بصراحة : هل تعترف بالألقاب ... هل تنادي الناس باساميهم ولا بألقابهم ( يا استاذ ) !

http://www.el-balad.com/upload/photo...00x400/849.jpg
بصراحة بصراحة : هل تعترف بالالقاب !
وهل تنادي الناس باساميها ام بألقابهم !!

موضوع غريب بس انا بصراحة الموضوع ده بيشلني ... يعني تصور مثلاً يجيلك عيل صغير ويناديك باسمك كده حاف من غير استاذ او دكتور او حتى باشمهندس فلان ... ومنهم كمان الي يدي لنفسوا الحق إنوا يدلعك ... مرات بسئل نفسي هل هيا نظرة فوقية لهذا الشاب لاعتقاده. بانه افضل مننا ... ولا هو سايق الهبل على الشيطنة. ومش عارف ازاي يحترم الناس الي اكبر منوو .... ولا ده النتيجة الطبيعية انوا انسان مش متربي !!! أم بداية انهيار المجتمع !

http://www.mazen.com.sa/blog/wp-cont.../2010/04/5.png

الغريب والعجيب انو ممكن مش بس يدلعك لا ويجيلك. بعض الناس منهم الي يقولك كلمة (( حبيبي )) !! يا حبيبي ... قد تكون كلمة حبيبي كلمة حلوة ولكن هيا كلمة حق أراد من ورائها باطل ... فاما انك اهبل مبتعرفش تتكلم وعمال تقلها عمال على بطال ... او انك بتقلل وتصغر من شأن الانسان الي امامك ... !

https://encrypted-tbn3.gstatic.com/i...465UOhcXzZgyc1

طبعاً انا لا اتحدث عن الالقاب هنا في المنتدى.... يعني. مفيش حاجة اسمها مثلاً اكلم عضو واقولوا. واللهي يا دكتر كوكو. رداً على مشاركة الباشمهندسة توتو التي كانت تتحدث عن عربية الانسة سوسو ههههه ... لا لا. انا اقصد في الحياة العملية ... فين الألقاب !! راحت فين !!

هل انا محبكها ... هل بيفرق معاك. لمن حد يناديلك باسمك. او يناديك باسم الدلع. ولا انتا بتحب الناس تناديلك. بصفتك ولقبك دكتور قلي دكتور. استاذ قلي استاذ. مهندس قولي. باشمهندس. انا مش قاعد بلعب معاك كورة شراب في الحارة فازاي ترفع التكليف بينا ... هااااا. هل. بتفرق معاك الحكاية دي !!! ولا مش فارقة ؟

ولو بتفرق معاك تفسر بايه الناس الي بتتجاهل القاب الناس هل هما كده قلالات الادب ولا قلت خبرة ولا استهبال وتحقير للاخر !!! والتقليل من شئنه ؟ ولا هما مش واخدين بالهم. بالموضوع ده خالص ونهائي ؟

وكيف تتصرف لمن تلاقي واحد في نص الكلام وفي نص الاجتماع بيدلعك
هل هتشد معاه وتفركش الدنيا وتضيع على مؤسستك صفقه حلوة ... ولا هتاخود موقف وتقول لوسمحت ألزم حدودك ! ولا هتعمل نفسك مش واخد بالك !

هل بالفعل في حدود لكل انسان ... أم أن الانسان هو من يصنع هذه الحدود وكلنا ولاد تسعه وخلي البساط احمدي

@@@@@@@@@@@
وتحياتي

على المستوى العائلى والاصدقاء عادى جدا مفيش ادنى مشكله
لكن فى العمل بتفرق كتير وطبعا حتى لو المتحدث امامى اصغر منى بكثير فى السن لازم اتعامل معاه بلقبه
لكن لو حدث والموجود امامك تمادى ورافع التكليف.. بتعمد انى ارد عليه بلقبه دايما يعنى افهم ياغبى لو مفهمش عادى بقى مبدققش هو ظروفه كده بس بعتبرها قله احترام

معاك حق ياباشا
انتا فاكر الحلقة بتاعت مجدي الجلاد مع. ايمن نور. لمن اتخانقوا على الهواء بسبب هذا الموضوع

http://static.cairo-now.com/pic/2013...1365724055.jpg

عجبني ردت فعل مجدي الجلاد اول مره بلعها وتاني مره بلعها وتالت مره بلعها وبعد كده استلموا
لكن الي باستغربلوا ليه دكتر ايمن مدام عاوز الناس تناديه باللقب بتاعوا يا دكتور ايمن ... ليه ما بيعاملش الناس بمثل ما يحب ان يعامل ويقول. يا استاذ مجدي ...

