130 إلى 170 شخص وفي اﻵخر تروح وتتصدم وتلاقي العدد يتراوح من 7 إلى 18 واحد وبكده الواحد ممكن نفسيته تتعب يكبروها في دماغك ولازم تروح وتعال بس وإحنه مستنيينك وتروح متلاقيش جماهير عريضة تضيع وسطيهم وتكلم ده وتشاغل ده وتضحك مع ده وتنصب على ده وواحد تاني ينصب علينه ونبص على عربيات بعض ونشوف الدنيا واصلة فين ونشوف مشاكل اﻷعضاء الشخصية ونحاول ننحشر بيها بإعتبارنا بنعتبر نفسنا شبه عيلة واحدة
أنا بصراحة يا حضرة المواطن المؤسس كريم منير بفكر أعمل ثورة في المنتدى أو نجيب تمرد تعمل شغل ونعمل مظاهرات وإضرابات فئوية ونحدث شكل المنتدى ونخصص 30% من عائد اﻹعلانات لتعيين كهربائي وميكانيكي بمرتبات شغلتهم إغاثة الملهوف على المنتدى والرد عليه كما والمقابلات لازم نلاقيلها حل نضمن حضور مشرف ونضمن أن يتم تقديم المأكولات والمشروبات مجانا حتى لو أنا وإنت نتحمل مصاريف اﻷكل والشرب يعني مثلا لو تكلف 10 آلاف حتدفع إنت 9900 وأنا جدعنه مني حدفع 100 جنيه يللا خلي الناس تاكل إنشا الله محدش حوش ثم عايزين نغير بقه ألوان المنتدى وتكلم الناس النايمة في قسم التقني يشوفوا شغلهم
زي هناك باب في مصادر التشريع اﻹسلامي إسمه باب سد الذرائع
يعني كل شوية عضو يغلط ويكتب باﻷحمر وحد مشرف مش فاضيلنا يخش يقول له معلش اﻷحمر بتاع اﻹدارة متكتبش بيه تاني يرجع طب متلغي اﻷحمر من بليتة الألوان وتريح الشعب
وكمان معظمنا بيخش من الموبايلات دلوأتي وأنا ملاحظ إن خانة العربية بتاعت العضو مش بتظهر في موبايلاتنا فوجه تعليماتك للقسم التقني بضرورة حل الموضوع خلال ال 48 ساعة القادمة
وشوف النواقص وكملها
أو تعاقد مع شركة تطوير تطورلنا المحتوى وإعملولنا مسابقات نلم بيها زباين للمنتدى إنت ليه محسسنا إنك خلاص زهقت من المنتدى ومعادش فيه جديد إنت تقدمه ليه ولا هو يقدمه ليك وراحت زهوته وحبك ليه مش زي أول أيام عملته فيها وليه سايبه علينا وكام عضو هم اللي شايلين مواضيع المنتدى على دماغهم لوحدهم حبا في المنتدى خد بالك الناس لا بد ييجي يوم وتزهق ومتستناش إن حد يجيب أفكار لازم تلاقي حد يطلع أفكار تطويرية يعني كنت لسه مثلا بفكر نعمل مسابقة في المنتدى للمعدلين في المنتدى بمعنى كل واحد يشتري عربية تعبانة ويشد ويعدل فيها لمدة سنة ويتعمل موضوع عن كل عربية لمراحل العمل وتطلع العربيات في لقاء ينضمه المنتدى جماهيري والتصويت من اﻷخوة اﻷعضاء داخل المنتدى إجباري مع الدخول وأيضا تتعرض على الجمهور زي مثلا في دريم لاند أو حديقة اﻷزهر وتقوم إدارة المنتدى من ريع اﻹعلانات بشراء سيارة الخاسر وإهدائها للفائز لو صفصفت التصفيات على عربيتين فقط أو تكون الجايزه للفائز الأول عربيتك البي إم دبليو رغم إنها من الفئة الثالثة ومش مقام الفايزين بس عشان إنت ركبتها حنظطر نقبلها منك آه بس لو مبتحلفش صدقني يا مواطن لو فضلت ورايه حبيعك حتى البيت
مقصد كلامي يا حضرة المواطن المؤسس كريم دي تاني مرة أطلب منك تهتم أكتر بشغلك وبالناس والمرة الأولى وعدتني خير ولم تتحرك قيد أنملة والمرة دي أرجو تهتم وتتحرك قيد أنملتين مش أنملة وحده
وإن لم تنصاع وترتدع وترتجع عما أنت فيه وتلبي رغبات الجماهير فو رب الكعبة لكون منظم إضراب عن الشاي بالسكر والحلويات والبابا غنوج وماما أم علي على باب مكتبك لمدة نص ساعة بحالهم وإنت المسؤول لو جرالي أي مضاعفات خنفشارية تؤدي ﻹمساك في ضرب الكفته
اللهم قد بلغت اللهم فإشهد
ملحوظة صديقك من صدقك وليس صديقك من حطلك معلقتين سكر في الشاي بدلا من معلقة
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال