الموضوع: ايهما أفضل ولماذا؟ تويوتا كورولا 2013 اوتوماتيك زيرو ام ميتسوبيشي لانسر شارك اوتوماتي

من فيهم تستاهل يتدفع فيها؟
مين فيهم صفقة رابحة؟
مين فيهم معمرة أكتر وتستحمل جوه البلد وسفر تبقى عربية عائلة؟

المشاركة الأصلية كتبت بواسطة ahmedalaahosny

عايز الحق الاتنين شكلهم قديم وخاصة الكورولا يمكن الشارك عشان شكلها هجومي شوية فشكلها افضل من الكورولا بالنسبه للاعتمادية الياباني كله معروف باعتماديته العالية وخاصة الكورولا واللانسر ( بومه وشارك ) بالنسبه للمواتير الاطول عمر بتهيالي مواتير ميتسوبيشي معروفه وبتنزل ف البي واي دي وشقيانة مع التاكسيات تحطلها 80 ماتقولش لا تمشيها غاز برده ماتقولش لا بس صراحة انا عمري ما شفت ان الكورولا افضل من لانسر نفس الموديل )اللهم الا الكورولا بتاعت 2007 لانها افضل في التسارع والعزم من البومة ال1300(... غير كده انا بشوف ان اللانسر والكورولا عربيتين متناقضتين بشكل واضح... عندك عربية موتورها صوته رياضي وعزمه حلو جدا والعربية نفسها شكلها رياضي وعفشتها رياضية وحتى ال air noiseفيها اعلى شوية )الشارك( وعربية تانية موتورها صوته هادي ومكتوم )شبه صوت الغسالة في رأيي( والعربية نفسها شكلها مش اسبور يعني وعفشة تورشن بيم عادية وعزل افضل )كورولا(....
فدي حاجة دي حاجة... انا عن نفسي افضل الشارك لو اغلب وقتك سفر جري على سرعات عالية والشارك في النقطة دي تبهدل الكورولا لان الكورولا اخف على الارض خصوصا بعد ال140... فشوف انت محتاج ايه واختار وبرده بص علي ال 301 الجديده تحفه بيجو وشايف الحجز عليها ماشاء الله لسنة اودام

اسف جدا حاجة off-topic
اتمنى على حضرتك التنويه عند الاقتباس المباشر من مشاركات اخرى لأعضاء اخرين...
ويا ريت تتقبل ده مني بسعة صدر...

أنا شهادتي هتكون مجروحة لأني أمتلك شارك وكمان مش من محبي كورولا قوي... بس هحاول اكون محايد قد ما اقدر:
العربيتين حلوين مبدئيا، وكل واحدة فيهم تتفوق على التانية في حاجات وتقل عنها في حاجات... وكل ده يرجع للمشتري وذوقه واولوياته...
لو فرضنا ان الكلام على الهاي لاين في الاتنين:
- الشارك شكلها احلى بكتير من برة... صالونها اوسع (خصوصا في الكنبة) وكراسيها اريح... الأبانوس مع تبطين الابواب الامامية بالجلد مع الأوكر النيكل مع الشاشة التتش سكرين بيخلوها اشيك من جوة عن الكورولا... الساوند سيستم رااااائع ويتفوق على اي حاجة تانية في الفئة دي، وان كان الكاسيت برضه في الكورولا صوته حلو قوي... بس المشكلة اللي كانت دايما بتضايقني في كورولا ان حتى اعلى فئة اوكر الابواب مش نيكل انما بلاستيك فقير جدا بيقشر بسرعة وبيخلي شكل العربية بايخ... وده كمان في الجزء الفضي اللي في الدركسيون، نفس القصة!!

- الكورولا موتورها صوته ناعم ويبعث على الهدوء، وبتنزل بكاوتش تورانزا بريدجستون ناعم وهادي جدا... وده بيدي احساس بان عزلها افضل من الشارك، رغم اني قريت في موضوع سابق هنا ان العربيتين واخدين نفس الدرجة بالديسيبل على سرعة 110... المهم، موتور الشارك صوته رياضي (مش مزعج) وبيبان مع القرص كمان ويخليك تتمنى لو كانت العربية 2000 سي سي مثلا!! يبقى هنا حسب شخصيتك وذوقك عايز هدوء ولا عايز احساس رياضي، والعربيتين مهيأتين لكده: الكورولا من برة وقورة اكتر فمحتاجة الموتور الاهدى والكاوتش الانعم والعزل الافضل... الشارك شكلها شرس جدا من برة فبيكمل الاحساس الرياضي ده موتور مايفيك بصوته المميز وكاوتش دنلوب خشن وصوته مسموع (انا مش حابه عموما) وهكذا... انما ما تقدرش تقول دي احسن ودي اوحش، في النهاية الاتنين فئة واحدة وبينافسوا بعض...

- صالون الشارك اوسع زي ما قلتلك بس شنطتها ضيقة (تقريبا 390 لتر) وطبعا اصغر من شنطة الكورولا...

- انتشار الكورولا واسم تويوتا بيديها افضلية في نظري عند اعادة البيع فقط لأن الشارك اسعار قطع غيارها مش خزعبلية زي ما التجار منهم لله ما اشاعوا علشان يمشوا سوق البومة!!! فقطع الغيار متقاربة، وبعدين الشارك بطلت تنزل بفوانيس زينون afs اللي كان الواحد بـ6000 وعملت رعب للناس وخوفتهم من العربية... عدم انتشار الشارك ليس لعيب فيها بالعكس انا عمري ما صادفت حد بيتكلم عن مشكلة واحدة فيها من ساعة ما نزلت، وعربية اقسم بالله العظيم بتاعت بهدلة من الدرجة الاولى وعفشتها -خصوصا ورا- حاجة عبقرية ولو بصيت عليها هتنبهر...

فرق السعر عامل لازم يكون مهم... انا طول عمري كنت بشوف الكورولا أوفر برايسد بصراحة وده ايام ما كانت بـ167 والشارك بـ163 لأن وقتها الشارك بتعليقها بثباتها بأوبشنها كانت افضل منها بمراحل ورغم كده برضه الكورولا التجار عارفين انها هتبيع هتبيع فبيعلوا سعرها، مع ان العربيتين في الخليج واوروبا وامريكا وكل حتة في الكرة الارضية كان سعرهم واحد...
ما علينا... دلوقتي بسمع اسعار تخلف عقلي في كورولا 2013 وقريت ان بينطلب فيها 190 وحاجات كده!!! لو ده بجد يبقى الكلام خلص: شارك بالتلاتة واوفر الـ20 ألف دول واركب عربية متقلش ابدا عن الكورولا بل تزيد عنها في حاجات انا قلت بعضها...

اخر نقطة (واهم نقطة عندي واللي قررت الاختيار بسببها): الثبات...
الشارك تتفوق على الكورولا وانت مغمض، وده لا يحتمل الجدال بتاتا...
في نفس الوقت، ثبات الكورولا في الشكل ده افضل بفرق حلو عن الشكل اللي قبليه (2007 وما قبله)، يعني لحد 150 او 160 مثلا الدنيا تمام... بعد كده هتحس بفرق كبير لصالح الشارك... ناهيك عن الفرق الاستاندرد بين الملتي لينك والتوشن بيم خصوصا في مطبات الهوا ومفصلات الكباري والملفات... وكل ده في صالح الشارك طبعا...