[youtube]http://www.youtube.com/watch?v=UQbFS_ejrfU&sns=em[/youtube]
‫خناقة مجدى الجلاد وأيمن نور على لقب الدكتور والإستاذ‬‎ - YouTube

السؤال هنا. ... هل الدكتور ايمن مش واخد بالو من الحكاية دي وهو قاعد يقول ( مجدي مجدي مجدي !! ) وخد بالو لمن قالو ايمن من غير دكتور !!! أم الموضوع هو تسفيه واحتقار الاخر وكانوا بيقولوا انتا اقل مني علمياً علشان كده هنديك باسمك حااااف !!!

@@@@@@@

معظم الوقت بتكون تقليل من شان اللي قدامك مع قله ادب و عدم احترام
بالاخص لما يكون اصغر في السن كتير
يعني اقل مثال ان الواحد وهو صغير لما يكلم حد اكبر منه بيقوله ابيه مثلا ولا عمو
دلوقتي تلاقي عيل صغير لو الواحد كان اتجوز كنت خلفت اكبر منه و يتكلم بقله ادب
وشغل اديك في الجركن تركن و الكلام ده

ما هي التربيه بقيت اي كلام اليومين دول ولسه هنشوف اجيال اوسخ من اللي شايفنها

انا مع الناس اللى معرفهاش و الناس الاكبر منى فى السن بقلهم يا دكتور كذا او الاستاذ كذا ولكن مع اصحابي والناس اللى اصغر منى عادى جدا بدون اى تكلف

أنا بعتبرها حسب الموقف مش قاعدة عامة

احترام الناس مطلوب لكن بدون مبالغة ... بعض الناس بيقوا عايزينك استغفر الله العظيم تفرش السجادة وتسجدلهم

طيب هو الألقاااااب. بصفة عامة.
هل وجودها في المجتمع دليل على الرقي في المجتمع .... يعني فاكرين حتت لمن كنا بنقول ساعتك ومعاليك وأمرني يا فندم ... تحت امرك يا فندم ، حتى كلمة باشا. ... ضاعت هيبتها لمن. ناس من الطبقة المتوسطة يشوف ميكانيكي ويقلوا باشا. اربط الصامولة دي. باشا والنبي شوفلي السفون بيهرب ليه !!!

ولمن تقولوا انتا ازاي تقول لسباك. باشا. ؟. يكون الرد اصل لمن اقول للسباك ياباشا فيقوم هو. يرد عليا ويحترمني ويقلي يا دكتور مثلاً :). شايفين المنطق !

هل وجود. الالقاب في المجتمع ده دليل على الاحترام ولا عادي !!! ... وتحياتي

اللي معرفوش بناديه بلقبه
واللي اكبر مني بكتير حتى لو اعرفه هناديه بلقبه
ولو واحد اعرفه وواخدين عبعض قوي بس قدام ناس بديله لقبه عشان اكبره قدام الناس
ولو حد اعرفه وعارف ان مقامه كبير هديله مقامه ولقبه

اما عن نفسي فمش بتمسك بان حد يناديني بلقبي ومفهاش حاجه..
تحياتي

Sent from my Xperia Arc S using Forum Runner

طبعاً تفرق معايا في شغلي جداً
بتعامل مع كل الناس بالألقاب حتى السعاة ( كبير وصغير )
وعليه كل الناس لازم تتعامل معايا بلقبي إما مدام أو أستاذة
وبفرح أوي باللي يغلط ويقول لي يا آنسة هههههه
ولو حد أصغر منى طريقته إلغاء الألقاب بوضح له مباشرة بأني مدام / ..... يا أستاذ / فلان
وياريت ما تغلطش في أسمي تاني :dontudear:
أما بقى موضوع يا جميل ولا حبيبي ولا يا روح قلبي بتخنقني
بحس بجد أنها مجاملة رخمة وبلدي أوعلشان مصلحة معينة وفيه أشخاص مرتبطة بلسانهم ومن كتر ما أتقالت فقدت معنها الحلو ومصداقيتها لأنها لكل الناس في كل الأوقات . :Copy of rfds:

