تصدقوا لسه العربية من غير نمر

ناس كتير كانت متابعة معايا موضوع سرقة العربية عقب ثورة يناير وناس كانت متابعة بردو ان العربية اللحمد لله رجعت بعد سنة ونص من سرقتها والقصة بتاع حاميها حراميها وامناء الشرطة اللي كانوا بيتصلوا بينا في محاولات للابتزاز والخروج باي فلوس مننا عشان بس يقولي العربية ممسوكة فين .... كل ده قديم ما علينا من التفاصيل
الجديد بقى اننا بدأنا في اجراءات ترخيص العربية والنمر في شهر 10 لان رخصتها كانت هاتنتهي في 10
وكنا فاكرين الموضوع عايزله مشوارين تلاتة وتترخص وناخد نمر جديدة ويدقوا رقم اللشاسيه لان الحرامي كان كاشط جزء كبير من الرقم
من شهر 10 الى الان في اجراءات طبعا محدش فيه روح للمشاوير والطوابير ووكلنا محامي يقوم بالمهمة دي
ورق العربية قعد في المرور بتاعنا فيصل شهرين على الاقل وبعدين راح مرور رابعة قعد شهرين تاني وبعدين رجع على مرور بين السرايات بقاله يجي شهرين وكانوا عايزين ورق من المرور اللي اتسكت فيه في المنيا ولسسسسسسسسسه لغاية دلوقت الورق مخلصش من بين السرايات
وكل الخطوات والاجراءات دي بفلوس بتدفع عشان يمشوا الامور شوية
والمفروض لما ربنا يفرجها علينا والورق يروح فيصل وبعدين العربية بعدها تروح يدقلها ارقام وتعلق النمر والله اعلم عايزالها كام شهر تاني
المهم قبل مانبتدي في الاجراءات كنا بنتحرك بالعربية باوراق اللي تثبت انها كانت مسروقة لكن من ساعة ماسلمنا اوراقها للمرور وهي واقفة تحت البيت زي البيت الوقف من اكتوبر لحد دلوقت
حسبي الله ونعم الوكيل في دي بلد وده روتين اللي كأنه بيعاقبنا عشان عربيتنا اتسرقت

الأخت الفاضلة مدام / نور , عوداً حميداً , ونورتي المنتدى

أسأل الله العلي العظيم أن ييسر لحضرتك موضوع ترخيص السيارة وأن يجعل لكِ من كل هم فرجا ومن كل بلاء مخرجا يا رب العالمين

وصلّ اللهم وسلم على الحبيب محمد

شكرا شيخ خالد المنتدى منور بحضرتك

نورتي المنتدي يا نور عودا احمد
بس ازاي مفيش ورقة ولا تصريح ولا اي حاجة تمشوا بيها لحد ما يخلصوا اجراءاتهم
يعني مش كفاية اتسرقت سنة ونص كمان لما ترجع يوقفوا حالكم كده
لا حول ولا قوة الا بالله ان شاء الله الورق يخلص في اقرب وقت

الله يسلمك
لا وفوق كدة مرة خرجنا بيها قبلورقها ماي روح المرور اتسحبت رخصة القيادة وقعدنا شهرين مش عارفين نجيبها قال ايه مش لاقينها واول ما الفلوس ظهرت لقوا الرخصة
ومرة تاني جوزي خرج بيها مكنش معاه اي ورق ليها وكان يوم الاستفتاء وبيركن قدام لجنة ... امين شرطة من اللي قدام اللجنة وقفه وجوزي قاله كانت مسروقة واتصل بيا اجيب له صور من اوراقها .. ماشاء الله ظابط الجيش مشاه قبل الورق ما يوصل مع ان بيني وبينه 5 دقايق مشي لانه معتقد انه كان رايح الاستفتاء
يعني كان ممكن ميكونش صاحب العربية وسارقها

لا حول ولا قوة الا بالله
يعنى حتى اللى يلاقي عربيته بالصدفة البحتة يحطها قدامه يتفرج عليها
عشان في ناس مش عاوزة تعمل شغلها

أولا...حمدا لله على السلامه.....وبالنسبه للعربيه ..فخير ان شاء الله ودعواتى بالتوفيق

الحمد لله ان اعاد لكم سيارتكم بخير

و اللهم عوض صبركم خيرا

و بكل اسف هذا هو الحال و يا ليت حضرتك تعملي بحث علي النت عل وعسي يكون فيه جروب لمن استردو سياراتهم لكيفية التعامل في مثل هذه الامور او تغيير المحامي ( يمكن يكون مش خبره في مثل هذه الامور )

نصيحة بقى لازم تخفى العربية كويس بما انها بدون نمر و خاصة فى الموقع الجميل مساكن الضباط اللى كله امن ملوش لازمة ( صاحب تجربة سابقة )

اقتباس:

---

المشاركة الأصلية كتبت بواسطة م. حاتم السباعي

الحمد لله ان اعاد لكم سيارتكم بخير

و اللهم عوض صبركم خيرا

و بكل اسف هذا هو الحال و يا ليت حضرتك تعملي بحث علي النت عل وعسي يكون فيه جروب لمن استردو سياراتهم لكيفية التعامل في مثل هذه الامور او تغيير المحامي ( يمكن يكون مش خبره في مثل هذه الامور )

---

المحامي كويس وثقة لكن ده الروتين المصري بالاضافة ان مرور رابعة بيروح له كل العربيات المسروقة على مستوى الجمهورية فاكيد عليهم ضغط شغل
بالنسبة للجروبات انا مشتركة فيها ومتابعة وادمن كمان في جروب كبير ونشيط وياما اعضاء وجدوا عربيات اعضاء تانية في الجروب ده

اقتباس:

---

المشاركة الأصلية كتبت بواسطة m.adel kamel

نصيحة بقى لازم تخفى العربية كويس بما انها بدون نمر و خاصة فى الموقع الجميل مساكن الضباط اللى كله امن ملوش لازمة ( صاحب تجربة سابقة )

---

دي بقالها على الوضع ده اكتر من سنة وعلى فكرة انا مش مساكن الظباط :d