الموضوع: شوية مشاكل بسيطة في اللانوس 2001

السلام عليكم جميعا


انا لسة جايب العربية جديد من شهر تقريبا
هي لانوس 2 2001 اول عربية ليها و مكنتش بعرف اسوق لغاية ما جبتها و اتعلمت عليها
المهم انا ابيض خالص في موضوع العربيات دة خالص
المهم هي العربية حالتها حلوة كدواخل و كدة
لكن اللي كانت معاهم العربية مكانوش مهتمين بيها بنكلة
ففيها شوية مشاكل ان شاء الله تكون بسيطة

اول حاجة كهربا العربية :-

ولاعة العربية

انا صحيح مبفهمش حاجة في كهربا العربيات لكن انا متاكد ان كهربا العربية منفوخة خالص
انا اول ما جبتها خالي خد العربية و وداها عند كهربائي صاحبة اوي خلاه لف الدفيرة من الاول للاخر و ظبطها على حسب كلامة و كان بيقولي انها كانت متبهدلة على الاخر

المهم هي كل حاجة شغال في الكهربا بس مفيش حاجة شغالة تمام

اهم المشاكل ان مفروض الولاعة تشتغل مع التكة (اللي هي التكة بتاع الكاسيت تقريبا) اللي قبل تكة الكونتاكت ... المهم هي احيانا تشتغل و تبقى اللمبة بتاع البنزين تكون منورة و احيانا متشتغل و تكون لمبة البنزين طافية

تاني حاجة انا كنت جايب ام بي ثري اللي بيشتغل على الولاعة المهم اول ما جبتة اشتغل كويس بعدين بقا بيرعش جربت واحد تاني من عند واحد صحبي نفس المشكلة بيرعش "يعني بيشتغل و يقفل و يشتغل تاني بس بسرعة اوي " المهم لما ابقى بقا فترة مش شغال بالولاعة و اجي اشغلة يشتغل تمام شوية و الولاعة ترجع تاني ترعش
و لما التكة اللي اللمبة بتاع البنزين تكون منورة يشتغل كويس ولما تطفي ميشتغل كويس مش عارف اية علاقتها بالموضوع
هو المؤشر بتاع البنيزن بيزيد و يعلى براحتة مش عارف لية و وحاسس ان لية علاقة بموضوع الولاعة دة
و الولاعة لما تبقى شغالة كويس و اجي ادور ترجع تبوظ تاني مش عارف لية
دي مشكلة الولاعة

طبعا موضوع المؤشر بتاع البنزين دي بردة هيجنني

و في حاجة كمان انا عندي لما ارفع ازازين في نفس الوقت تلاقي واحد منهم ميت خالص في الرفع و لما اشيل ايدي من على واحد فيهم تلاقي التاني جربي مش عارف دة طبيعي ولا اية



ثانيا الفتيس :-

في مشكلة خنيقة طبعا موضوع الاول لازم العربية تبقى واقفة عشان يجي معاك لكن لو العربية متحركة حتى لو على اية بحس ان الفتيس هيتكسر مني

بعدين موضوع الغيارات
انا حاسس انة حوار عبيط و انة عشان انا لسة متعلم سواءة قريب
هو الفتيس ناعم و كل حاجة الصراحة لكن في حاجة مش عارف بردة دة طبيعي ولا اية هو اني بحس ان كل الغيارات شبة بعضيها
يعني الرينجات قريبة اوي من بعض
يعني الاول ياخد معاك من اول ما تطلع بالعربية لغاية ما توصل ل40 او اكتر كمان و التاني يطلعلك العربية و يشد لغاية ال60 ومش بعيد كمان 70 و التالت من 20 لغاية 80 او اكتر و الرابع بياخد من 40 مبيقولش لأ لغاية 100و بيبقى فية حيل كمان
خلاصة القول ان الغيار ملوش حد ادنى ولا لية حد اقصي تدي اي غيار في اي وقت ميقولش لأ و دي حاجة تشل

و في ناس تقولي ريح العربية يعني اول تطلع بية العربية و تاني لغاية ال40و التالت لل60 و رابع من 80
و كنت بعمل كدة و العربية تمام بس لما ركب معايا ناس كتير قالوللي انت عندك فرق في غيار كامل
انا مش عارف اية احسن حاجة في غيار العربية يعني

انا عندي كلام كتير لكن كفاية كدة عشان اكيد صدعتو من رغيي
معلش استحملوني بقا دي من عشمي فيكم

الف شكر يا رجالة ^_^