https://encrypted-tbn2.gstatic.com/i...WSV5ZBkPO5CKMq

https://lh4.googleusercontent.com/-t...32/Respect.jpg

طبعا لازم الالقاب خصوصا لو مفيش عشم بينا او سابق معرفه فكتير من الاوقات بتبدأحديثك رسميا مع احد الافراد وبعد مده "ممكن تكون قصيره" بتتعامل معاه كصديق فبتناديه باسمه او تحوره شويه "مش دلع" يعنى ابو حميد ابو خليل ابو هيثم دوحه وهكذا انما طالما العلاقه فى حدود الرسميات فبتلتزم بالالقاب وطبعا مستحيل مهما تطورت علاقتك براجل كبير فى السن حتى لو كان اقل اجتماعيا انى اناديه غير بلقبه او على الاقل يا حج فلان
اكتر حاجه بتجننى لما تتعامل مع انثى فتكون مش عارف تقولها يا مدام ولا يا انسه خصوصا لو مكانتش استاذه فبتطر انى اتكلم مباشره بدون ذكر الاسم ولو منتبهتش بعيد السؤال ودى من اكتر المواقف اللى بتخنق منها ههههههههههههه
واكتر كلمه بكرهها فى حياتى لما تبقى بتتكلم مع واحد وبتتكلم بشكل رسمى ولما تقوله حاجه متعجبهوش يقولك "نعم يا حبيبي" ببقى مش قادر امسك نفسي ولما حصلت قريب انهيت الحديث وبصيتله باحتقار وانهيت التعامل معاه ومشيت وقعد ينده عليا ولا عبرته لانى بحس فيها بإهانه فى الموقف اللى زى ده
بس اللى لاحظته ان فى القاب مرتبطه بشغلانات معينه واصحابها بيقدروها جدا فمثلا لازم اى حد فى سلك القضاء او النيابه او المحاماه يبقى "فلان بيه " وينادوا بعض كده والظباط خاصه الشرطه "يبقى باشا" المهندسين "يتقاله باشمهندس"بالرغم انه مهندس بس الصنايعيه "يبقى الريس فلان او الاسطى فلان " وهكذا بس ليه كل مهنه ارتبطت باللقب ده معرفش الصراحه .

سيبك بقي من اللقب
طريقه نطق الاسم نفسها بتفرق كتير جدا
مره زمان دخلي زبون وعمال يقولي حمو وهو اصلا من الشخصيات المستفزه جدا بالنسبالي
وبين كل كلمه وكلمه حمو
الناس الواقفه كلها بتقولي ما بين شنوري او يا استاذ او باشمهندس مع اني مش مهندس اصلا بس بغض النظر
دا برضه عمال حمو حمو
وهو شكله مستفز
روحت ماسكه غاسله
قولتله حمو دي تقولها لابن البواب ولا للصبي بتاعك علي فرش السمك اللي انت واقف عليه
فبكل غباء الدنيا بصلي وقالي
امال اقولك ايه
قولتله ياعم متقوليش اصلا ولا عاوزك تنطق اسمي من اساسه ولا تدخلي محل
يرد عليا بكل برود الدنيا ويقولي
بس انا بحب اتعامل معاكم
ههههههههههههههههههههههههه ه
ومواقف تانيه كتير باستظرافات بايخه
بس في النهايه طريقه نطق الاسم نفسه بيكون فيها التقدير بغض النظر عن اي القاب

ههههههههههههههه
دحكنتني وهو بيقولك بس انا بحب اتعامل معاكم دي ... دي لوحدها كفيلة انها تثبت انو بني ادم مستفز ... هههه
وفكرتموني بحتت جمبينا ست كبيرة يعني هيا صاحبة الحجة وانا في مقام ابنها ... المهم. بتنادي عليا بايه (( حمااااااااده ))) يعني ممكن واقف تحت ومتشيك ورايح الشغل ولابس البدلة ومتأنتك وهيا. يا حمااااااااااااااادددددااا ااااااه. حماااااااااادة. اخبار ماما. ايه يا حمادة ... والحقيقة مش عارف ارد عليها واقولها ايه نفسي اقولها حمادة مين ياحجة. انا اسمي محمد. وماما مين بس يا حجة انا عمري. ما بقول. لا امي. مامااااااا دي ابداً حتى وانا طفل صغير ههههه. طول عمري بقولها يممممممممه وبعدين يا حجة الي يكلم حد. ينده عليه كده من البلكونة. كده في رابع دووور ... بصراحة مش عارف اكلمها. المشكلة بقه مش في الحجة. المشكلة ان حتى العيال الصغيرة لقطووو منها الاسم وبقوا ينادوني (( عمووو حمادة ... وؤنكل حمادة !!! ))) وانا اسمع كلمت حمادة دي يركبني مليووون عفريت .... ده حتى. البواب الجديد. بصيت لقيتوا بيلحقني الصبح. علشان يقلي في جواب جالنا وهو عمال يلحقني. بيقولي. استاذ حماااادة استاذ حمادة .

