الموضوع: كلاكيت تاني مره: أنا والسيراتو. ايه اللي بيحصل ده!!!

السلام عليكم ورحمة الله وبركاته
حبيت ارجعلكم بموضوع جديد بعد غيبه تقريبا اسبوعين عن المنتدي علشان كنت بلين العربيه زي التوكيل ماقالي لحد 2000 كيلو وتقريبا خلصتهم.
من فتره كنت كتبت عن تجربتي الغريبه في قيادة السيراتو الجديده 2014
http://www.nilemotors.net/Nile/39964...post3875373028
المهم ياجماعه ندخل في موضوعنا:
كنت في مشوار أنا وواحد صاحبي وكنت ماشي علي خرايط جوجل مابس بموبايلي طول الطريق وتقريبا كنت خلاص ناقصلي 10 كيلو وأوصل فقلت خلاص أطفي الجي بي اس وأريح الموبايل شوية وهوب مافيش تلاته اربعه كيلو وتهت عن الطريق الرئيسي اللي كنت ماشي فيه
والدنيا كانت ضلمت.
المهم دخلت في طريق كده عرفت بعد كده ان إسمه " إسطبلات الأحمدي " ودي موجوده في مدينة الأحمدي هنا في الكويت والطريق كان مجرد حارتين.
وكنت واخد يميني وماشي علي سرعة 80 أو 90 تقريبا وكان في خلاطة أسمنت ماشية قدامي ومش عارف افاديها علشان ماأضغطش وعداد الار بي ام يرفع عن تلاته.
الخلاطه كانت كل شويه تنطر ميه علي عربيتي وف مره قمت مشغل المساحات مع الرذاذ وأبص الاقي حفره في الطريق عمقها تقريبا 20 سنتي أو شبر بعمق الأرض ومالحقتش حتي احط رجلي علي الفرامل وسمعت صوت هبده جامده في العربيه وهو هو كان نفس الصوت اللي العربيه عملته في التجربه الأولي ليا وقلبي فضل يدق ومن خوفي وقفت العربيه بالراحه خالص علي بعد يمكن ميت متر من الحفره وانا نازل مرعوب وقلت خلاااااص العربيه ضاعت وصاحبي نزل جري يبص علي مكان الخبطه وللمفاجأه العربيه ولله الحمد وربنا يحفظهالي مافيهاش خدشه ولا أي حاجه وفضلت ماشي موسوس وقلت يبقي الكاوتش هايطلع فيه بلالين وهازهق من العربيه والحمد لله بقالها تلات ايام كل يوم ابص علي الجنط والكاوتش. ومن شدة قلقي رحت رفعتها علشان اطمن وماطلعش في العفشه أي حاجه تماما والحمد لله.
الحمد لله والشكر لله أولا ثم شكرا كيا شكرا سيراتو شكرا بيتر شراير مصمم كيا علي العربيه الجميله اللي بنبهر بيها أكتر وأكتر كل يوم.