الموضوع: كلاكيت تاني مره: أنا والسيراتو. ايه اللي بيحصل ده!!!

المشاركة الأصلية كتبت بواسطة eslamsubaru

ليا تحفظ على الكلام ده : كيا أه تطورت جامد و بقت منافس عالمى بس ده مش معناه انها تفوقت على اليابانى كله زى ما حضرتك بتقول .. ممكن اه شركات باليابانى اتجهت للتقفيل الخارجى زى تويوتا و نيسان و الميتسوبيشى .. انما فيه شركات يابانى تقفيلها و صناعتها يابانى 100% زى هوندا , سوبارو , مازدا . و دول معتقدش نقدر نقول ان كيا تفوقت عليهم . الصح انك تقول بقت منافس ليهم انما متفوقتش نهائيا .
اه مبيعات كيا بقت اكتر منهم بس ده فى سوقنا احنا بس (و ده راجع لنظرة السوق للكماليات اكثر منه للميكانيكا و الأمان) انما فالأسواق الثانية الفرق لليابانى .

انت قلت كل اللي كان نفسي أقوله و مش عارف

تسلم يااسلام سوبارو قلت اللي في نفسي الياباني تقفيل ياباني لا يعلي عليه

أنا أيضا أتفق مع كلام أستاذ إسلام سوبارو

الحمد الله ربنا ستر

المشاركة الأصلية كتبت بواسطة yasserelsayad

يابانى 100% ايه يا باشا السيفيك الجديدة بتتقفل فى تركيا اصلا
والمازدا القديمة كان يابانى اه بس اشك ان الجديدة كدا
والسوبارو ملهاش وزن عندنا ملناش دعوة بيها

والمبيعات اللى فى سوقنا بس دا مش مظبوط طبعا

مجموعة هيونداى-كيا .. اكبر رابع شركة سيارات على مستوى العالم فى المبيعات

مع احترامى لكلامك يا ياسر : المازدا يابانى , و مش كل موديلات اليابانى بتتقفل بره : نيسان مثلا منها التيدا يابانى و هكذا , و سوبارو ايه اللى ملناش دعوة بيها !!!!!! بتتكلم عن عربية يابانى 100% , دفع رباعى و اخدة اعلى تقدير فى اختبارات الأمان باوروبا و امريكا و تقول ملناش دعوة بيها !!!
عموما احنا بنتكلم كلام واقعى و ما بننكرش ان كيا و هيونداى عربياتها بقت محترمة بس مش كل موديلاتها برضه و لا ايه رأيك ؟؟
و لعلمك : مبيعات تويوتا اكثر من كيا و هيونداى عالميا :)
عموما احنا مش موضوع كلامنا اننا نطلع مين احسن من مين : لأن مفيش حاجة كاملة بالدنيا و الكمال لله وحده ..
بس لازم نبقى واضحين بكلامنا : بمعنى ان العربيات اليابانى 100% معمرة جدا و الدليل قارن بين اى عربية يابانى و اى عربية كورى من بعد ال 2000 الى الأن و شوف مدى حالة كل عربية : هتلاقى الأغلبية لصالح اليابانى من حيث العمر الافتراضى للعربية ..
و الكورى يتفوق على اليابانى فالكماليات و اضافة تكنولوجيا لعربياتها بأسعار منافسة جدا : بس فالمقابل بيكون فيه تقليل فى حاجات ثانية ..
لأن بالعقل كده لما تبقى عربية يابانى و سعرها 170000 مثلا و تلاقى عربية كورى ب 170000 برضه و فيها تكنولوجيا تفوق اللى باليابانى و التكنولوجيا دى الفرق المفروض يكون 30000 الى 40000 زيادة : يبقى اكيد فيه حاجة مخلية تكلفة تصنيع العربيتين واحدة .. و هى ان الخامات المستخدمة بتصنيع العربية الكورى اقل فى تكلفتها من نظيرتها اليابانى و الخامات دى ممكن تكون فى : الموتور , الفتيس , العفشة.......او يكون العمر الافتراضى للقطع المستخدمة اقل ( و ده اللى بيحصل بالفعل) .
و عموما الكورى فيه منه عربيات محترمة جدا : انا مش فاكر اسمها بس كانت فى اخر معرض اوتوماك و كانت 2000 سى سى.
و للعلم انا لسه جايب كيا بيكانتو من شهر : و هى عربية جيدة . علشان متفتكرش انى متحيز لليابانى و خصوصا سوبارو.
تحياتى