وتحول. اسمي. بقدرت قادر من محمد بسبب الحجة الى حمادة ده حتى عيالها واحد منهم بكلموا وبقلوا انا اسمي محمد ... يقلي يا رااااجل ده انا كنت فاكر اسمك الي في البطاقة. حمادة هههه. الي يدحك. كنت بحكي الموضوع ده لاستاذ نبيل زميلي. عن الحجة جارتنا فبيقولي احمد ربناااااا. لو تيجي تشوف في الحته عندنا لغايت دلوقتي بينادوني. عمو (....) هههههههه تقلي ايه اكتر حاجة بتستفزني في الكووون. أقولك. اسامي الدلع يعني ممكن الواحد يدلع طفل. يدلع شب او انا انا ممكن اتقبل وحدة ست. تدلعني بس لمن الحته كلها تدلعني هههه. حسبي الله ونعم الوكيل فيكي يا حجة . . ... وتحياتي .

حضرتك مشكلة يا استاذ حمادة :)
مش قادرة ابطل ضحك
ما شاء الله اسلوب حضرتك رائع ومميز كالعادة

الألقاب في الشغل واماكن العمل شئ بديهي لاننا مش قرايب ولا صحاب لكني شخصيا ما بدققش ولا بتفرق معايا لو حد ندهلي باسمي مباشره - مادام مش متعمد تقليل قدري او ماشابه-

إنما بصراحه ما بين العائله والاصدقاء بيكون موقف محرج لما زميل دراسه قديم يقولي يا بشمهندس بعفوية وانا اضطر ارد عليه باسمه مباشره لانه لا مهندس ولا دكتور .. ولو قلتله يا استاذ كذا هيكون شكلها بايخ ومش مناسب
وعليه فانا احب رفع الالقاب بين الاصدقاء القدامي وافراد العائله والاقارب .. والإحتفاظ بها في اماكن العمل والمعاملات الرسمية

الشئ التاني المحرج جدا هو موضوع السلام عالستات ... زمان وانا صغير كنا بنسلم بالايد عادي .. وفي اخر كام سنه إنتشر موضوع ان السلام عالستات الاجانب حرام .. فمابقيناش نسلم بالايد لافي جامعه ولافي عائله - وانا مش معترض علي دا-
دلوقت بقي في مقابلات الشغل ومع العملاء نصهم بيسلم ونصهم ما بيسلمش
وعلشان ما احرجش نفسي مابقيتش امد ايدي الأول .. ولما الست تمد ايدها بأسارع بميد ايدي علشان ما احرجهاش اكتر من كدا وبيكون موقف منيل كل مرة
فانا أتـــــمني الناس كلها تتفق يإما نسلم ياما ما نسلمش ههههههههه وكفي الله المؤمنين شر الإحراج

اقتباس:

---

المشاركة الأصلية كتبت بواسطة y a r i s

ههههههههههههههه
دحكنتني وهو بيقولك بس انا بحب اتعامل معاكم دي ... دي لوحدها كفيلة انها تثبت انو بني ادم مستفز ... هههه
وفكرتموني بحتت جمبينا ست كبيرة يعني هيا صاحبة الحجة وانا في مقام ابنها ... المهم. بتنادي عليا بايه (( حمااااااااده ))) يعني ممكن واقف تحت ومتشيك ورايح الشغل ولابس البدلة ومتأنتك وهيا. يا حمااااااااااااااادددددااا ااااااه. حماااااااااادة. اخبار ماما. ايه يا حمادة ... والحقيقة مش عارف ارد عليها واقولها ايه نفسي اقولها حمادة مين ياحجة. انا اسمي محمد. وماما مين بس يا حجة انا عمري. ما بقول. لا امي. مامااااااا دي ابداً حتى وانا طفل صغير ههههه. طول عمري بقولها يممممممممه وبعدين يا حجة الي يكلم حد. ينده عليه كده من البلكونة. كده في رابع دووور ... بصراحة مش عارف اكلمها. المشكلة بقه مش في الحجة. المشكلة ان حتى العيال الصغيرة لقطووو منها الاسم وبقوا ينادوني (( عمووو حمادة ... وؤنكل حمادة !!! ))) وانا اسمع كلمت حمادة دي يركبني مليووون عفريت .... ده حتى. البواب الجديد. بصيت لقيتوا بيلحقني الصبح. علشان يقلي في جواب جالنا وهو عمال يلحقني. بيقولي. استاذ حماااادة استاذ حمادة .

وتحول. اسمي. بقدرت قادر من محمد بسبب الحجة الى حمادة ده حتى عيالها واحد منهم بكلموا وبقلوا انا اسمي محمد ... يقلي يا رااااجل ده انا كنت فاكر اسمك الي في البطاقة. حمادة هههه. الي يدحك. كنت بحكي الموضوع ده لاستاذ نبيل زميلي. عن الحجة جارتنا فبيقولي احمد ربناااااا. لو تيجي تشوف في الحته عندنا لغايت دلوقتي بينادوني. عمو (....) هههههههه تقلي ايه اكتر حاجة بتستفزني في الكووون. أقولك. اسامي الدلع يعني ممكن الواحد يدلع طفل. يدلع شب او انا انا ممكن اتقبل وحدة ست. تدلعني بس لمن الحته كلها تدلعني هههه. حسبي الله ونعم الوكيل فيكي يا حجة . . ... وتحياتي .

---

ههههههههههههههههههههههههه هههههههههههههه
بيقولوله عمو ايه ؟؟؟
اصل نبيل ملهاش الا اسم دلع واحد منتشر
وهو يحمل بين طياته معاني كتير
بدايه من التغريد وانتهاء بحاجات يعف السان عن ذكرها

الا صحيح يا مطمئن افندي سلطان
ده اللي انت حاطه في اول البوست
http://www.el-balad.com/upload/photo...00x400/849.jpg
فايدته ايه ههههههههه
انا قريت البوست 4 مرات بحاول افهم الطربوش دا يعود علي مين في الحوار ومش لاقي

اقتباس:

---

المشاركة الأصلية كتبت بواسطة shnory

الا صحيح يا مطمئن افندي سلطان
ده اللي انت حاطه في اول البوست
http://www.el-balad.com/upload/photo...00x400/849.jpg
فايدته ايه ههههههههه
انا قريت البوست 4 مرات بحاول افهم الطربوش دا يعود علي مين في الحوار ومش لاقي

---

انا سعيد انك سئلتيني السؤال ده ههههه
بص ياسيدي الطربوش ده هو رمز. لوقار المصري. واحترامه لذاته ولمجتمعه ... يعني اذكر في احد افلام عادل ادهم تقريباً البطنية مش فاكر. الي هو كان في قلب الفيلم معلم ولابس طربوش. وازاي نادية الجندي لمن قالت لو اقلع الطربوش والجلبية والبس بدلة ازاي اهالي الحته اتمسخروا عليه. لانوا تخلى عن الوقار وتخلى عن لقب المعلمة وتحول من معلم قد الدنيا. لي حتت افندي ولا بسلي بدلة وجرفته ... الطربوش بالنسبة للمصري هو رمز لايام. كان الاحترام يسود فيه الوطن. الباشا باشا والبرنس برينس والافندي افندي. ... حتى الفنان كان الرسام. اسمو فنان لكن الموسيقي. مزيكاتي. مش فنان الممثل كان اسمو مشخصاتي مسمهوش فنان. او نجم او مبدع او حتى مثقف. ، مثقف منين. وهو حتت مشخصاتي. يجيلوا الدور يقراه يمثلوا فين الابداع في كده عاوز افهم !

لذلك حصل لخبطة في المسميات واللخبطة دي. ادت للخبطة في الالقاب ولخبطة الالقاب. دي ادت لانهيار الاحترام في المجتمع . .. ولمن انهار. الاحترام في المجتمع انهارت الاخلاق ... فالطربوش هنا ياباشا ده رمز للاحترام وحفظ الالقاب :) ... وتحياتي

انا معرفش الا 3 القاب ياعمى او ياستاذ او ياباشا بقول ياعمى للاكبر منى وياستاذ لاى حد عايز منة مصلحة وياباشا للداخلية

اقتباس:

---

المشاركة الأصلية كتبت بواسطة الاستاذ

انا معرفش الا 3 القاب ياعمى او ياستاذ او ياباشا بقول ياعمى للاكبر منى وياستاذ لاى حد عايز منة مصلحة وياباشا للداخلية

---

هههههههههه
نفهم من كده ونظرا لاسمك في المنتدي انك بتدور علي مصلحتك حتي عند نفسك ؟
هههههههههههه

كل الناس واحد والتقدير للكبير والصغير
فالنهاية تعود ملوش مقياس

على فكرة الموضوع ده لحد فترة بسيطة ماكنش بيفرق معايا ...
لحد ما حصل موقف بايخ كنت معدى فى الشارع اللى ساكن فيه ولقيت واحد صاحبى جي يصلح العربية بتاعته عند واحد كهربائى محله فى الشارع المهم بالحضن واخبارك وعامل ايه ازيك المهم صاحبى اسمه محمد ازيك ياحمادة واسمى عمرو ازيك ياعموره تمام تمام ووقفت معاه لحد ما خلص وبقول للكهربائى الف شكر يا عم محمود يقولى على ايه يا عموره نعععععم سبع سنين ساكن فى الشارع لما اعدى عليه واقول السلام عليكم ازيك يا عم محمود يقولى الحمد لله يا استاذ عمرو فجاءة بقيت عمووره طيب اللى بيقول عمووره ده صاحبى من اولى ابتدائى فعادى يعنى لما ندلع بعض اما انت اللى بينى وبينك سلام فقط لا غير تقولى عموور ه بتاع ايه ....
ومن ساعتها اديته وش خشب ومفيش غير السلام عليكم فقط لا غير ....
ودلوقتى فين ناس معينة لو مقلتش استاذ بقلب وشى على طول علشان يبقى فيه حدود للموضوع ومش كبرياء ولا تعالى الحمد لله ولكن فى ناس لما تتعود عليك فى الكلام بتيجى فوق دماغك فى الاخر وحاجة من الاثنين متكلموش خالص بعد كده ،،،، يتنزل لمستواه فى الكلام والهزار علشان تحفظ ماء الوجه وخصوصا لو فى ناس قاعدين حواليكم ....

كويس ان الموضوع ده اتكتب لانه شغلني جدا والله

انا طول عمري بكلم الناس بالقابهم وبحترم اللي اكبر مني ومبقلهوش باسمه ..حتى البواب بقوله ياعم فلان مبقلوش باسمه

وانا عندي 25 سنه ومهندس

المشكله مع اتنين

واحد ضابط مقدم جيش ..مابيقوليش الا ياحوده ولما يتكلم معايا يقولي انا المقدم فلان ,,ويتعمد انه يقولي ياحوده

ده معنديش مشكله مع انه يناديني باسمي الا ان علشان هو ضابط وعنده عنطزه شويتين ومبيحترمش القاب غيره زي اخويا مثلا الي اكبر مني ب6 سنين وبتعمد يقوله باسمه برده من غير يادكتور


والتاني ابن البواب تقريبا اصغر مني ب 3 او 4 سنين وبيقولي يامحمود او ياحوده برضه

ومش عارف اوصلهاله ازاي من غير ماحرجه

وفي نفس الوقت مش عايزه يتعود عليا ؟؟

بجد عايز راي في الموضوع ده

لاني طول عمري الحمد لله محترم وفي النفس عايز اجبر اللي ادامي على احترامي زي مانا محترم

موضوع الالقاب دا شىء متأصل فى الثقافه المصريه اى حد فينا لازم يتنادى بلقبه دكتور او مهندس او بيه او باشا او غيره
أنا طبعا كنت كدا وكان لازم اى حد يكلمنى لازم يقولى يا باشمهندس
لحد ما اشتغلت من سبع سنين فى شركه انترناشيونال فى الخليج
الوضع مختلف كل واحد بتكلمه باسمه مباشره من غير اى ألقاب لا مستر ولا انجنير
والكلام دا من اصغر موظف فى الشركه لحد ceo
اكيد دا أثر فيا ودلوقتى مش تفرق معايا اللى يكلمنى يقولى يا استاذ او باشمهندس
بس وانا فى مصر باكون حريص انى لما اتكلم مع اى حد غريب لازم اناديه بلقبه

لو حد غريب لازم الالقاب لكن الاهل واصحابي بيبقي عادي جدا
وفي الشغل لازم الالقاب وساعات مش بتتقال يعني
الموضوع عندي مش ذات اهمية اوي

اقتباس:

---

المشاركة الأصلية كتبت بواسطة dr.hazem

اللي معرفوش بناديه بلقبه
واللي اكبر مني بكتير حتى لو اعرفه هناديه بلقبه
ولو واحد اعرفه وواخدين عبعض قوي بس قدام ناس بديله لقبه عشان اكبره قدام الناس
ولو حد اعرفه وعارف ان مقامه كبير هديله مقامه ولقبه

اما عن نفسي فمش بتمسك بان حد يناديني بلقبي ومفهاش حاجه..
تحياتي

Sent from my Xperia Arc S using Forum Runner

---

+1
انا كمان بالضبط كده و اللقب بتاعي ما بقتش باتمسك به قوي لانه مع الاسف بيتقال للكهربائي و السباك و سواق الميكروباص يعني في مهندس بجد و فيه هاي كوبي :colsmil: . اللي انا ما بطيقهوش هو الاطفال و هي بتنادي اباؤهم او اجدادهم باسماؤهم بدون ألقاب بصراحه ده اللي بيعصبني و بابقي عايز أمسك في خناق الاتنين

والله الموضوع ده بينم على تربيه ..واحترام الشخص لنفسه

واوقات مبقبلهاش عارف لما تلاقى حد اصغر منك ب20 سنه وانت بتقول له يا استاذ فلان وتقريبا انا فى سن والده وينده لك باسمك مجرد حتى من كلمه عمو او استاذ حاجه بتضايق طبعا
وكويس جدا انك عملت الموضوع ده هههههههههه اصل فيه حد معانا هنا فى المنتدى عارف فارق السن بينى وبينه .. مش هتكلم فى فوارق تانيه لانى بعتبرها نقص ....تقريبا بينه وبين ابنى فارق سن ضئيل جدا

حاسس انه بيتعمد انوا ينادينى باسمى مجرد مع انى مش صغير فى السن من فضل ربى ماشى فى 48وانا وعمرى ما حاولت انى اكلمه باسمه مجرد لانى احترم الصغير قبل الكبير بجد والله العظيم كرهت اسمى لاول مره فى حياتى لتعمد ه كل مايكلمنى يقولى ..يا ..وبعدين يسيب مسافه ويكتب طارق .. بجد بتجنب اشارك فى رد منه علشان مكهرش اسمى زياده ههههههه. لا دنا كرهت اسمى فعلا

الاحترام لازم يكون متبادل رفع التكليف يكون بين الاصدقاء والاحباب مش فارقه خالص

اعتذر كلمتين كانوا خانقينى واضطريت اقولهم

السلام عليكم

الموضوع شيق جدا كعاده مواضيع الأخ ياريس اللي دايما مواضيعه بتخرج الواحد من الإكتئاب

جار ليا ساكن جديد و كنا بنتقابل علي طول في مدخل العماره و أسلم عليه إزيك يا أستاذ أحمد كل ما أشوفه و ألاقيه متاخد كده و مش مرتاح

بعدها بفتره طويله لاحظت إن البواب كل شويه أحمد بيه.... أحمد بيه..و عرفت منه إنه ظابط شرطه

جربت بعدها أحمد بيه لما قابلته و النتيجه كانت فرق مبهر في التعامل..(مع إني كنت بقوله يا أستاذ بس واضح إنه كان بيعتبرها إهانه)

المفارقه بقي إنه سكن في العماره كذا ضابط جيش و العماره بقي نصها بهوات و أنا بصراحه بكره الألقاب ديه لأنها إتلغت من زمان!

جزاكم الله خيرا علي الموضوع
و ربنا يحسن أخلاقنا جميعا

اى حد عاوز يتنادى بلقب معين بناديه باللقب ده
ومش بهتم اوى ان حد يناديني بلقبي
لكن اللى ما بقبلهش ان حد يتطوع ويناديني باسم دلع

امال بقي لما تكون واحدة وييجي واحد حاضر معاها مؤتمر او محاضرات 3 او 10 مرات حتي ويجي يندها باسمها رغم انها بتتعمد ترد عليه بلقبه ؟

عاجبتني كلمه واحد صاحبي قبل كده و للعلم حبيبي جدا
انا بتكلم براحتي و بهرج بعفويه جدا و هوا بيمجد و بيفخر بزياده
فا بقوله مالك ياد مذودها ليه
قالي ادي الناس وضعها عشان تاخد وضعك
بجد شابوووه

اقتباس:

---

المشاركة الأصلية كتبت بواسطة far!d

عاجبتني كلمه واحد صاحبي قبل كده و للعلم حبيبي جدا
انا بتكلم براحتي و بهرج بعفويه جدا و هوا بيمجد و بيفخر بزياده
فا بقوله مالك ياد مذودها ليه
قالي ادي الناس وضعها عشان تاخد وضعك
بجد شابوووه

---

أ.فريد

من موضوعات سابقه عرفت إن حضرتك ضابط
إيه هوه اللقب اللي تحب حد ينادي حضرتك بيه خصوصا لو كانت المعرفه مش وثيقه (جار جديد مثلا)
أنا بسأل لأني معايا جيران كتير ضباط شرطه و جيش و بحرية و مش بحب موضوع باشا و بيه ده
جزاكم الله خيرا

اقتباس:

---

المشاركة الأصلية كتبت بواسطة boomboomzoro

أ.فريد

من موضوعات سابقه عرفت إن حضرتك ضابط
إيه هوه اللقب اللي تحب حد ينادي حضرتك بيه خصوصا لو كانت المعرفه مش وثيقه (جار جديد مثلا)
أنا بسأل لأني معايا جيران كتير ضباط شرطه و جيش و بحرية و مش بحب موضوع باشا و بيه ده
جزاكم الله خيرا

---

لو واحد لسه متعرفهوش طبيعي لو حتى مهندس انه يندهلك بيابيه وانت اكيد بترديد زيه لكن اللي مش طبيعي ان واحد طالب منك انك تحترمه لكن هوا مش بيرد بالمثل
احترم تحترم

اقتباس:

---

المشاركة الأصلية كتبت بواسطة FAR!D

لو واحد لسه متعرفهوش طبيعي لو حتى مهندس انه يندهلك بيابيه وانت اكيد بترديد زيه لكن اللي مش طبيعي ان واحد طالب منك انك تحترمه لكن هوا مش بيرد بالمثل
احترم تحترم

---

السلام عليكم يا أ.فريد
متشكر لرد حضرتك و إهتمامك...الفكره إنه محترم و بيندهني بـ / باشمهندس
السؤال بقي الضابط تندهله بإيه
يعني حضرتك مثلا مفيش معرفه بينا غير المنتدي
لما أكتب لحضرتك دلوقتي بكتب أ.فريد....لو عايز أندهلك أقلك إيه؟؟؟؟ ضابط.فريد :_Alshmokh08[1]:
الموضوع ده بيسببلي إحراج جدا في التعامل معاهم وهمه كتير :tire:
جزاكم الله خيرا

اقتباس:

---

المشاركة الأصلية كتبت بواسطة boomboomzoro

السلام عليكم يا أ.فريد
متشكر لرد حضرتك و إهتمامك...الفكره إنه محترم و بيندهني بـ / باشمهندس
السؤال بقي الضابط تندهله بإيه
يعني حضرتك مثلا مفيش معرفه بينا غير المنتدي
لما أكتب لحضرتك دلوقتي بكتب أ.فريد....لو عايز أندهلك أقلك إيه؟؟؟؟ ضابط.فريد :_alshmokh08[1]:
الموضوع ده بيسببلي إحراج جدا في التعامل معاهم وهمه كتير :tire:
جزاكم الله خيرا

---

مادام ناداك باللقب تبقى معرفه رسميه و زي ما نداك لازم تنده باللقب
ولو اني مبحبهمش الا باشا و بيه مفيش غيرهم هههههه

انا احترم كل الناس ولا احب احد ينادينى بغير اسمى فقط وما بتفرقش معايا ابدا ابدا ابدا ههههههههههههه تخيلو بقى وانتو بتنادونى باسمى ههههههههههههههه يا فتح الباب ههههه مش مقتنع انا والله بالاسم ده خالص لكن اعمل ايه فى جدى اه لو كنت واعى لنفسى ساعتها هههههههههه كنت ضربته ١٠٠ ولا ٢٠٠ على ما بداخل هذا اللامخ اصلا لكن اهه زمان بقى ٠٠٠٠ وبينادونى بفتحى افتكر كفايه اوى كما ان اسمى لم يسبب لى اى حرج او اى مشكله ده بما انه اسم مركب انا بس كان ليا عتب على جدى اللى ما شفتوش اصلا نفسى اقوله منك لله يا شيخ ربنا ينتقم منك يا شيخ ههههههههههههههههههههههههه

بحكم شغلي مع مديرين اجانب
الموضوع عادي اتخن مدير بنادية باسمة من غير اي لقب ودة عادي
وااناس اللي اشتغلت في مالتي ناشيونال او مع اجانب هايعرفوا كلامي

اما في مصر العملية داخلة في ثقافة تربية اتعودنا نقول الالقاب كنوع من الاحترام